সমগ্ৰ দেশতে কেন্দ্ৰীয় চৰকাৰৰ কৰ্মচাৰী আৰু পেঞ্চনাৰসকলৰ মাজত অষ্টম দৰমহা আয়োগ সন্দৰ্ভত আলোচনা চলি আছে। ইফালে, পুৰণি পেঞ্চন আঁচনি(Old Pension Scheme-OPS) সন্দৰ্ভত পুনৰবাৰ সংসদত চৰকাৰে নিজৰ স্থিতি স্পষ্ট কৰিছে। কেন্দ্ৰীয় চৰকাৰৰ কৰ্মচাৰীৰ বাবে পুৰণি পেঞ্চন আঁচনি পুনৰ প্ৰৱৰ্তনৰ কোনো প্ৰস্তাৱ বৰ্তমান বিবেচনাধীন হোৱা নাই বুলি চৰকাৰে উল্লেখ কৰে। অষ্টম দৰমহা আয়োগৰ লগতে কেইবাটাও কৰ্মচাৰী সংস্থাই অ’পিএছ পুনৰ সংস্থাপনৰ দাবী উত্থাপন কৰাৰ সময়তে এই উত্তৰ দিছে।
সংসদত চৰকাৰে কি কয়?
সংসদত এক প্ৰশ্নৰ উত্তৰত বিত্ত ৰাজ্য মন্ত্ৰী পংকজ চৌধুৰীয়ে কয় যে, পুৰণি পেঞ্চন আঁচনিখন পুনৰ প্ৰৱৰ্তনৰ বাবে কেন্দ্ৰীয় চৰকাৰৰ কোনো প্ৰস্তাৱ নাই। তেওঁ লগতে কয় যে কৰ্মচাৰীৰ উদ্বেগ দূৰ কৰিবলৈ ইতিমধ্যে ৰাষ্ট্ৰীয় পেঞ্চন ব্যৱস্থা (এন পি এছ)ত কেইবাটাও সংস্কাৰ ৰূপায়ণ কৰিছে আৰু ভৱিষ্যতেও কৰ্মচাৰীৰ স্বাৰ্থ সুৰক্ষিত কৰি যাব।
চৰকাৰৰ এই সঁহাৰিয়ে স্পষ্ট কৰি দিয়ে যে কেন্দ্ৰীয় চৰকাৰে বৰ্তমান অ’পিএছ পুনৰ সংস্থাপনৰ কথা চিন্তা কৰা নাই। গতিকে অষ্টম দৰমহা আয়োগৰ পৰামৰ্শত অ’পিএছ অন্তৰ্ভুক্ত হোৱাৰ সম্ভাৱনা কম বুলি ধৰা হয়।
কিয় OPS ৰ দাবী?
বহু কৰ্মচাৰী সংগঠনে দীৰ্ঘদিন ধৰি পুৰণি পেঞ্চন আঁচনিখন পুনৰ কাৰ্যকৰী কৰাৰ দাবী জনাই আহিছে। তেওঁলোকৰ মতে অৱসৰৰ সময়ত দিয়া শেষৰ দৰমহাৰ ওপৰত ভিত্তি কৰি অ’পিএছে নিৰ্দিষ্ট পেঞ্চন প্ৰদান কৰিছিল, আনহাতে এনপিএছ হৈছে বজাৰভিত্তিক ব্যৱস্থা। বজাৰৰ প্ৰদৰ্শনৰ ওপৰত ৰিটাৰ্ণ নিৰ্ভৰ কৰে, যাৰ ফলত কৰ্মচাৰীসকলে ভৱিষ্যতৰ আয়ৰ বিষয়ে অনিশ্চিত হৈ পৰে। এই কাৰণেই বহু ৰাজ্যত অ’পিএছক লৈ বিতৰ্ক চলি আছে, আৰু কিছু ৰাজ্য চৰকাৰে ইতিমধ্যে ইয়াক কাৰ্যকৰী কৰাৰ সিদ্ধান্ত লৈছে।
এন পি এছৰ বহু পৰিৱৰ্তন হৈছে
চৰকাৰে উল্লেখ কৰিছে যে কৰ্মচাৰীৰ উদ্বেগ দূৰ কৰিবলৈ সময়ৰ লগে লগে এন পি এছত কেইবাটাও উন্নতি সাধন কৰিছে। তদুপৰি কেন্দ্রীয় চৰকাৰে ইউনিফাইড পেঞ্চন আঁচনি (ইউ পি এছ) ঘোষণা কৰিছে, যাৰ লক্ষ্য হৈছে কৰ্মচাৰীসকলক অৱসৰৰ পিছত অধিক সামাজিক সুৰক্ষা প্ৰদান কৰা। চৰকাৰৰ মতে নতুন ব্যৱস্থাটোৱে কৰ্মচাৰীৰ স্বাৰ্থ আৰু আৰ্থিক স্থিতিশীলতাৰ মাজত ভাৰসাম্য ৰক্ষাৰ বাবে চেষ্টা কৰে।
কৰ্মচাৰীৰ চকু ৮ নং দৰমহা আয়োগৰ ওপৰত
যদিও চৰকাৰে অ’পিএছ সন্দৰ্ভত নিজৰ স্থিতি স্পষ্ট কৰিছে, তথাপিও কেন্দ্ৰীয় কৰ্মচাৰীসকলে এতিয়া অষ্টম দৰমহা আয়োগৰ পৰামৰ্শৰ ওপৰত গুৰুত্ব আৰোপ কৰিছে। কৰ্মচাৰীসকলে আশা কৰিছে যে নতুন পে কমিছনে দৰমহা, ভাট্টা, পেঞ্চনৰ ক্ষেত্ৰত যথেষ্ট পৰিৱৰ্তন আনিব। এতিয়াৰ বাবে এইটো নিশ্চিত যে পুৰণি পেঞ্চন আঁচনিখন পুনৰুদ্ধাৰৰ সন্দৰ্ভত কেন্দ্ৰীয় চৰকাৰৰ নীতি অপৰিৱৰ্তিত হৈ আছে, আৰু বৰ্তমানৰ ব্যৱস্থাৰ অধীনত এই প্ৰক্ৰিয়া অব্যাহত থাকিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
