অসম লাইভ ২৪ঃ ব্যাপক জল্পনা-কল্পনাৰ অৱসান ঘটাই অসম প্ৰদেশ কমিটীৰ নীতি-নিৰ্ধাৰণ কমিটীয়ে গ্ৰহণ কৰিলে aiudfক মহাজোঁটৰ পৰা বাহিৰ কৰাৰ সিদ্ধান্ত৷ অচিৰেই aiccলৈ এই সন্দৰ্ভত পত্ৰ প্ৰেৰণ কৰিব apccয়ে৷ প্ৰদেশ কংগ্ৰেছৰ এই সিদ্ধান্তই ৰাজ্যৰ ৰাজনীতিৰ পট পৰিৱৰ্তনৰ ইংগিত বহন কৰিছে৷ বিগত বিধানসভা নিৰ্বাচনৰ পূৰ্বে সাম্প্ৰদায়িক শক্তি বিজেপিক ৰুধিবলৈ কংগ্ৰেছৰ নেতৃত্বত গঠন হৈছিল মহাজোঁট৷ মহাজোঁটত আছিল কংগ্ৰেছ, aiudf, bpf, বাঁও শিবিৰ, ৰাষ্ট্ৰীয় জনতা দল আৰু আঞ্চলিক গণমৰ্চা৷ কিন্তু কংগ্ৰেছে অনুভৱ কৰিছে যে ধৰ্মীয় মেৰুকৰণ ৰোধ কৰিবলৈ গঠন কৰা মহাজোঁটত aiudfক অন্তৰ্ভুক্ত কৰাৰ বাবে বিজেপি ধৰ্মীয় মেৰুকৰণত সফলহে হ’ল৷ আনহাতে, aiudfৰ একাংশ নেতাৰ মুখ্যমন্ত্ৰী আৰু চৰকাৰপ্ৰীতিত বিতুষ্ট কংগ্ৰেছ৷ ইপিনে, apcc-এ মহাজোঁট ভংগৰ সিদ্ধান্ত গ্ৰহণ কৰাৰ পূৰ্বে ধুবুৰীত aiudfৰ সাধাৰণ সম্পাদক আমিনুল ইছলামে সদৰী কৰিছিল যে মহাজোঁটৰ প্ৰয়োজনীয়তা আছিল, কিন্তু যদি ভংগ হয় তাক লৈ চিন্তিত নহয় aiudf৷ উপ নিৰ্বাচনত গোসাঁইগাঁও, ভৱানীপুৰ, তামুলপুৰত নিজাববীয়াকৈ প্ৰাৰ্থী প্ৰক্ষেপ কৰিব aiudf-এ৷ মহাজোঁটৰ পৰা যে কেৱল aiudf-এ আঁতৰিব এনে নহয়, cpi(m)য়েও প্ৰদান কৰিছে এক গুৰুত্বপূৰ্ণ মন্তব্য৷ ‘cpi(m) মহাজোঁটৰ দল নহয়, মহাজোঁটত cpi(m)-এ আসন বুজাবুজিহে কৰিছিল’— সংবাদমেলত সদৰী চিপিআই(এম) নেতৃত্বৰ৷ যদি কথাবোৰ এনে হয় তেনেহ’লে মহাজোঁট প্ৰায় ভংগৰ পথত আৰু এই ক্ষেত্ৰত সফল হ’ল বিজেপি চৰকাৰৰ কূট-কৌশল৷ মহাজোঁট ভাঙিবলৈ বিজেপিয়ে অখিল গগৈক ব্যৱহাৰ কৰাৰ অভিযোগ aiudfৰ সাধাৰণ সম্পাদকগৰাকীৰ৷ কথাবোৰ কিন্তু কেৱল যে মহাজোঁটতে সীমাবদ্ধ হৈ থাকিব এনেও নহয়৷ ৰাজ্যৰ ৰাজনৈতিক সমীকৰণ পৰিৱৰ্তনৰ দিশে৷ মিত্ৰ শত্ৰু হ’ব, শত্ৰু মিত্ৰ হ’ব৷ আনফালে btrতো বলিছে পৰিৱৰ্তনৰ বা৷ বিধানসভা নিৰ্বাচনৰ পূৰ্বে বিজেপি মিত্ৰজোঁটৰ পৰা বাহিৰ হৈ মহাজোঁটৰ অংশীদাৰ হৈছিল হাগ্ৰামা মহিলাৰী নেতৃত্বাধীন bpf৷ আনহাতে, bpfতকৈ কম আসন পালেও upplৰ নেতৃত্বত নৱ কুমাৰ শৰণীয়াৰ গণ সুৰক্ষা পাৰ্টী আৰু বিজেপিৰ সমৰ্থনত btcত হৈছিল upplৰ চৰকাৰ৷ প্ৰমোদ বড়ো হৈছিল btcৰ cem৷ কিন্তু ক্ষমতাহীন অৱস্থাই আমুৱাইছে হাগ্ৰামা মহিলাৰীক৷ মুখ্যমন্ত্ৰী, বিজেপি চৰকাৰৰ প্ৰশংসাত পঞ্চমুখ হাগ্ৰামা মহিলাৰী৷ দৰাচলতে হাগ্ৰামা মহিলাৰীয়ে নিজেই কৈছিল যে তেওঁৰ এটাই ফৰ্মূলা চৰকাৰ য’ত তেওঁ ত’ত৷ সেইবাবে পুনৰ বিজেপিৰ ওচৰ চাপিবলৈ হাগ্ৰামাই চলাইছে আপ্ৰাণ চেষ্টা৷ হাগ্ৰামাই বিজেপিৰ ওচৰ চপাত দুৰু দুৰু বুকু কঁপিছে upplৰ প্ৰমোদ বড়োৰ৷ কেতিয়া চকী লৰে, কেতিয়া কি হয় কোনো নিশ্চয়তা নাই৷ আনহাতে, গণ সুৰক্ষা পাৰ্টী-কংগ্ৰেছৰ মাজতো আলোচনা৷ আলোচনা হৈছে নৱ কুমাৰ শৰণীয়া, ভূপেন বৰাৰ৷ নৱ কুমাৰ শৰণীয়াই বিজেপি-upplৰ সংগ ত্যাগ কৰি কংগ্ৰেছৰ হাতত হাত মিলোৱাৰ সম্ভাৱনাও প্ৰকট হৈ উঠিছে৷ আনহাতে, ৰাষ্ট্ৰীয় প্ৰেক্ষাপটত দেখা গৈছে অখিল গগৈৰ কুচ-কাৱাজ৷ ‘ফেডাৰেল ফ্ৰণ্ট’ত অংশগ্ৰহণ কৰিছে ৰাইজৰ দলে৷ ‘ফেডাৰেল ফ্ৰণ্ট’ আঞ্চলিক দলসমূহৰ এখন উমৈহতীয়া মঞ্চ৷ নেতৃত্বত তৃণমূল কংগ্ৰেছ প্রধান মমতা বেনাৰ্জী৷ ‘ফেডাৰেল ফ্ৰণ্ট’ৰ লক্ষ্য এটাই আঞ্চলিক দলসমূহক একত্ৰিত কৰি সাম্প্ৰদায়িক বিজেপিক প্ৰতিহত কৰা৷ ‘ফেডাৰেল ফ্ৰণ্ট’ত আছে অৰবিন্দ কেজৰিৱাল, কে চন্দ্ৰশেখৰ ৰাও আদি নেতাও৷ rjd, শিৱসেনা আদিৰে অখিল গগৈৰ আলোচনা৷ দাক্ষিণ্যতাৰ কেইবাটাও দলো ‘ফেডাৰেল ফ্ৰণ্ট’ৰ অন্তৰ্ভুক্ত হোৱাৰ সম্ভাৱনা আছে৷ ‘ফেডাৰেল ফ্ৰণ্ট’ত নাথাকিলেও কংগ্ৰেছক লগত লৈ আগবঢ়াৰ চিন্তা ‘ফেডাৰেল ফ্ৰণ্ট’ৰ৷ কূট-কৌশল ৰচনাত পলিটিকেল ষ্ট্ৰেটেজিষ্ট প্ৰশান্ত কিশোৰ৷ পিছে, ৰাজ্যৰ সাম্প্ৰতিক ৰাজনীতিৰ ৰহস্যময় চৰিত্ৰ অখিল গগৈ৷ এফালে, মুখ্যমন্ত্ৰী হিমন্ত বিশ্ব শৰ্মাৰ কথা মতে অখিল গগৈয়ে বিধানসভাৰ বাহিৰে-ভিতৰে কাম কৰাৰ অভিযোগ৷ আনফালে, বিজেপিৰ বিৰুদ্ধে মন্তব্য৷ কংগ্ৰেছেৰে আলোচনাত বহিও কংগ্ৰেছ তথা কংগ্ৰেছীৰ বিৰুদ্ধেও মন্তব্য৷ aiudfৰ বিৰুদ্ধে মন্তব্যতো আছেই৷ এনে পৰিস্থিতিত অখিল গগৈয়ে ক’ত কি ঘটায় সেয়াও পিছে ৰাজনৈতিক মহলত চৰ্চাৰ বিষয় হৈ পৰিছে৷ সেয়া যি কি নহওক উপ-নিৰ্বাচনৰ প্ৰাকমুহূৰ্তত মহাজোঁটৰ পৰা AIUDFক বাদ দিয়া প্ৰদেশ কংগ্ৰেছৰ প্ৰস্তাৱে বিশেষ তাৎপৰ্য বহন কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
