দেশৰ জনসংখ্যা প্ৰায় ডেৰশ কোটিয়েই হ’ল যদিও আজিও যৌনস্বাস্থ্যক লৈ কথা ক’বলৈ নাকত লাজে ধৰে প্ৰায়সংখ্যকৰেই৷ আৰু সেই লাজৰ বাবেই আজিও বহু লোকে বিভিন্ন যৌন সমস্যাত ভূগি আছে৷ তেনে এক সমস্যা হৈছে প্ৰিমেচিউৰ ইজাকুলেছন বা অকাল বীৰ্যপাত৷
প্ৰিমেচিওৰ ইজাকুলেছন বা অকাল বীৰ্যপাত এনে এক অৱস্থা য’ত যৌন মিলনৰ সময়ত পুৰুষাংগ যোনিত প্ৰৱেশৰ পূৰ্বে অথৱা প্ৰৱেশৰ কম সময়ৰ ভিতৰতেই (১ৰ পৰা ৩) মিনিটৰ ভিতৰত) সামান্য যৌন উত্তেজনাতেই বীৰ্যস্খলন ঘটে৷
এই দ্ৰুত বীৰ্যপাতৰ ওপৰত ব্যক্তিৰ নিয়ন্ত্ৰণ খুবেই কম বা একেবাৰেই নিয়ন্ত্ৰণ নাই৷ ইয়াৰ ফলত সংশ্লিষ্ট ব্যক্তিয়ে নিজে আৰু তেওঁৰ সংগীও যৌন অতৃপ্তিত ভূগিব পাৰে, যি পৰবৰ্তীকালত মানসিক চাপ, উদ্বেগ, হতাশা আৰু যৌনমিলন এৰাই চলাৰ দৰে সমস্যাৰ সৃষ্টি কৰে৷
প্ৰিমেচিউৰ ইজাকুলেছন কিয় হয়?
প্ৰিমেচিউৰ ইজাকুলেছনৰ নিৰ্দিষ্ট কাৰণ সকলো সময়তে পৰিষ্কাৰ নহলেও এটা সাধাৰণত শাৰীৰিক আৰু মনস্তাত্ত্বিক কাৰণৰ সমন্বয়ত ঘটে৷ তাৰভিতৰত আছে-
উদ্বেগঃ যৌন কৰ্মক্ষমতাক লৈ অতিৰিক্ত চিন্তা বা ব্যৰ্থতাৰ ভয়৷ যৌনমিলনৰ আৰম্ভণিতে অতিৰিক্ত উত্তেজিত হৈ পৰাৰ কাৰণেও এনে হ’ব পাৰে৷
মানসিক চাপঃ জীৱনৰ অন্যান্য ক্ষেত্ৰৰ চাপে যৌন জীৱনত প্ৰভাৱ পেলাব পাৰে৷
সম্পৰ্কৰ সমস্যাঃ সংগীৰ সৈতে বুজাপৰাৰ অভাৱ বা মানসিক দূৰত্ব৷
ডিপ্ৰেছনঃ বিষন্নতাই যৌন ইচ্ছাৰ ওপৰিও বীৰ্যপাত নিয়ন্ত্ৰণতো নেতিবাচক প্ৰভাৱ পেলাব পাৰে৷
হৰমনৰ ভাৰসাম্যহীনতাঃ টেষ্টোষ্টেৰণ বা থাইৰয়েড হৰমনৰ অস্বাভাৱিক মাত্ৰা প্ৰিমেচিউৰ ইজাকুলেছনৰ কাৰণ হব পাৰে৷
নিউৰোট্ৰান্সমিটাৰৰ সমস্যাঃ মস্তিষ্কই যি ৰাসায়নিক পদাৰ্থই সংবেদন বহন কৰে তাক নিউৰোট্ৰান্সমিটাৰ বুলি কোৱা হয়৷ নিউৰোট্ৰান্সমিটাৰত চেৰোটোনিনৰ মাত্ৰা কম থাকিলে দ্ৰুত বীৰ্যপাত হব পাৰে৷
প্ৰষ্টেট বা মূত্ৰনলীত সংক্ৰমনঃ প্ৰোষ্টাটাইটিছ বা ইউৰেথ্ৰাইটিছৰ দৰে সমস্যা৷ লিংগৰ অগ্ৰভাগ অতিৰিক্ত সংবেদনশীল হলেও এই সমস্যা হব পাৰে৷
অন্যান্য শাৰীৰিক অসুস্থতাঃ যেনে স্নায়ুৰোগ বা মেৰুদণ্ডৰ আঘাত, ইৰেকটাইল ডিছফাংছন প্ৰভৃতিৰ কাৰণেও এনে হব পাৰে৷
কেনেকৈ প্ৰিমেছিউৰ ইজাকুলেছন প্ৰতিৰোধ বা নিয়ন্ত্ৰণ কৰিব পাৰি?
ষ্টাৰ্ট ষ্টপ পদ্ধতিঃ এই পদ্ধতিত যৌন উত্তেজনা চৰম পৰ্যায়ত পোৱাৰ ঠিক পূৰ্বে যৌন কাৰ্যকলাপ ৰখাই দিয়ক৷ বীৰ্যপাতৰ ইচ্ছা কমি যোৱাৰ পাছত আকৌ কাৰ্যকলাপ আৰম্ভ কৰক৷ এই কাম পুনৰাবৃত্তি কৰিব৷
স্কুইজ পদ্ধতিঃ এই পদ্ধতিত বীৰ্যপাতৰ ইচ্ছা জাগিলে লিংগৰ অগ্ৰভাগ কেই ছেকেণ্ডৰ বাবে ধৰি ৰাখক৷ বীৰ্যপাতৰ ইচ্ছা কমি নোযোৱা পৰ্যন্ত এয়া কৰিব৷
কেগেল ব্যায়ামঃ পেলভিক ফ্লোৰ পেশী যি পেশীয়ে প্ৰস্ৰাৱ আৰু বীৰ্যপাত নিয়ন্ত্ৰণত সহায় কৰে৷ নিয়মিত সংকোচন আৰু প্ৰসাৰণৰ মাধ্যমেৰে শক্তিশালী কৰিলে বীৰ্যপাত নিয়ন্ত্ৰণত সহায়ক হয়৷
মানসিক চিকিৎসা বা কাউন্সেলিংঃ মনোবিদ বা কাউন্সেলাৰৰ সৈতে উদ্বেগ, মানসিক চাপ, অপৰাধবোধ বা সম্পৰ্কৰ সমস্যাসমূহ আলোচনা কৰক৷ কগনিটিভ বিহেভিৱেল থেৰাপি এই ক্ষেত্ৰত সহায়ক হব পাৰে৷ সংগীৰ সৈতে বুজাপৰা খুবেই জৰুৰী৷
সংকোচ ত্যাগ কৰি এজন চিকিৎসক বা যৌন স্বাস্থ্য বিশেষজ্ঞৰ পৰামৰ্শ লোৱা অত্যন্ত জৰুৰী৷ তেওঁ সঠিক কাৰণ নিৰ্ণয় কৰি উপযুক্ত চিকিৎসাৰ পৰামৰ্শ দিব পাৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
