অসম লাইভ২৪ঃ আজিৰ নাৰীয়ে প্ৰসব বেদনা সহাৰ সলনি চিজাৰিয়ানকেই আঁকোৱালী লৈছে৷ চিকিৎকেও সময় আৰু জটিলতাৰ কথা ভাৱিয়েই চিজাৰিয়ানকেই শ্ৰেয় বুলি উল্লেখ কৰে৷ ইয়াৰোপৰি বৰ্তমান প্ৰায়সংখ্যক যুৱতীয়েই পূৰ্বতকৈ বেছি বয়সত বিবাহৰ সম্পৰ্কত বান্ধ খাই৷ লগতে ডায়াবেটিছ, হাইপ্ৰেছাৰৰ দৰে সমস্যাতো প্ৰায়সংখ্যকেই আক্ৰান্ত৷ কেতিয়াবা আকৌ বহু দম্পত্তিয়ে দীৰ্ঘদিন ধৰি বন্ধ্যাত্বৰ সমস্যাৰ বাবে চিকিৎসা কৰি থাকে৷ তেনেদৰে চিকিৎসক তত্ত্বাৱধানত জন্ম হোৱা বেছিসংখ্যকেই চিজাৰিয়ান পদ্ধতিৰেই জন্ম হয়৷ এটা সন্তান চিজাৰিয়ান হোৱাৰ পাছত দ্বিতীয় সন্তান জন্ম দিবলৈ মাজত কিমান সময় ৰাখিব সেই সম্পৰ্কেও চিকিৎসকে দিছে বিশেষ পৰামৰ্শ৷
প্ৰথম চিজাৰিয়ানৰ পাছত কিমান দিন পাছত দ্বিতীয় সন্তানৰ পৰিকল্পনা কৰিব সেই সম্পৰ্কে চিকিৎসকে দিছে বিশেষ পৰামৰ্শ৷ এটা সন্তানৰ পৰা আনটো সন্তান চিজাৰিয়ান পদ্ধতিৰে জন্ম দিবলৈ হ’লে অন্তত দুবছৰ অপেক্ষা কৰাটো নিতান্তই প্ৰয়োজনীয়৷ ইয়াৰ কাৰণো প্ৰকাশ কৰিছে চিকিৎসকে৷ চিকিৎসকৰ মতে চিজাৰিয়ান কোনো সাধাৰণ অপাৰেশ্যন নহয়৷ পেটৰ ছাল, চৰ্বি, পেশী আদি ঢাপে ঢাপে কাটি জৰায়ুৰ একেবাৰে তলৰ অংশ কাটিহে সন্তান এটা বাহিৰলৈ ওলিয়াই অনা হয়৷ আকৌ কটা সকলো ঢাপ জোৰা লগালেহে অপাৰেশ্যনটো সমাপ্ত হয়৷ তেনেক্ষেত্ৰত এই লেয়াৰ বা ঢাপসমূহ শুকাওতে সময়ৰ প্ৰয়োজন৷ কিয়নো কটা অংশত প্ৰথমে তেজৰ চেকুৰা বান্ধে, প্ৰদাহ আৰম্ভ হয়, কোলাজেন উৎপন্ন হয়, টিছু ফাইব্ৰছিচ হোৱাৰ পাছতহে সকলো অংশ জোৰা লাগে৷ এই সম্পূৰ্ণ ঢাপসমূহ জোৰা লগাৰ পূৰ্বেই যদি পুনৰ সন্তান সম্ভৱা হয় সেয়া অতি বিপজ্জনক৷
জৰায়ু তথা পেটৰ এই কটা অংশসমূহ জোৰা লগাৰ পূৰ্বেই যদি পুনৰ সন্তান সম্ভৱা হয় তেন্তে বহুকেইটা বিপদৰ সন্মুখীন হ’ব পাৰে এগৰাকী মাতৃ৷ ভ্ৰুণটো বাঢ়ি অহাৰ লগে লগে জৰায়ুত চাপ পৰে৷ শেষৰফালে জৰায়ু ফাটি যোৱাৰো আশংকা থাকে৷ এনেদৰে ফাটি গ’লে ৰক্তক্ষৰণ হৈ মাতৃ আৰু শিশু দুয়োৰেই প্ৰাণৰ শংকা আহিব পাৰে৷
প্ৰত্যেকৰে ক্ষেত্ৰতেই এই সমস্যা হ’ব তেনে নহয়৷ প্ৰায় ০.২-৩.৮ শতাংশ লোকেহে এই সমস্যাৰ সন্মুখীন হয়৷ সেয়েহে চিকিৎসকে প্ৰথমটো সন্তানৰ পৰা দ্বিতীয়টো সন্তানৰ মাজত কমেও ২ বছৰ সময়ৰ ব্যৱধান ৰাখিবলৈ পৰামৰ্শ দিয়ে৷ এই পৰামৰ্শ নামানিলে কি কি সমস্যাৰ সন্মুখীন হ’ব?
অতিৰিক্ত ৰক্তপাতৰ ফলত তেজৰ প্ৰয়োজন হয়
জৰায়ুত সংক্ৰমনৰ আশংকা থাকে
চিজাৰিয়ান কৰিলে ব্লাডাৰৰ সমস্যা হ’ব পাৰে
অন্ত্ৰ আৰু ইউটেৰাছৰো ক্ষতি হোৱাৰ সম্ভাৱনা থাকে
ইনটেনছিভ কেয়াৰৰ প্ৰয়োজনৰ বাবে অত্যাধিক অৰ্থৰ প্ৰয়োজন হ’ব
বহু সময়ত প্লেছেণ্টা জৰায়ুৰ দেৱালত সমস্যাই দেখা দিয়ে, প্ৰস্ৰাৱ নলীত প্ৰভাৱ পৰিব পাৰে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
