গুজৰাটৰ মেঘানিনগৰত বিমান দুৰ্ঘটনা৷ আহমেদাবাদ বিমানবন্দৰৰ নিচেই কাষতেই ভাঙি পৰিল এয়াৰ ইণ্ডিয়াৰ যাত্ৰীবাহী বিমান৷ দেশৰ অসামৰিক বিমান পৰিবহন নিয়ন্ত্ৰক সংস্থা ডি জি চি এ জনাইছে যে বিমানখনত মুঠ ২৪২ জন যাত্ৰী আছিল৷ ইয়াৰে ২৩২ জন যাত্ৰী আৰু ১০ গৰাকী ত্ৰুৰ সদস্য৷ বিমানৰ দুই পাইলটৰ নাম আছিল কেপ্টেইন সুমিত সবৰৱাল আৰু ফাৰ্ষ্ট অফিচাৰ ক্লাইভ কুন্দৰ৷ বোয়িং সংস্থাৰ বি ৭৮৭ ড্ৰিমলাইনাৰ বিমান আছিল এইখন৷ এই ধৰণৰ এখন বিমানত সৰ্বোচ্চ ২৯০ৰ পৰা ৩০০ গৰাকী যাত্ৰী থাকিব পাৰে৷
এ আই ১৭১ নম্বৰৰ এই বিমানখন দুপৰীয়া ১ বাজি ১০ মিনিটত আহমেদাবাদ বিমানবন্দৰৰ পৰা উৰা মাৰিছিল৷ উৰণৰ কিছু ক্ষণৰ মাজতেই লোকালয়ৰ মাজতেই বিমানখন ভাঙি পৰে৷ ভাঙি পৰাৰ পাছতেই বিমানখনত জুই লাগে৷ ঘটনাস্থললৈ লগে লগেই ৰাওনা হয় উদ্ধাৰকাৰী দল আৰু অগ্নিনিৰ্বাপক বাহিনীৰ দল৷ আহতসকলক উদ্ধাৰ কৰি স্থানীয় ছিভিল হাস্পতাললৈ লৈ যোৱা হৈছে৷ কিন্তু কেনেকৈ এই বিমান দুৰ্ঘটনাত পতিত হ’ল এতিয়াও সেই কথা স্পষ্ট হোৱা নাই৷
ইতিমধ্যেই দুৰ্ঘটনাস্থলৰ আশেপাশে থকা সমস্ত ৰাস্তা বন্ধ কৰি দিয়া হৈছে৷ চলিছে উদ্ধাৰকাৰ্যও৷ স্থানীয় সূত্ৰৰ খবৰ অনুসৰি বিমানখন উৰাৰ কিছু ক্ষণৰ ভিতৰতেই বিমানখন ভাঙি পৰে৷ ফলত বিমানখন বেছি উচ্চতালৈ উঠিব পৰা নাছিল৷ ফলত ক্ষয়ক্ষতিৰ পৰিমাণো আৰু বৃদ্ধি পোৱাৰ আশংকা কৰিছে উদ্ধাৰকাৰী দলে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
