ডিজিটেল ডেস্কঃ সন্ত্ৰাসবাদীৰ আক্ৰমণত জম্মু-কাশ্মীৰত শ্বহীদ হৈছিল দেশৰ ৫গৰাকী বীৰ সেনা জোৱান। সন্ত্ৰাসবাদী বিৰোধী এই অভিযানত ভাৰতীয় সেনাৰ হাততো এতিয়ালৈকে ৪টা সন্ত্ৰাসবাদীৰ প্ৰাণ গৈছে। শ্বহীদ বীৰ জোৱানসকলৰ নশ্বৰ দেহ ইতিমধ্যে সম্পূৰ্ণ মৰ্যদাৰে চমজাই দিয়া হৈছে পৰিয়ালৰ লোকক।
৫গৰাকী সেনা জোৱানৰ ভিতৰত শ্বহীদ হোৱা এগৰাকী সেনা জোৱান আছিল গৌতম কুমাৰ। কৌটদ্বাৰৰ শিৱপুৰত ঘৰ আছিল গৌতম কুমাৰৰ। মাতৃ আৰু জ্যেষ্ঠ ভাতৃৰ সৈতে গৌতম কুমাৰৰ আছিল এটি সুখী পৰিয়াল। জ্যেষ্ঠ ভাতৃয়ে জনোৱা অনুসৰি ২০২৪ৰ মাৰ্চ মাহত প্ৰেয়সীৰ সৈতে বিয়াত বহাৰ কথা আছিল গৌতম কুমাৰৰ। কিন্তু সেই শুভ ক্ষণ নৌ আহোতেই থান-বান হৈ গল সকলো সপোন।
প্ৰাপ্ত খবৰ অনুসৰি, গৌতম কুমাৰ এগৰাকী যুৱতীৰ সৈতে দীৰ্ঘদিন ধৰি প্ৰেমৰ সম্পৰ্কত আছিল। শেহতীয়াকৈ এই সম্পৰ্কৰ কথা ৰাজহুৱা কৰি ঘৰতো কথাতো জনাইছিল। ঘৰৰ লোকে ২০২৪ৰ মাৰ্চ মাহত দুয়োৰে বিয়াৰ কথা চিন্তা কৰিছিল। দুয়োখন ঘৰৰ মাজত কথাও হৈছিল আৰু ২৪ৰ মাৰ্চত দীঘলীয়া ছুটী লৈ বিয়া কৰোৱাৰ কথা আছিল গৌতম কুমাৰৰ।
শ্বহীদ গৌতম কুমাৰৰ জ্যেষ্ঠ ভাতৃ ৰাহুল কুমাৰে সদৰি কৰা অনুসৰি, যোৱা সপ্তাহৰ শনিবাৰে সকলো কথা পাতি চাকৰিলৈ উভতিছিল গৌতম কুমাৰ। ১১মাৰ্চত বিয়াৰ দিন ঠিক হৈছিল। ঘৰৰ অন্যান্য কাম বিয়াৰ বাবে কৰিবলৈ জ্যেষ্ঠ ভাতৃ ধনো দি গৈছিল গৌতম কুমাৰে।
২০১৪চনত সেনাত ভৰ্তি হৈছিল গৌতম কুমাৰ। দুটা বছৰৰ পূৰ্বে গৌতম কুমাৰৰ পিতৃয়েও ইহসংসাৰ ত্যাগ কৰিছে। এনে পৰিস্থিতিৰ মাজতেই সৰু পুত্ৰক হেৰুৱাই এতিয়া ভাগি পৰিছে গৌতম কুমাৰ মাতৃ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
