আজিৰ দিনটো কেতিয়াও পাহৰিব নোৱাৰিব বুমৰাহে, এটা অভাৰতে দি দিলে ১৮ ৰান
মেলবৰ্ণ টেষ্টৰ আজিৰ প্ৰথম দিনটো হয়তো কেতিয়াও পাহৰিব নোৱাৰিব জশপ্ৰিত বুমৰাহে। অষ্ট্ৰেলিয়াৰ ১৯ বছৰীয়া ছেম কনষ্টাছে এনেকুৱা কাম কৰিলে যিটো আগতে কোনেও কৰিব পৰা নাই।
বৰ্তমানে অষ্ট্ৰেলিয়াৰ আৰু ভাৰতৰ মাজত টেষ্ট মেছ চলি আছে। সেই টেষ্ট মেছতেই বৰ্তমানে দুয়ো দলে ১-১ ত সমতা স্থাপন কৰি আছে। এখন ভাৰতে সুন্দৰ ভাৱে জয়ী হোৱাৰ বিপৰীতে আন এখনত অষ্ট্ৰেলিয়াই বিজয় সাব্যস্ত কৰে। অষ্ট্ৰেলিয়াৰ খেলুৱৈ সকলৰ মাজত বৰ্তমানে ভাৰতৰ জশপ্ৰিত বুমৰাহ একপ্ৰকাৰৰ ধুমুহা সদৃশ।
এই শৃংখলাৰ আৰম্ভণিৰে পৰাই অষ্ট্ৰেলিয়াৰ বেটছমেনক নিজৰ বলেৰে নিয়ন্ত্ৰণত ৰাখিছে বুমৰাহে। কিন্তু চতুৰ্থ শৃংখলাৰ প্ৰথম দিনাই দেখা গ’ল এক বেলেগ দৃশ্য। বক্সিং ডে’ টেষ্টৰ জৰিয়তে কেৰিয়াৰ আৰম্ভ কৰা ১৯ বছৰীয়া ছেম কনষ্টাছে বুমৰাহৰ বলক যোগ্য প্ৰত্যুত্তৰ দিয়ে।
প্ৰথম তিনিখন টেষ্টত ২১টা উইকেট দখল কৰা জশপ্ৰিত বুমৰাহৰ বলক আজিৰ খেলত ছেম কনষ্টাছৰ বেটে কোনো সুযোগ নিদিলে। ইয়াৰ উপৰি বুমৰাহে ক্ৰিকেট কেৰিয়াৰৰ সকলোতকৈ অধিক ৰানৰ অভাৰ খেলে।
চতুৰ্থ টেষ্টৰ প্ৰথম তিনিটা অভাৰত বুমৰাহ পূৰ্বৰ দৰেই মাৰাত্মক হৈ উঠে। কিন্তু তাৰ পিছত হঠাতে গোটেই কাহিনী সলনি হৈ যায়। চতুৰ্থ অভাৰত বুমৰাহে ১৪ ৰান দিয়ে। ইয়াৰ পিছত বুমৰাহে ষষ্ঠ অভাৰত ১৮ ৰান দিয়ে। পূৰ্বে কাহানিও টেষ্ট কেৰিয়াৰত বুমৰাহে এটা অভাৰত ইমান ৰান দিয়া নাছিল।
১৮ ৰানৰ অভাৰটো বুমৰাহৰ টেষ্ট কেৰিয়াৰৰ আটাইতকৈ ব্যয়বহুল অভাৰ। ইয়াৰ পূৰ্বে ২০২০ চনত মেলবৰ্ণৰ খেলপথাৰত বুমৰাহে এটা অভাৰত ১৬ ৰান দিছিল। সেই সময়ত নাথান লায়ন আৰু জোছ হেজলউডে তেওঁৰ বিৰুদ্ধে ১৬ ৰান সংগ্ৰহ কৰিছিল। সেই বছৰতে ইংলেণ্ডৰ বিৰুদ্ধে বিশাখাপট্টনম টেষ্টত বুমৰাহে এটা অভাৰত ১৬ ৰান দিছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
