হাৰ্দিক পাণ্ডিয়াৰ সৈতে বিবাহবিচ্ছেদ ঘোষণা কৰিলে নাতাশা স্তানকোভিচে৷ ইনষ্টাগ্ৰাম পোষ্ট কৰি বিবাহবিচ্ছেদ ঘোষণা কৰিলে হাৰ্দিক-নাতাশাই৷ পুত্ৰ অগস্ত্যক একেলগেই ডাঙৰ কৰিব দুয়োৱে বুলিও বিবাহ বিচ্ছেদৰ খবৰ উল্লেখ কৰিছে৷ বেছ কিছু দিন ধৰি হাৰ্দিক আৰু নাতাশাৰ বিবাহবিচ্ছেদক লৈ জল্পনা চলিছিল৷ বৃহস্পতিবাৰে নাতাশাই সেই সকলো জল্পনাৰ অৱসান ঘটাই জনাই দিলে যে তেওঁলোকে চাৰি বছৰীয়া সম্পৰ্ক শেষ কৰিছে৷
বৃহস্পতিবাৰে নাতাশাই ইনষ্টাগ্ৰাম পোষ্ট কৰি লিখিছে, ‘চাৰি বছৰ একেলগে থকাৰ পাছত হাৰ্দিক আৰু মই পৃথক হোৱাৰ সিদ্ধান্ত লৈছো৷ একেলগে থকাৰ সকলো চেষ্টাই আমি চলাইছিলো৷ কিন্তু শেষ পৰ্যন্ত আমি একেলগে সিদ্ধান্ত লৈছো যে আমি পৃথকে থাকিম৷ এয়াই আমাৰ সঠিক সিদ্ধান্ত বুলি ভাৱিছো৷ কিন্তু এই সিদ্ধান্ত লোৱাটো আমাৰ বাবে সহজ কথাও নাছিল৷ আমি এটা পৰিয়াল হৈছিলো৷ এজনে আনজনৰ ওপৰত কোনোবাখিনিত নিৰ্ভৰশীলো হৈছিলো৷ আমি বহু আনন্দৰ সময় একেলগে কটাইছো৷’
২০২০ চনৰ ৩১মেত বিয়া কৰাইছে হাৰ্দিক আৰু নাতাশাই৷ ক’ভি়ডৰ মাজত কোনো ডাঙৰ উৎসৱৰ আয়োজন কৰা নাছিল হাৰ্দিক-নাতাশাই৷ আইনীমতে বিবাহ কৰাইছিল দুয়োৱে৷ সেই বছৰ ৩০ জুলাইতেই জন্ম অগস্ত্যৰ৷ ২০২৩ চনৰ ১৪ ফেব্ৰৱাৰীত উদয়পুৰত বিয়াৰ উৎসৱ আয়োজন কৰে হাৰ্দিক-নাতাশাই৷ পৰিয়াল, বন্ধু আৰু পুত্ৰ অগস্ত্যক লৈ এই বিশেষ বিবাহৰ আয়োজন কৰিছিল দুয়োৱে৷ বিবাহবিচ্ছেদৰ ঘোষণাৰ পাছতেই পুত্ৰক লৈ সিদ্ধান্ত লোৱাৰ কথা জনাইছে দুয়োৱে৷
১২ দিন পাছতেই অগস্ত্যৰ জন্মদিন৷ ৪বছৰ পূৰ্ণ হ’ব অগস্ত্যৰ৷ নাতাশাই পুত্ৰ সম্পৰ্কত লিখিছে, ‘অগস্ত্য আমাৰ সন্তান৷ আমাৰ দুজনৰেই অংশ হিচাপে সি থাকিব৷ আমি একেলগে তাক ডাঙৰ কৰিম৷ তাক সুখী ৰখাৰ বাবে আমি সকলো কৰিম৷ এই কঠিন সময়ত আমি অলপ নিজৰমতে থকাটো প্ৰয়োজন৷ আশা কৰিম আপোনালোকে আমাক এইখিনি সহযোগীতা কৰিব৷’
হাৰ্দিক আৰু নাতাশাই ইনষ্টাগ্ৰামৰ পৰা বিয়াৰ ফটোসমূহ পূৰ্বেই ডিলিট কৰি দিছিল৷ কিন্তু অগস্ত্যৰ সৈতে পোষ্ট কৰা ফটোসমূহ আছে দুয়োৰে প্ৰফাইলত৷ তেতিয়াৰে পৰাই দুয়োৰে বিবাহবিচ্ছেদৰ চৰ্চা চলি আছিল৷ টি-২০ বিশ্বকাপ জয়ৰ পাছতো নাতাশাই কোনো ধৰণৰ পোষ্ট নকৰিলে৷ একে সময়তে হাৰ্দিকৰ খেল চাবলৈ গেলাৰীতো উপস্থিত নাথাকিল৷ বিশ্বকাপৰ পাছত দেশলৈ ঘূৰি অহা হাৰ্দিকক লগো নকৰিলে নাতাশাই৷
২০২২ চনত আইপিএল জয় কৰিছিল হাৰ্দিকৰ টিমে৷ তেওঁৰ নেতৃত্বতেই চেম্পিয়ন হৈছিল গুজৰাট টাইটান্স৷ ফাইনেল জয়ৰ পাছত গ্ৰাউণ্ডলৈ নামি আহিছিল নাতাশা৷ এজনে আনজনক সাৱটি ফটোৰ বাবে পজ দিছিল৷ সেই ছবি ভাইৰেল হৈ পৰিছিল সামাজিক মাধ্যমত৷ হাৰ্দিকৰ খেল চাবলৈ প্ৰতিখন খেলতে লগত যোৱা নাতাশা এইবাৰৰ পৰা আৰু কোনো খেলতে হাৰ্দিকৰ কাষত থিয় নিদিব৷ বৃহস্পতিবাৰে দুয়োৱে প্ৰেমৰ পৰা আৰম্ভ হোৱা এই বিশেষ সম্পৰ্কটোৰ বিচ্ছেদ ঘোষণা কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
