অতিকে শোকাৱহ, ঘৰৰ বাহিৰত শুই আছিল পৰিয়াল, তীব্ৰ বেগী বালি ভৰ্তি ট্ৰাক দেৱাল ভাঙি বাগৰি ৮ নিহত
পুৱাই এক অতিকে শোকাৱহ ঘটনা পোহৰলৈ আহিছে। গৰমৰ বাবে ঘৰৰ বাহিৰত শুই আছিল এটা পৰিয়াল। পাছে নিয়তিয়ে ভাগ্যত লিখি থৈছে অন্য এক কাহিনী। শুই থকা অৱস্থাতে প্ৰাণ হেৰুৱালে পৰিয়ালটোৰ ৮জনকৈ লোকে।
এখন তীব্ৰ বেগী বালি ভৰ্তি ট্ৰাক পৰিয়ালটোৰ ওপৰত বাগৰি পৰাত ঠাইতে নিহয় হয় পৰিয়ালটোৰ ৮ জনকৈ লোক। যি ঘটনাই এতিয়া শোকৰ ছাঁ পেলাইছে সমগ্ৰ অঞ্চলটোত।
উত্তৰ প্ৰদেশৰ হৰদয় জিলাত বুধবাৰে পুৱতি নিশা সংঘটিত হয় এই বৃহৎ পথ দুৰ্ঘটনাটো। মাল্লাৱান থানা এলেকাত ৰাজপথৰ কাষতে থকা এঘৰ লোকে ঘৰৰ বাহিৰত শুই থকা অৱস্থাত তেঁওলোকৰ ওপৰত বালিৰে ভৰা এখন ট্ৰাক উলটি যায়। এই মৰ্মান্তিক দুৰ্ঘটনাত একেটা পৰিয়ালৰ ৮ জন লোকৰ মৃত্যু হোৱাৰ বিপৰীতে এগৰাকী ছোৱালী আহত হয়।
ঘটনাৰ বিষয়ে জানিব পৰা লগে লগে আৰক্ষীয়ে সেই স্থানত উপস্থিত হৈ উদ্ধাৰ অভিযান আৰম্ভ কৰে। মৃতদেহ কেইটা উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে আৰক্ষীয়ে। জেচিবি আৰু হাইড্ৰাৰ সহায়ত আৰক্ষীয়ে ট্ৰাকৰ তলত বালিত পোত খাই থকা মৃতদেহবোৰ উলিয়াই আনে।
নিশা আনন্দৰে একেলগে খাই বৈ ঘৰৰ বাহিৰত শুই পৰিছিল পৰিয়ালটো। হঠাৎ গভীৰ নিশা অতিমাত্ৰা বোজাই কৰা বালিৰে ভৰা এখন ট্ৰাক নিয়ন্ত্ৰণৰ বাহিৰলৈ গৈ ঘৰৰ বাহিৰত পথৰ দাঁতিত শুই থকা পৰিয়ালটোৰ ওপৰত বাগৰি পৰে। যাৰ ফলত একেটা পৰিয়ালৰ আঠজন লোকৰ মৃত্যু হয়। বৰ্তমানে প্ৰাণ ৰক্ষা পৰা কন্যা শিশুটি চিকিৎসকৰ তত্বাবধানত।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
