অসম লাইভ ২৪ঃ ভয়ংকৰ বিপদৰ দিশে পৃথিৱী। পৃথিৱী অভিমুখে তীব্ৰ গতিত আহি আছে বৃহৎ আকাৰৰ এষ্টেৰয়েড। নাছাৰ বিজ্ঞানীয়ে প্ৰকাশ কৰিছে এই তথ্য। বিজ্ঞানীয়ে প্ৰকাশ কৰা অনুসৰি, গ্ৰহাণুটোৰ ওজন ৮ কোটিৰো টনৰো অধিক, প্ৰস্থ প্ৰায় ডেৰ হাজাৰ ফুট। এই দৈত্যাকাৰ গ্ৰহাণুৰ নাম বেন্নু। ই পৃথিৱীৰ কক্ষপথৰ ৭৫ লাখ কিলোমিটাৰ ভিতৰলৈ আহিব বুলি সম্ভাৱ্য বিপদৰ পৰা পৃথিৱীক ৰক্ষা কৰিবলৈ বিশ্বৰ আগশাৰীৰ দেশসমূহে ইয়াক প্ৰতিৰোধ কৰিবলৈ তৎপৰতা গ্ৰহণ কৰিছে। নাছাই মহাকাশ যানৰ জৰিয়তে গ্ৰহাণুটোক আঘাত কৰি গতিপথ সলনি কৰাৰ পৰিকল্পনা গ্ৰহণ কৰিছে। এই পৰিকল্পনাৰ নাম ৰাখিছে হেমাৰ বা হাতুৰী। ইয়াৰ উপৰি, চীনৰ মহাকাশ গৱেষণা সংস্থা ‘চাইনা নেচনেল স্পেচ ছায়েন্স চেণ্টাৰ’ৰ বিজ্ঞানীসকলে পৃথিৱীক ধিয়াই আহি থকা গ্ৰহাণুটোৰ অভিমুখ সলনি কৰিবলৈ মহাকাশত ভয়ংকৰ বিস্ফোৰণ ঘটোৱাৰ উদ্দেশ্যে মহাকাশ অভিমুখে আঢ়ৈ ডজন ৰকেট প্ৰেৰণ কৰাৰ পৰিকল্পনা কৰিছে। ৰকেটসমূহে গ্ৰহাণুটোত বিস্ফোৰণ সংঘটিত কৰি তাৰ অভিমুখ পৃথিৱীৰ দিশৰ পৰা অন্য দিশলৈ ঘূৰাই দিব। সম্প্ৰতি সকলো পৰিকল্পনা অৱস্থাতেই আছে আৰু সেই বিস্ফোৰক ৰকেট তৈয়াৰ কৰাৰ বাবে গৱেষণা আৰম্ভ কৰিছে। উল্লেখ্য, এতিয়াৰ পৰা ৫৪ বছৰৰ পাছত গ্ৰহাণু বেন্নুয়ে পৃথিৱীত খুন্দা মৰাৰ আশংকা আছে। ভৱিষ্যৎ প্ৰজন্মক বিপদমুক্ত কৰাৰ বাবেই এই পৰিকল্পনা গ্ৰহণ কৰিছে বিশ্বৰ উন্নত দেশসমূহে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
