টেষ্ট ক্ৰিকেটৰ ইতিহাসৰ আটাইতকৈ কমবয়সীয়া শীৰ্ষ ৫ খেলুৱৈ কোন কোন! তালিকাত এগৰাকী ভাৰতীয় কিম্বদন্তী
টেষ্ট ক্ৰিকেট মানেই ধৈৰ্য আৰু পুৰঠ তথা অভিজ্ঞতা সম্পন্ন খেলুৱৈৰ খেল। যিমানেই ধৈৰ্য সহকাৰে ফিল্ডত টিকি থাকি উইকেট ৰক্ষা কৰি ৰান কৰিব পাৰিব সিমানেই দলৰ বাবে ভাল। পাছে এইদৰে ধৈৰ্য অনাটো এগৰাকী কম বয়সীয়া খেলুৱৈৰ বাবে কিঠু কঠিন।
ডেকা বয়সত উগ্ৰ স্বভাৱে কিছু অধৈৰ্য কৰি তোলে খেলুৱৈ সকলক। সেয়ে টেষ্ট ক্ৰিকেটত সদায়ে অভিজ্ঞতাসম্পন্ন খেলুৱৈক স্থান দিয়াটো নিশ্চিত কৰে দলীয় মেনেজমেণ্টে।
কিন্তু ইয়াৰ পাছতো টেষ্ট ক্ৰিকেটত কেইগৰাকীমান এনে খেলুৱৈ আছে, যিয়ে অতি কম বয়সতে টেষ্ট ক্ৰিকেটত অভিষেক ঘটাইছিল। সেই শীৰ্ষ ৫ খেলুৱৈৰ ভিতৰত এগৰাকী ভাৰতীয় কিম্বদন্তী খেলুৱৈ। সেই ৫ গৰাকী অতি কমবয়সীয়া খেলুৱৈ হৈছে-
হাছান ৰাজা- পাকিস্তান
কম বয়সতে টেষ্ট ক্ৰিকেট খেলাৰ অভিলেখ পাকিস্তানৰ হাছান ৰাজাৰ নামত বৰ্তমানেও অক্ষত। হাছান ৰাজাই মাত্ৰ ১৪ বছৰ ২২৭ দিন বয়সতে পাকিস্তানৰ হৈ টেষ্টত অভিষেক ঘটাইছিল। ১৯৯৬ চনৰ ২৪ অক্টোবৰত ফৈছালাবাদত জিম্বাবুৱেৰ বিৰুদ্ধে খেলা মেচত হাছান ৰাজাই অভিষেক ঘটাইছিল।
মুস্তাক মহম্মদ- পাকিস্তান
এই তালিকাৰ দ্বিতীয় নামটোও হৈছে পাকিস্তানৰে খেলুৱৈৰ। কিংবদন্তি ক্ৰিকেটাৰ মুস্তাক মহম্মদে ১৯৫৯ চনৰ ২৬ মাৰ্চত লাহোৰত ৱেষ্ট ইণ্ডিজৰ বিৰুদ্ধে ১৫ বছৰ ১২৪ দিন বয়সত প্ৰথম টেষ্ট মেচ খেলিছিল। পিছলৈ পাকিস্তানৰ সফল অধিনায়কৰ ভিতৰতো তেওঁক গণ্য কৰা হয় আৰু প্ৰশিক্ষক হিচাপেও পাছলৈ গুৰুত্বপূৰ্ণ অৱদান আগবঢ়ায়।
মহম্মদ শ্বৰীফ- বাংলাদেশ
তিনি নম্বৰ স্থানত আছে বাংলাদেশৰ মহম্মদ শ্বৰীফে, যিয়ে ১৫ বছৰ ১২৮ দিন বয়সত জিম্বাবুৱেৰ বিৰুদ্ধে ২০০১ চনৰ ১৯ এপ্ৰিলত টেষ্ট খেলত অভিষেক ঘটাইছিল।
আকিব জাভেদ- পাকিস্তান
চতুৰ্থ স্থানত পুনৰ পাকিস্তানী খেলুৱৈ। আকিব জাভেদে ১৯৮৯ চনৰ ১০ ফেব্ৰুৱাৰীত ৱেলিংটনত নিউজিলেণ্ডৰ বিৰুদ্ধে ১৬ বছৰ ১৮৯ দিন বয়সত টেষ্ট কেৰিয়াৰ আৰম্ভ কৰিছিল। পাছলৈ জাভেদ পাকিস্তানৰ দ্ৰুত বলিঙৰ পৰিচয় হৈ পৰে।
শচীন তেণ্ডুলকাৰ- ভাৰত
এই তালিকাৰ পঞ্চম স্থানত আছে ভাৰতৰ সৰ্বকালৰ অন্যতম তথা ক্ৰিকেট জগতৰ ভগৱান আখ্যা পোৱা শচীন টেণ্ডুলকাৰ। ১৯৮৯ চনৰ ১৫ নৱেম্বৰত কৰাচীত পাকিস্তানৰ বিৰুদ্ধে মাত্ৰ ১৬ বছৰ ২০৫ দিন বয়সতে টেষ্ট ক্ৰিকেটত অভিষেক ঘটাইছিল শচীনে। সেই মেচখনত শচীনে ৱাছিম আক্ৰাম আৰু ৱাকাৰ ইউনিছৰ দৰে তীব্ৰ বলাৰৰ মুখামুখি হৈছিল আৰু কোনো ভয় নোহোৱাকৈ উৎকৃষ্ট খেল প্ৰদৰ্শন কৰিছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
