সকলোকে সদায় হাঁহিৰে জীপাল কৰি ৰখা দেশৰ আটাইতকৈ জনপ্ৰিয় কমেডিয়ান কপিল শৰ্মা খঙত অগ্নিশৰ্মা হৈ উঠিছে। তীব্ৰ অসন্তুষ্টিত ক্ষোভত ফাটি পৰিছে কপিল শৰ্মা। সামাজিক মাধ্যম ‘এক্স’ত কৰি গৈছে ইটোৰ পাছত সিটো ক্ষোভভৰা পোষ্ট। বিমানৰ অস্বাভাৱিক বিলম্বৰ বাবে ক্ৰোধান্বিত হৈছে কমেডিয়ানগৰাকী।
বুধবাৰে নিশা কপিল শৰ্মাই ভ্ৰমণ কৰিবলগীয়া বিমানখনৰ উৰণত যথেষ্ট বিলম্ব ঘটে। ইয়াৰ পাছতে ইণ্ডিগ’ এয়াৰলাইনছৰ ওপৰত গৰজি উঠে কপিল শৰ্মা। কমেডিয়ান তথা অভিনেতাগৰাকীয়ে উল্লেখ কৰা অনুসৰি অন্য যাত্ৰীসকলৰ সৈতে তেওঁ প্ৰায় এঘণ্টা সময় ট্ৰেনজিট বাছত আৱদ্ধ হৈ ৰয়। কপিল শৰ্মাৰ অভিযোগ অনুসৰি বিমানৰ উৰণক লৈ কোনোধৰণৰ তথ্য তেওঁলোকক দিয়া হোৱা নাছিল। বৰঞ্চ বিমানখনৰ পাইলট গৰাকী ট্ৰেফিক জামত আৱদ্ধ হৈ থকা বুলিহে বাৰম্বাৰ জনোৱা হৈছিল।
ইণ্ডিগ’ এয়াৰলাইনছক লক্ষ্য কৰি কপিল শৰ্মাই সামাজিক মাধ্যম ‘এক্স’ত লিখে যে প্ৰথমতে তেওঁলোকক বাছত ৫০ মিনিট অপেক্ষা কৰোৱা হয়। লক্ষ্যণীয়ভাবে কৰ্তৃপক্ষই বাৰে বাৰে পাইলট গৰাকী ট্ৰেফিক জামত আৱদ্ধ হৈ থকা বুলি জনায়। নিশা ৮ বজাতে উৰা মাৰিবলগা বিমান ৯:২০ বজালৈ উৰিবলৈ সক্ষম নোহোৱা বাবে যথেষ্ট অসন্তুষ্ট হোৱা দেখা যায় কপিল শৰ্মাক।
ইয়াৰ পাছত কপিলে পুনৰ ‘এক্স’ত এক পোষ্টত লিখে যে তেওঁলোকক বিমানখনৰ পৰা নমাই আনে আৰু অন্য এখন বিমানেৰে লৈ যোৱাৰ কথা কয়। কিন্তু ইয়াৰ বাবে যাত্ৰীসকল পুনৰ টাৰ্মিনেললৈ ঘূৰি যাব লাগিব আৰু ইয়াক লৈও ইণ্ডিগ’ এয়াৰলাইনছৰ ওপৰত খৰ্গহস্থ হয় জনপ্ৰিয় কমেডিয়ান কপিল শৰ্মা।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
