অসম লাইভ ২৪ঃ অযোধ্যাৰ ৰাম মন্দিৰ নির্মাণৰ বাবে সকলোৱে স্ব-ইচ্ছাৰে অর্থসাহায্য আগবঢ়াইছে। ৰাষ্ট্ৰপতিৰ পৰা বলীউড অভিনেতা অক্ষয় কুমাৰলৈকে সকলোৱে আগবঢ়াইছে অনুদান। ৩ দিনত ১০০ কোটি টকা অর্থ সংগ্ৰহ হৈছে ৰাম মন্দিৰৰ বাবে। এইবাৰ এগৰাকী মুছলিম যুৱতী তথা আইনৰ ছাত্ৰীয়ে অযোধ্যাৰ ৰাম মন্দিৰ নির্মাণৰ বাবে ১১ হাজাৰ টকা দান কৰিছে। এই যুৱতীগৰাকীয়ে নিজৰ হাতত ‘শ্ৰীৰাম’ লিখি টাটুও কৰিছে। ১১ হাজাৰ টকাৰ চেক অখিল ভাৰতীয় সন্ত সমিতিৰ হাতত তুলি দিছে যুৱতীগৰাকীয়ে।
যুৱতীগৰাকীৰ নাম ইকৰা আনুৱাৰ খান। ইকৰা খানে জনায় শ্ৰীৰাম তেওঁলোকৰ পূর্বপুৰুষ। আৰু সেইকাৰণে অযোধ্যাৰ ৰাম মন্দিৰ নির্মাণৰ বাবে সামান্য অৰিহণা আগবঢ়াইছে ইকৰা খানে। ইকৰা খানে লগতে কৈছে যে ‘ধর্ম ভিন্ন ভিন্ন নহয়, ধর্ম এটাই। আৰু সেয়া হ’ল মানৱতাৰ ধর্ম। আমি মানুহ হিচাপে ৰাম মন্দিৰ নির্মাণৰ অংশ হৈছো। আৰু আমি স্ব-ইচ্ছাই আনন্দৰে এই অর্থসাহায্য আগবঢ়াইছো। হিন্দু-মুছলিম দুই ধর্মৰ প্ৰতি মোৰ আছে গভীৰ বিশ্বাস। মই মন্দিৰলৈও যাওঁ আৰু ঘৰত নামাজো পঢ়ো। শ্ৰীৰামৰ ওপৰত আৰু কোনা ভগৱান নাই।’ ৰাম মন্দিৰৰ ভূমি পূজনৰ সেই অবিষ্মৰণীয় মুহূর্তৰ সাক্ষী হৈছিল ইকৰা খান। আৰু সেই ক্ষণক স্মৰণীয় কৰি তুলিবলৈ হাতত টাটু কৰিছিল ‘শ্ৰীৰাম’ নামেৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
