অসম লাইভ২৪ঃ ইজৰাইল-হামাছ যুদ্ধৰ মাজতেই ইহুদি ভূমিত মাৰ্কিন প্ৰেছিডেণ্ট জ’ বাইডেন। গাজাষ্ট্ৰীপৰ হাস্পতালত হোৱা বিস্ফোৰণক লৈ মুখ খুলিছে মাৰ্কিন প্ৰেছিডেণ্টে। প্ৰত্যাশিতভাৱেই ইজৰাইলৰ হৈ মাত মাতিছে বাইডেনে। ইহুদি প্ৰধানমন্ত্ৰী বেঞ্জামিন নেতানিয়াহুৰ সৈতে দ্বিপাক্ষিক বৈঠকত বহিছে আমেৰিকাৰ প্ৰেছিডেণ্ট। বুধবাৰে দুপৰীয়া উত্তৰ ইজৰাইলৰ তেল আভিভত উপস্থিত হৈছে বাইডেনৰ বিমান। নেতানিয়াহু প্ৰশাসনৰ সৈতে মিলিত হৈ বাইডেনে যুদ্ধ পৰিস্থিতি সন্দৰ্ভত বাৰ্তালাপত মিলিত হৈছে। তাৰপিছতেই সংবাদমাধ্যমৰ সন্মুখত মন্তব্য ৰাখিছে বাইডেনে। মাৰ্কিন প্ৰেছিডেণ্টে ইজৰাইলৰ ভূমিৰ পৰা কয়, ‘গাজাৰ হাস্পতালত হঠাৎ হোৱা এই বিস্ফোৰণৰ ঘটনাত আমি শোকাহত হোৱাৰ লগতে ক্ষুদ্ধ হৈ পৰিছো। যিমানদুৰ মই বুজিছো যে ইজৰাইলে এই কাম কৰা নাই। এই কামৰ আঁৰত অন্য শক্তি আছে।’
ইয়াৰপাছতেই বাইডেনে ইজৰাইলী মূল্যবোধৰ প্ৰসংগও টানি আনিছে মাৰ্কিন প্ৰেছিডেণ্টে। দুই দেশৰ গণতন্ত্ৰৰ ওপৰত জোৰ দিছে বাইডেনে। সমগ্ৰ বিশ্বই এতিয়া ইজৰাইলৰ ওপৰত দৃষ্টি ৰাখিছে। আমেৰিকা আৰু অন্যান্য গণতান্ত্ৰিক দেশসমূহৰ দৰেই ইজৰাইলৰো মুল্যবোধ আৰু আদৰ্শ আছে। নেতানিয়াহুৰ সৈতে হোৱা বৈঠকৰ পাছতেই এই মন্তব্য কৰিছে বাইডেনে।
মঙলবাৰে নিশা গাজাৰ আল-আহলি হাস্পতালত এক বৃহৎ বিস্ফোৰণৰ ঘটনা সংঘটিত হৈছে। এই বিস্ফোৰণত শিশু আৰু মহিলাসহ মুঠ ৫০০ গৰাকী লোকৰ মৃত্যু হৈছে। নিহতৰ সংখ্যা আৰু বৃদ্ধি হোৱাৰ সম্ভাৱনা আছে বুলি জনাইছে উদ্ধাৰকাৰী দলে। বিস্ফোৰণৰ সময়ৰ ভিডিঅ’ ইতিমধ্যে সামাজিক মাধ্যমত ভাইৰেল। পেলেষ্টাইনৰ চৰকাৰ আৰু হামাছৰ দাবী যে এই হাস্পতালখনৰ ওপৰত ইজৰাইলী সেনাই এয়াৰষ্ট্ৰাইক চলাইছে ইজৰাইলী বায়ুসেনাই। গাজাক সন্ত্ৰাসমুক্ত কৰিবলৈ বিগত কেইবাদিন ধৰি এয়াৰষ্ট্ৰাইক চলাই আছে ইজৰাইলী সেনাই। এই এয়াৰষ্ট্ৰাইকৰ বাবেই বহুলোকে আশ্ৰয় হৈছিল হাস্পতালত। সেয়ে ইচ্ছাকৃতভাৱেই সেই হাস্পতাল উৰোৱাই দিছে ইজৰাইলে বুলি দাবী কৰিছে পেলেষ্টাইনে।
এই অভিযোগক কিন্তু সম্পূৰ্ণৰূপে অস্বীকাৰ কৰিছে ইজৰাইলে। এক্স হেণ্ডেলত দিয়া পোষ্টত ইহুদি সেনাৰ তৰফৰ পৰা কোৱা হৈছে যে এই হাস্পতালৰ ওপৰত ইহুদি সেনাই এয়াৰষ্ট্ৰাইক চলোৱা নাই। হামাছৰ গুপ্তঘাটিতহে কেৱল ইহুদি সেনাই আক্ৰমণ চলাইছে। ইয়াৰ বাহিৰে আন কোনো স্থানতেই অভিযান চলোৱা নাই ইহুদি সেনাই। ইজৰাইলক বদনাম কৰিবৰ বাবেই কোনো দুষ্কৃতিকাৰীয়ে এই কাম কৰিছে বুলিও জনাইছে ইহুদি সেনাই। গাজাষ্ট্ৰীপত হাস্পতালত হোৱা বিস্ফোৰণক লৈ মুখ খুলিছে আমাৰ দেশৰ প্ৰধানমন্ত্ৰী নৰেন্দ্ৰ মোদীয়েও। এই সমগ্ৰ ঘটনাক লৈ তেওঁ স্তম্ভিত হোৱা বুলি প্ৰকাশ কৰিছে। এই ঘটনাত জড়িতসকলে শাস্তি পাওক বুলিও প্ৰকাশ কৰিছে প্রধানমন্ত্ৰী নৰেন্দ্ৰ মোদীয়ে। আমেৰিকাৰ তৰফৰ পৰা ইজৰাইলক অস্ত্ৰ, অৰ্থৰ সাহায্য দিয়াৰো আশ্বাস দিয়া হৈছে। ভূমধ্য সাগৰেৰে মাৰ্কিন যুদ্ধ জাহাজ মোতায়েন কৰা হৈছে বুলিও এক সূত্ৰই প্ৰকাশ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
