প্ৰায় এপষেক ৰাজনৈতিক অস্থিৰতাই বিৰাজ কৰি থকাৰ পিছতে পাকিস্তানৰ প্ৰধানমন্ত্ৰীৰ গাদী এৰিবলৈ বাধ্য হৈ পৰিছিল প্ৰাক্তন প্ৰধানমন্ত্ৰী ইমৰাণ খানে৷ ইমৰাণ খানৰ পিছতে দেশখনৰ নতুন প্ৰধানমন্ত্ৰী ৰূপে দায়িত্ব লৈছে পাঞ্জাৱ প্ৰদেশৰ তিনিবাৰকৈ মুখ্যমন্ত্ৰী হিচাপে প্ৰতিনিধিত্ব কৰা শ্বেহবাজ শ্বৰীফে৷
বুধবাৰে দেশখনৰ নতুন প্ৰধানমন্ত্ৰী ৰূপে শপত গ্ৰহণ কৰা শ্বেহবাজ শ্বৰীফে তেওঁৰ মন্ত্ৰীসভাখন গঠন কৰিবলৈ প্ৰায় এসপ্তাহৰো অধিক সময় লয়৷
কিন্তু শ্বৰীফৰ মন্ত্ৰী সভাখনে ৰাজনৈতিক মহলক বিশেষভাৱে দৃষ্টি আকৰ্ষণ কৰা দেখা গৈছে৷ ইয়াৰ মাজৰ বিশেষ দিশটো হৈছে প্ৰধানমন্ত্ৰী শ্বেহবাজ শ্বৰীফে তেওঁৰ মন্ত্ৰীসভাত পাঁচগৰাকী নাৰীক স্থান দিছে৷ উল্লেখ্য যে ইয়াৰ পূৰ্বে ইমৰাণ খানৰ মন্ত্ৰীসভাত নাৰীক বিশেষ গুৰুত্ব প্ৰদান কৰা দেখা নগৈছিল৷
লগতে পঢ়ক ঘৰে ঘৰে গৈ পিটিমৰ পিছত জুবিনৰ আকৌ অসমবাসীক ফটোৱা জাৰি! কি ক’লে জুবিনে?
শ্বেহবাজ শ্বৰীৰ মন্ত্ৰীসভাত স্থান লাভ কৰা মহিলা মন্ত্ৰীকেইগৰাকী হৈছে ক্ৰমে শ্বেৰী ৰহমান, হীনা ৰব্বানি খাৰ, চাজিয়া মাৰি, মৰিয়ম ঔৰংগজেৱ আৰু আয়েশা গাউছ পাছা৷ এই পাঁচ নাৰীয়ে শ্বেহবাজ শ্বৰীফৰ মন্ত্ৰীসভাত স্থান লাভ কৰাত পাক সংবাদ মাধ্যমত বিশেষভাৱে চৰ্চা লাভ কৰাও দেখা গৈছে৷
ইফালে প্ৰাক্তন প্ৰধানমন্ত্ৰী বেনজিৰ ভূট্টোৰ পুত্ৰ তথা পাকিস্তান পিপলছ পাৰ্টিৰ অধ্যক্ষ বিলাবল জৰ্ডাৰীয়ে শ্বৰীফৰ মন্ত্ৰীসভাত স্থান লাভ নকৰিলে৷ জৰ্ডাৰীয়ে শ্বৰীফৰ মন্ত্ৰীসভাৰ বৈদেশিক দপ্তৰটো লাভ কৰিব বুলি পাকিস্তানৰ সংবাদ মাধ্যমত চৰ্চা লাভ কৰি আহিছিল৷ কিন্তু প্ৰধানমন্ত্ৰী শ্বৰীফে বৈদেশিক দপ্তৰটো নিজৰ হাততে ৰাখিছে৷ অৱশ্যে বৈদেশিক দপ্তৰৰ ৰাজ্যিক মন্ত্ৰীত্বৰ দায়িত্ব পিপিপিৰ নেত্ৰী হীনা ৰাব্বানি খাৰক দিছে৷
অৱশ্যে কূটনৈতিক বিশেষজ্ঞসকলৰ মতে আগন্তুক দিনত প্ৰধানমন্ত্ৰী শ্বেহবাজ শ্বৰীফে বৈদেশিক দপ্তৰটো পিপিপিৰ অধ্যক্ষ বিলাবল জৰ্ডাৰীকে দিয়াৰ সম্ভাৱনা আছে৷ ইয়াৰ পূৰ্বে প্ৰধানমন্ত্ৰী শ্বৰীফে নিজেই প্ৰতিবেশী ৰাষ্ট্ৰৰ সৈতে দ্বিপাক্ষিক সম্পৰ্কক পৰ্যালোচনা কৰিব খুজিছে বুলি ধাৰণা কৰা হৈছে৷
লগতে পঢ়ক কিয় হাতজোৰ কৰি দেশবাসীৰ ওচৰত ক্ষমা খুজিলে বলিউদৰ তাৰকা অক্ষয় কুমাৰে?
ইফালে পাকিস্তানৰ প্ৰাক্তন ৰাষ্ট্ৰদূত শ্বেৰী ৰহমানক পৰিৱেশ মন্ত্ৰালয়ৰ দৰে গুৰুত্বপূৰ্ণ দপ্তৰ অপৰ্ণ কৰি প্ৰধানমন্ত্ৰী শ্বৰীফ পাক সংবাদ পত্ৰৰ প্ৰশংসাৰ পাত্ৰ হোৱা পৰিলক্ষিত হৈছে৷ ইফালে পৰিৱেশ বিশেষজ্ঞসকলৰ মতে শ্বৰীফে কৰ্মদক্ষ শ্বেৰী ৰহমানক পৰিৱেশ দপ্তৰ দি যথেষ্ট বুদ্ধিমত্তাৰ পৰিচয় দিছে৷
ইফালে পিএমএল-এনৰ নেত্ৰী মৰিয়ম ঔৰংগজেৱক তথ্যমন্ত্ৰীৰ দায়িত্ব দিয়া হৈছে৷ অতি স্পষ্টবাদীৰূপে পৰিচিত মৰিয়মে নিজৰ দপ্তৰটো দক্ষতাৰে চম্ভালিব পাৰিব বুলিয়ে দেশখনত চৰ্চা লাভ কৰিছে৷
মন্ত্ৰীসভাত স্থান লাভ কৰা অন্য দুগৰাকী মহিলা মন্ত্ৰী হ’ল পিপিপি-ৰ নেত্ৰী চাজিয়া মাৰি আৰু পিএমএল-এনৰ আয়েশা গউচ পাছা৷ তেওঁলোক দুয়োগৰাকীয়েই প্ৰথমবাৰলৈ মন্ত্ৰীসভাত স্থান লাভ কৰিছে৷ চাজিয়াক ইনকাম চাপ’ৰ্ট প্ৰ’গ্ৰাম আৰু আয়েশাক ৰাজ্যিক বিত্ত মন্ত্ৰীৰ দায়িত্ব প্ৰদান কৰা হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
