ডিজিটেল ডেস্কঃ ভ্ৰাম্যমাণ তথা অসমীয়া চিনেমা জগতৰ ‘মহাৰাণী’ প্ৰস্তুতি পৰাশৰৰ আজি ওপজা দিন। যোৰহাটৰ মালৌ আলিত আজিৰ দিনটোতে জন্ম হৈছিল অসমীয়া বোলছবি জগতৰ মোহময়ী অভিনেত্ৰীগৰাকী। প্ৰায় ৫বছৰ বয়সতে বৰ্ণালী নামৰ দূৰদৰ্শনৰ ছিৰিয়েল এখনত অভিনয় কৰি অভিনয় জীৱনৰ পাতনি মেলিছিল প্ৰস্তুতি পৰাশৰে। উল্লেখ কৰা প্ৰয়োজন যে, প্ৰস্তুতি পৰাশৰে অভিনয় কৰা প্ৰথম বোলছবি খনৰ নাম হৈছে- মহাৰথী।
অভিনয়ক নিচা আৰু পেচা হিচাপে গ্ৰহণ কৰা অভিনেত্ৰী গৰাকীয়ে ২০০১-০২ বৰ্ষত গুণ গুণ গানে গানে বোলছবি খনৰ বাবে ৰাজ্যিক চলচ্চিত্ৰ বঁটা, ২০০৪ৰ শ্ৰেষ্ঠা অভিনেত্ৰীৰ বঁটা লাভ কৰিছিল। ২০০৮-০৯ বৰ্ষত মুনলাইট এৱাৰ্ডছৰ শ্ৰেষ্ঠ অভিনেত্ৰীৰ শিতানলৈও তেওঁ মনোনীত হৈছিল। কেৱল বোলছবিয়ে নহয়, কেইবাখনো ধাৰাবাহিকত অভিনয় কৰিও অসমবাসীৰ মনত সুকীয়া আসন দখল কৰিবলৈ সক্ষম হৈছিল অভিনেত্ৰীগৰাকী।
প্ৰস্তুতি পৰাশৰে অভিনয় কৰা কেইখনমান ধাৰাবাহিক হৈছে- বৰ্ণালী, নিশাৰ নায়ক, চক্ৰবেহু, মহানগৰ, মেজৰ চাহাব, জোনাকত শিহৰণ,বিন্দাছ। জীৱন নদীৰ দুটি পাৰ, বাৰুদ, ৰং আদি বোলছবিৰ বাবে প্ৰস্তুতি পৰাশৰে দৰ্শক ৰাইজৰ পৰা বিশেষ সমাদৰ লাভ কৰিছিল। শেহতীয়াকৈ ভ্ৰাম্যমাণ থিয়েটাৰত ব্যস্ত অভিনেত্ৰীগৰাকীয়ে দৰ্শকক উপহাৰ দিছে বহুকেইখন জনপ্ৰিয় নাটক।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
