ফিফা বিশ্বকাপ ২০২৬ত পুনৰ এবাৰ নিজৰ শক্তিৰ পৰিচয় দিলে ফ্ৰান্সে। বষ্টন ষ্টেডিয়ামত অনুষ্ঠিত কোৱাৰ্টাৰ ফাইনেলত শক্তিশালী ম’ৰক্কোক ২-০ গ’লত পৰাস্ত কৰি ফ্ৰান্সে পুনৰবাৰ ছেমিফাইনেলত নিজৰ স্থান নিশ্চিত কৰিলে। টুৰ্নামেণ্টখনৰ আৰম্ভণিৰে পৰা উজ্জীৱিত প্ৰদৰ্শন আগবঢ়াই সমালোচক আৰু অনুৰাগীৰ দৃষ্টি আকৰ্ষণ কৰা মৰক্কোৱে কিন্তু আজি এমবাপে-ডেম্বেলেৰ যুগলবন্দীৰ আক্ৰমণত শিৰনত কৰিবলৈ বাধ্য হয়। মেচখনৰ আৰম্ভণিৰে পৰাই ফ্ৰান্সৰ সন্মুখত মৰক্কোৰ প্ৰদৰ্শন আছিল স্তিমিত, যাৰ পৰিণতিত ২-০ গলৰ ব্যৱধানত পৰাস্ত হৈ নৰ্থ আফ্ৰিকান দেশখনে সামৰিলে বিশ্বকাপৰ সপোনৰ অভিযান। অৱশ্যে প্ৰথমাৰ্ধত ম’ৰক্কোৰ Goalkeeper ইয়াছিন বুনৌৱে এমবাপেৰ এটা পেনাল্টি শ্বটসহ কেইবাটাও টাৰ্গেটক অবিশ্বাস্যভাৱে ৰক্ষা কৰি দলক আশাৰ পোহৰ দেখুৱাইছিল, কিন্তু দ্বিতীয়াৰ্ধত ফ্ৰান্সৰ আক্ৰমণৰ সন্মুখত সেই প্ৰতিৰোধ বেছি সময় টিকি নাথাকিল।
এমবাপে-ডেম্বেলেৰ যুগলবন্দীত দিশহাৰা মৰক্কো
মেচখনৰ ৬০ মিনিটত এমবাপেৰ এটা দুৰ্দান্ত শ্বট মৰোক্কোৰ গলপোষ্টৰ ভিতৰত প্ৰৱেশ কৰাৰ লগে লগেই ফৰাচী অনুৰাগীৰ হৰ্ষোল্লাসত কঁপি উঠে বষ্টন ষ্টেডিয়াম। ডেছিৰে ডুৱেৰ পৰা পোৱা নিখুঁত পাছৰ সুবিধা লৈ কিলিয়ান এমবাপেই পেনাল্টি বক্সৰ একোণৰ পৰা মৰক্কোৰ তিনিজন ডিফেণ্ডাৰে সৃষ্টি কৰা দেৱালৰ মাজেৰে গলপোষ্টৰ নেটলৈ মাৰি পঠিওৱা দুৰ্দান্ত শ্বটটো আছিল বিগত বিশ্বকাপৰ নক আউট পৰ্যায়ৰ এটা অন্যতম শ্ৰেষ্ঠ গল। এমবাপেৰ এই গ’লটোৰ আনন্দক দুগুণ কৰি মেচখনৰ ৬৬ মিনিটত এমবাপেৰ চমৎকাৰী পাছক সুন্দৰভাৱে গ্ৰহণ কৰি উছমান ডেম্বেলেই বলটো গ’লপোষ্টৰ সোঁফালে মাৰি পঠিয়ায়।
কিন্তু এইবাৰ মৰক্কোৰ গলকীপাৰ বুনৌৱে বলটোত সামান্যতম স্পৰ্শ কৰাৰ বাদে দলক ৰক্ষা কৰাৰ বাবে বিশেষ একো কৰিব নোৱাৰিলে। ডেম্বেলেৰ গ’লটোৰ পিছতে ফ্ৰান্সে ২-০ অগ্ৰগতি লাভ কৰাৰ লগে লগে একপ্ৰকাৰ নিশ্চিত হৈ পৰে যে তেওঁলোকৰ ছেমি ফাইনেলৰ পথ ইতিমধ্যেই প্ৰশস্ত হৈ পৰিছে। সমগ্ৰ মেচখনত ফ্ৰান্সেই সম্পূৰ্ণ নিয়ন্ত্ৰণ বজাই ৰাখে। ফ্ৰান্সে সমগ্ৰ মেচখনত মুঠ ২২টা শ্বট লয়, ইয়াৰে ৯টা আছিল শ্বট অন টাৰ্গেট, ইয়াৰ বিপৰীতে ম’ৰক্কোৱে মাত্ৰ ৫টা শ্বট ল’বলৈহে সক্ষম হয়।
গ’ল্ডেন বুটৰ দৌৰত এমবাপে
আজিৰ মেচখনত কৰা গ’লটোৰে ২৭ বছৰীয়া কিলিয়ান এমবাপেৰ চলিত বিশ্বকাপত গ’লৰ সংখ্যা ৮টালৈ বৃদ্ধি পালে। একে সংখ্যক ৮টা গ’লৰে লিঅ’নেল মেছিও গ’ল্ডেন বুটৰ দৌৰত যৌথভাৱে শীৰ্ষস্থানত আছে। আনহাতে এয়া এমবাপেৰ তৃতীয় বিশ্বকাপ আৰু বিশ্বকাপ ইতিহাসত তেওঁৰ মুঠ গ’লৰ সংখ্যা এই পৰ্যন্ত ২০টা। ইয়াৰ বিপৰীতে ষষ্ঠবাৰৰ বাবে বিশ্বকাপ খেলি থকা মেছিৰ নামত আছে ২১টা গ’ল।
একেৰাহে তৃতীয়বাৰলৈ ছেমি ফাইনেলত ফ্ৰান্স
মৰক্কোৰ বিৰুদ্ধে জয়ৰ লগে লগে ফিফা বিশ্বকাপত একেৰাহে তৃতীয়বাৰলৈ ছেমি ফাইনেললৈ উন্নীত হ’ল ফ্ৰান্স। ২০২৪ত ফাইনেলত আৰ্জেণ্টিনাৰ বিৰুদ্ধে পৰাস্ত হৈ ৰানাৰ্ছ আপতে ক্ষান্ত আছিল ফ্ৰান্স। বিগত বিশ্বকাপৰ ফাইনেলত কৰা এমবাপেৰ দুৰ্দান্ত হেইট্ৰিকটো ফুটবল অনুৰাগীয়ে হয়টো এতিয়াও পাহৰা নাই। নিৰ্ধাৰিত সময়ত ৩-৩ৰে সমতা স্থাপন কৰা ফ্ৰান্সে টাই বেকাৰত ৪-২ৰ ব্যৱধানত পৰাস্ত হৈছিল। ইয়াৰ পূৰ্বে ২০১৮ত ফ্ৰান্সে ফাইনেলত ক্ৰোৱেচিয়াক ৪-২ৰ ব্যৱধানত পৰাস্ত কৰি চেম্পিয়নৰ খিতাপ দখল কৰিছিল।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
