বোমৰ ভাবুকি, ২২৫ যাত্ৰী ভৰ্তি বিমানৰ জৰুৰীকালীন অৱতৰণ মুম্বাইত
ইণ্ডিগো এয়াৰলাইন্সৰ ঘৰুৱা বিমান এখনে জৰুৰীকালীন অৱতৰণ কৰিছে। যোৱা নিশা সংঘটিত হোৱা এই ঘটনাত জৰুৰী অৱস্থাত মুম্বাইৰ ছাত্ৰপতি শিৱাজী মহাৰাজা আন্তঃৰাষ্ট্ৰীয় বিমানবন্দৰত অৱতৰণ কৰে বিমানখন।
জয়পুৰৰ পৰা মুম্বাইলৈ আহি আছিল ৬ই ৫৩২৪ নং বিমান। কিন্তু মাজ আকাশতে বিমানখনে লাভ কৰে বোম থকাৰ বাবুকি। যাৰ বাবে জৰুৰীকালীনভাৱে বিমানখন অৱতৰণ কৰা হয়। এই ভাবুকি বাৰ্তা পোৱাৰ লগে লগে পাইলটে এ টি চিৰ সৈতে যোগাযোগ কৰি বিমানখন জৰুৰীকালীন অৱতৰণ কৰে।
প্ৰট’কল অনুসৰি বিমানখনক আইছ’লেশ্যন বে’লৈ লৈ যোৱা হয়। জৰুৰীকালীন গেটৰ জৰিয়তে ক্ৰু মেম্বাৰ আৰু ২২৫ জন যাত্ৰীক উদ্ধাৰ কৰা হয়। ইয়াৰ পিছত সকলো যাত্ৰীৰে লাগেজ সমূহৰো পৰীক্ষা কৰা হয়।
বিমানখনৰ প্ৰতিটো কোণত তালাচী চলোৱা হয় যদিও সন্দেহজনক কোনো বস্তু পোৱা নাযায়। আৰক্ষীয়ে গোচৰ ৰুজু কৰি তদন্ত আৰম্ভ কৰিছে। বিমান সংস্থাটোৱে এই কথা নিশ্চিত কৰি বিমানখনত থকা সকলো লোক সুৰক্ষিত বুলি জানিবলৈ দিয়ে।
পিটিআইৰ এক প্ৰতিবেদন অনুসৰি আৰক্ষীয়ে তথ্য লাভ কৰে যে যোৱা ৭ এপ্ৰিলত জয়পুৰ বিমানবন্দৰৰ পৰা মুম্বাই অভিমুখে ইণ্ডিগ’ৰ ৬ই ৫৩২৪ বিমান উৰা মাৰিছিল। বিমানখন যাত্ৰাৰ সময়তে এজন ব্যক্তিয়ে বিমানখনৰ শৌচাগাৰত বোম সন্দৰ্ভত এখন নোট পাইছিল।
সেই টোকাটোত লিখা আছিল যে বিমানখনৰ ভিতৰত এটা বোমা আছে আৰু কেইমিনিটমানৰ ভিতৰতে বোমাটো বিস্ফোৰণ হ’ব। ইয়াৰ বাবেই মুম্বাই বিমানবন্দৰত জৰুৰীকালীন অৱস্থা ঘোষণা কৰা হয়। কটকটীয়া নিৰাপত্তাৰ মাজতে বিমানবন্দৰত অৱতৰণ কৰি বোমা আছে নেকি পৰীক্ষা কৰা হয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
