অসম লাইভ২৪ঃ ২৩ আগষ্টৰ সন্ধিয়া চন্দ্ৰ পৃষ্ঠৰ কুমেৰুত ভাৰতে উৰুৱালে বিজয় ধ্বজ্জা৷ এই চন্দ্ৰ মিছন সফল হোৱাৰ পাছতেই ইছৰোই ঘোষণা কৰিছে সূৰ্য অভিযানৰ কথা৷ সূৰ্যত চলাব লগা মিছনৰ নাম দিছে আদিত্য এল-১৷ ইতিমধ্যে ১৪ আগষ্টত ইছৰোৰ এক্স হেণ্ডেলত ইয়াৰ ছবিও প্ৰকাশ কৰিছে ভাৰতীয় মহাকাশ গৱেষণা সংস্থাই৷
আদিত্য এল সতীশ ধাৱান স্পেছ চেণ্টাৰলৈ অনা হৈছে
ইছৰোৰ দলে ২৬ আগষ্ট বা ছেপ্টেম্বৰতেই উৎক্ষেপণ কৰিব পাৰে আদিত্য এল-১৷ কৃত্ৰিম উপগ্ৰহটো ইতিমধ্যে অন্ধ্ৰপ্ৰদেশৰ শ্ৰী হৰিকোটাৰ সতীশ ধাৱান স্পেছ চেণ্টাৰলৈ আনিছে বিজ্ঞানীৰ দলে৷ আদিত্য এল-১ ক পিএছএল ভি ৰকেটৰ সৈতে সংযুক্ত কৰা হ’ব৷ সূৰ্যৰ ওপৰত গৱেষণাৰ বাবে ভাৰতেই প্ৰথম মহাকাশযান প্ৰেৰণৰ চিন্তা চৰ্চা কৰিছে৷ আদিত্য এল-১ য়ে ১৫ লাখ কিঃমিঃ অতিক্ৰমি সূৰ্যৰ ওপৰত গৱেষণা চলাবলৈ ৰাওনা হ’ব৷
আদিত্য এল-১ য়ে কি কাম কৰিব?
মহাকাশ যানখনৰ হিন্দুৰ দেৱতা সূৰ্যৰ নামেৰেই নামকৰণ কৰিছে বিজ্ঞানীয়ে৷ সূৰ্যৰ আন এক নাম আদিত্য৷ ইন্ধনসহ এই কৃত্ৰিম উপগ্ৰহটোৰ ওজন প্ৰায় ১৫০০ কিঃগ্ৰাঃ৷ ইয়াত ৭টাকৈ পেলোড আছে বুলি জনাইছে ইছৰোৰ দলে৷ আদিত্য এল-১ ক সূৰ্য-পৃথিৱীৰ চাৰিওফালে এটা হেলো কক্ষপথত ৰখা হ’ব৷ হেলো কক্ষপথ হৈছে সূৰ্য-পৃথিৱীৰ প্ৰথম লেগ্ৰেঞ্জ বিন্দু। এই বিন্দুটোৰ বিশেষত্ব আছে। কোনো গ্ৰহণ অবিহনেই সূৰ্যক পোনকৈ চাই থাকিব পাৰি এই স্থানৰ পৰা৷ পৃথিৱীৰ পৰা এই হেলো পইণ্টৰ দূৰত্ব প্ৰায় ১৫ লাখ কিঃমিঃ৷ এই কক্ষপথৰ পৰাই আদিত্য এল-১ য়ে সূৰ্যৰ ওপৰত গৱেষণাৰ কাম আৰম্ভ কৰিব৷
আদিত্য এল-১ এটা কৰোনাগ্ৰাফী ছেটেলাইট বা উপগ্ৰহ৷ সূৰ্যক পৰ্যবেক্ষণ কৰাই এই মিছনৰ প্ৰধান উদ্দেশ্য৷ সূৰ্যৰ বায়ুমণ্ডল আৰু চৌম্বক ক্ষেত্ৰ সম্পৰ্কে তথ্য অম্বেষণ কৰা৷ সূৰ্যৰ কেন্দ্ৰস্থল, সৌৰ নিৰ্গমন, শিখা ইত্যাদিৰ ওপৰত গৱেষণা কৰা৷ ২৪ ঘণ্টাই সূৰ্যক পৰ্যবেক্ষণ কৰিব এই উপগ্ৰহটোৱে৷ সৌৰ জাগতিক সমূহ পৰিঘটনাৰ ওপৰত নজৰ দিব এই উপগ্ৰহই৷ ইয়াৰোপৰি সৌৰ ধুমুহা সম্পৰ্কীয় বিষয়ৰ ওপৰতো অধ্যয়ন কৰিব আদিত্য এল-১য়ে৷ বিজ্ঞানীয়ে মহাকাশত প্ৰয়োজনীয় ইন্ধনৰ খৰচ কমোৱাৰ উপায়ো বিচাৰিব এই অভিযানত৷
এই অভিযান সফল হ’লে সৌৰমণ্ডল আৰু পৃথিৱীৰ পৰিবেশৰ ওপৰত সূৰ্যৰ প্ৰভাৱ সম্পৰ্কীয় বহু তথ্য লাভ কৰিব ইছৰোৰ দলে৷ আদিত্য এল-১য়ে সূৰ্যৰ স্তৰ, ‘চ’লাৰ কৰোনা’ক লৈয়েই গৱেষণা কৰিব৷ সূৰ্যৰ বাহিৰৰ দিশত তাপমাত্ৰা প্ৰায় ১ কোটি কেলভিন৷ নিম্নস্তৰৰ তাপমাত্ৰা সেই তুলনাত কম৷ অৰ্থাৎ নিম্নস্তৰৰ তাপমাত্ৰা প্ৰায় ৬০০০ কেলভিন৷ সূৰ্যৰ পৃষ্ঠদেশ, কৰোনাৰ তাপমাত্ৰাৰ পাৰ্থক্য, সূৰ্যৰ পৰা ছিটিকি অহা শিখাই পৃথিৱীৰ বায়ুমণ্ডলত কি কি প্ৰভাৱ পেলাই সেই বিষয়েও গৱেষণা কৰিব আদিত্য এল-১য়ে৷ সূৰ্যৰ কেন্দ্ৰস্থলৰ তাপমাত্ৰা গড়ে ১০ লাখ বা তাতকৈয়ো বেছি ডিগ্ৰী ছেলচিয়াছ৷ সকলো সময়তে কিন্তু এই তাপমাত্ৰা একেই নাথাকে৷ কেতিয়াবা এই তাপমাত্ৰা কমে কেতিয়াবা বাঢ়ে৷ এই কমা বঢ়াৰ কাৰণ কি সেই সম্পৰ্কেও গৱেষণা চলাব এই উপগ্ৰহই৷ সূৰ্যৰ কাষলৈ ছেটেলাইট পঠিওৱা বিষয়টোক লৈ বিগত কেইবাবছৰ ধৰি চিন্তা চৰ্চা কৰি আছে বিজ্ঞানীৰ দলে৷ ২০২০ চনতেই এই মিছন আৰম্ভ কৰাৰ কথা ভাৱিছিল ভাৰতীয় বিজ্ঞানীয়ে৷ কিন্তু কৰ’নাৰ বাবে সেই পৰিকল্পনা পিছুৱাই দিয়ে বিজ্ঞানীৰ দলে৷
পৃথিৱীৰ কাষত থকা নক্ষত্ৰ সূৰ্য
ইছৰোৰ দলে অনুমান কৰামতে সূৰ্যৰ বয়স মোটামুটি ৪৫৭ কোটি বছৰ৷ বৰ্তমান সূৰ্যই নিজা কেন্দ্ৰৰ হাইড্ৰজেন বলয়ত হিলিয়ামৰ মিশ্ৰণ কৰিছে৷ এয়া একা স্থিতিশীল প্ৰক্ৰিয়া৷ যাক পাৰমাণৱিক ফিউজন বুলি জনা যায়৷ সূৰ্যৰ আয়তন পৃথিৱীৰ তুলনাত প্ৰায় ১৩ লাখ গুণ ডাঙৰ৷ সূৰ্যৰ ভৰ পৃথিৱীৰ তুলনাত ৩৩,০০০০ গুণ বেছি৷ সূৰ্যই আমাৰ সৌৰজগতৰ শক্তিৰ উৎস৷ সূৰ্য অবিহনে পৃথিৱীত প্ৰাণী বাচি থকা সম্ভৱ নহয়৷ সূৰ্যৰ মধ্যাকৰ্ষণে সৌৰজগতৰ সকলো সামগ্ৰীক নিয়াৰীকৈ ধৰি ৰাখে৷ সূৰ্যৰ কেন্দ্ৰী. অঞ্চলসমূহৰ তাপমাত্ৰা ১৫ মিলিয়ন ডিগ্ৰী চেলছিয়াছ পৰ্যন্ত বাঢ়ি যায়৷ এই তাপমাত্ৰাত নিউক্লিয়াৰ ফিউজন নামৰ এটা প্ৰক্ৰিয়া সংঘটিত হয়৷ এই ফিউজনত সূৰ্যৰ শক্তি আৰু বৃদ্ধি হয়৷ ফটোস্ফিয়াৰ নামেৰে পৰিচিত সূৰ্যৰ দৃশ্যমান পৃষ্ঠটো তুলনামূলকভাৱে শীতল৷ এই স্থানৰ তাপমাত্ৰা প্ৰায় ৫৫০০ ডিগ্ৰী ছেলচিয়াছ৷ সূৰ্য পৃথিৱীৰ আটাইতকৈ কাষতে থকা নক্ষত্ৰ যদিও পৃথিৱীৰ পৰা সূৰ্যৰ দূৰত্ব প্ৰায় ১৪ কোটি ৮৮ লাখ কিঃমিঃ৷ সেয়ে সূৰ্যৰ পৰা পৃথিৱীলৈ পোহৰ আহি পৰিবলৈ ৮ মিনিট সময়ৰ প্ৰয়োজন হয়৷
সূৰ্য অভিযানত ইছৰোক সহায় কৰিব কেইবাখনো দেশে
ইউৰোপীয়ান মহাকাশ সংস্থাই জনোৱা অনুসৰি আদিত্য এল-১ মিছনৰ সময়ত ট্ৰেকিং আৰু লোকেছন ডিটেক্টৰ কামত তেওঁলোকে সহায় কৰিব৷ কিন্তু এই সম্পৰ্কে এতিয়ালৈকে ইছৰোই কোনো তথ্য প্ৰকাশ কৰা নাই৷ ইউৰোপীয় মহাকাশ সংস্থাৰ (ইএছএ) মতে, ‘আদিত্য এল-১ ক ইএছএয়ে ৩৫ মিটাৰ গভীৰ মহাকাশ এণ্টেনাৰ পৰা বিশেষ সহায় আগবঢ়োৱা হ’ব৷ ইয়াৰোপৰি কক্ষপথ নিৰ্ধাৰণতো সহায় কৰিব এই সংস্থাই৷ ইউৰোপীয় মহাকাশ সংস্থা সন্দৰ্ভত বিজ্ঞানী ড০ যোগেশ্বৰ নাথ মিশ্ৰই কয়, ‘এয়া বিদেশী সংস্থাৰ সহায় বুলি ক’ব নোৱাৰি। এয়া হৈছে পাৰস্পৰিক সমৰ্থন। মহাকাশ নেটৱৰ্কৰ বিষয়ে দেশবোৰৰ মাজত কিছুমান চুক্তি আছে৷ যেনেদৰে দেশবোৰৰ মাজত সীমা সম্পৰ্কীয় চুক্তি আছে, একেদৰেই ইয়াতো তেনে কিছুমান চুক্তি থাকে৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
