Post Office Schemes: ডাকঘৰৰ পিপিএফ আঁচনিত নিয়মীয়াকৈ বিনিয়োগ কৰি চৰকাৰী সুৰক্ষা, কৰ ৰেহাই আৰু চক্রবৃদ্ধি সুতৰ সুবিধাৰে ১ কোটিৰো অধিক পুঁজি গঢ়ি তোলা সম্ভৱ৷ সম্পূৰ্ণ গণনা আৰু সহজ বিনিয়োগৰ সূত্ৰটো জানি লওক।
ডাকঘৰৰ ক্ষুদ্ৰ সঞ্চয় আঁচনিৰ ভিতৰত চৰকাৰী আঁচনি আছে য’ত নিয়মীয়াকৈ বিনিয়োগ কৰি দীৰ্ঘম্যাদীভাৱে ১ কোটিতকৈ অধিক টকাৰ পুঁজি গঢ়ি তোলা সম্ভৱ। এই আঁচনিৰ নাম পাব্লিক প্ৰভিডেন্ট ফাণ্ড (PPF)। নিৰাপদ বিনিয়োগ, কৰ ৰেহাই আৰু সম্পূৰ্ণ কৰমুক্ত মেচিউৰিটিৰ সুবিধাৰ বাবে ই দেশৰ অন্যতম জনপ্ৰিয় সঞ্চয় আঁচনি। কোটিপতি হোৱাৰ লক্ষ্যত উপনীত হ’বলৈ আপুনি এই আঁচনিখনত কেনেকৈ আৰু কিমান টকা বিনিয়োগ কৰিব পাৰে জানি লওক।
চৰকাৰী সুৰক্ষা আৰু আকৰ্ষণীয় সুতৰ সুবিধা
নিৰাপদ বিনিয়োগৰ কথা আহিলে ডাকঘৰৰ সঞ্চয় আঁচনিৰ নামটোৱেই প্ৰথম। কাৰণ, এই আঁচনিসমূহত বিনিয়োগ সুৰক্ষাৰ দায়িত্ব কেন্দ্ৰীয় চৰকাৰে লয়। গতিকে সেইবোৰক শূন্য বিপদৰ সঞ্চয় আঁচনি হিচাপে গণ্য কৰা হয়। বৰ্তমান পিপিএফে বছৰি ৭.১ শতাংশ হাৰত সুত প্ৰদান কৰে। এই সুতৰ হাৰ চৰকাৰে সময়ে সময়ে পৰ্যালোচনা কৰে।
সুত কেনেকৈ গণনা কৰা হয়?
পিপিএফ একাউণ্টৰ নিয়ম অনুসৰি প্ৰতি মাহৰ ৫ তাৰিখৰ পৰা মাহৰ শেষ দিনলৈকে একাউণ্টত থকা নূন্যতম বেলেঞ্চৰ ওপৰত সুত গণনা কৰা হয়। গতিকে যদি আপুনি প্ৰতি মাহৰ ১ তাৰিখৰ পৰা ৫ তাৰিখৰ ভিতৰত পিপিএফ একাউণ্টত ধন জমা কৰে তেন্তে সেই মাহৰ বাবেও সুতৰ সুবিধা পাব। ফলত নিৰ্দিষ্ট সময়ৰ ভিতৰত ধন জমা কৰিলে দীৰ্ঘম্যাদীভাৱে অধিক লাভ পোৱা যায়।
পিপিএফে তিনি ধৰণৰ কৰ ৰেহাই প্ৰদান কৰে
পিপিএফক EEE (Exempt-Exempt-Exempt) শ্ৰেণীৰ আঁচনি বোলা হয়। অৰ্থাৎ ইয়াত তিনিটা ডাঙৰ কৰ সুবিধা উপলব্ধ। প্ৰথমতে, আয়কৰ আইনৰ ধাৰা ৮০চি অনুসৰি বছৰি সৰ্বাধিক ১.৫ লাখ টকা পৰ্যন্ত বিনিয়োগৰ ওপৰত (পুৰণি কৰ ব্যৱস্থাত) কৰ ৰেহাই পোৱা যায়।
দ্বিতীয়তে, পিপিএফত উপাৰ্জন কৰা বাৰ্ষিক চক্রবৃদ্ধি সুতৰ ওপৰত কোনো কৰ দিব নালাগে।
তৃতীয়তে, মেচিউৰিটিৰ সময়ত লাভ কৰা সমগ্ৰ ধনৰাশিও সম্পূৰ্ণ কৰমুক্ত।
১৫ বছৰৰ মেচিউৰিটি, আৰু ৫ বছৰ বৃদ্ধি কৰিব পাৰি
পিপিএফৰ মেচিউৰিটিৰ সময়সীমা ১৫ বছৰ। কিন্তু ইচ্ছা কৰিলে প্ৰতিবাৰেই এই সময়সীমা ৫ বছৰ বৃদ্ধি কৰিব পাৰি। ফলত চক্রবৃদ্ধি সুতৰ সুবিধাৰে বৃহৎ পুঁজি সৃষ্টি কৰা সম্ভৱ।
এই আঁচনিখনত বছৰি সৰ্বাধিক ১.৫ লাখ টকা বিনিয়োগ কৰিব পাৰিব। অৰ্থাৎ প্ৰতিমাহে গড়ে ১২,৫০০ টকা পৰ্যন্ত জমা কৰা সম্ভৱ।
পি পি এফত বিনিয়োগ কৰি কোটিপতি হোৱাটো কেনেকৈ সম্ভৱ?
যদি আপুনি নিয়মিতভাৱে পিপিএফত প্ৰতিমাহে ১২,৫০০ টকা অৰ্থাৎ বছৰি ১.৫ লাখ টকা বিনিয়োগ কৰে, তেন্তে—
১৫ বছৰত মুঠ বিনিয়োগ: ২২.৫০ লাখ টকা
সুত: ১৮,১৮,২০৯ টকা
মুঠ পুঁজি: ৪০,৬৮,২০৯ টকা
যদি আপুনি তাৰ পিছত ৫ বছৰলৈকে দুবাৰকৈ অৰ্থাৎ মুঠ ২৫ বছৰলৈকে একাউণ্টটো চলাই থাকে আৰু একে ধৰণে বিনিয়োগ কৰি থাকে, তেন্তে—
মুঠ বিনিয়োগ: ৩৭.৫০ লাখ টকা
চক্রবৃদ্ধি সুত: ৬৫,৫৮,০১৫ টকা
মুঠ পুঁজি: ১,০৩,০৮,০১৫ টকা
অৰ্থাৎ যদি আপুনি নিয়মীয়াকৈ বিনিয়োগ কৰিব পাৰে আৰু দীৰ্ঘম্যাদীভাৱে চক্রবৃদ্ধি সুতৰ সুবিধাসমূহ ব্যৱহাৰ কৰিব পাৰে, তেন্তে সেয়া সম্ভৱ পিপিএফৰ জৰিয়তে ১ কোটিতকৈ অধিক টকাৰ পুঁজি গঢ়ি তুলিবলৈ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
