সংসদীয় পৰিকাঠামোক সলনি কৰি পেলোৱা আৰু গণতন্ত্ৰক দুৰ্বল কৰি দিয়াৰ এক ডাঙৰ ষড়যন্ত্ৰ কৰিছিল মোদী চৰকাৰে৷ কিন্তু বিফল হ’ল৷ শনিবাৰে সংবাদমেল অনুষ্ঠিত কৰি এই মন্তব্য কৰিছে প্ৰিয়ংকা গান্ধীয়ে৷ ডিলিমিটেছন আৰু মহিলা সংৰক্ষণ বিল পাছ কৰোৱাত ব্যৰ্থ হৈছে নৰেন্দ্ৰ মোদী চৰকাৰ৷ বিগত ১৫ বছৰৰ ভিতৰত এই প্ৰথমবাৰৰ বাবে ভোটগ্ৰহণ কৰি হাৰিছে কেন্দ্ৰৰ শাসকদল৷ লোকসভাত বিৰোধীসকলে এই জয়ক ‘গণতন্ত্ৰৰ বৃহৎ জয়’ বুলি উল্লেখ কৰিছে৷
গুৰুতৰ অভিযোগ তুলি প্ৰিয়ংকাই সংবাদমেলত কয়, ‘ক্ষমতাত থকাৰ বাবে ষড়যন্ত্ৰ কৰি এই বিল অনা হৈছিল৷ ফলত শুকুৰবাৰে যি হ’ল সেয়া গণতন্ত্ৰৰ বৃহৎ জয়৷ সংবিধান ৰক্ষা কৰাত বিৰোধী ঐক্য জয়ী হৈছে৷ যাৰ প্ৰভাৱ স্পষ্টকৈ দেখা গৈছে শাসকদলৰ নেতাসকলৰ মুখত৷ তেওঁলোকে বাৰে বাৰে অভিযোগ কৰিছে যে চৰকাৰে এক বৃহত্তৰ ৰাজনৈতিক উদ্দেশ্যেৰে এই বিল আনিছিল৷ ক্ষমতাত টিকি থাকিবৰ বাবে এক বৃহৎ ষড়যন্ত্ৰ কৰিছিল৷ হঠাৎ অধিবেশন পাতিছিল৷ শাসকপক্ষই এনেকৈ নিজৰ অৱস্থান তৈয়াৰ কৰিছিল যাতে ফল যিয়েই নহওক কিয়, তেওঁলোকে কৃতিত্ব দাবী কৰিব পাৰে৷ তেওঁলোকে ভাৱিছিল বিল পাছ হলে সেয়াও তেওঁলোকৰ জয়, আৰু পাছ নহ’লে সেয়াও তেওঁলোকৰ জয়৷ কিন্তু বিষয়টো ইমান সহজ নহয়৷ এই ইছ্যু কেৱল নাৰী সংৰক্ষণক লৈ নহয়, বৰং ইচ্ছামতে কাম কৰাৰ স্বাধীনতাক লৈ৷’
নাৰী সংৰক্ষণ বিলৰ সৈতে সীমা পুননিৰ্ধাৰণ(ডিলিমিটেছন) যুক্ত কৰাৰ প্ৰসংগত প্ৰিয়ংকাই প্ৰশ্ন তোলে৷ কেনেকৈ বিৰোধীয়ে এনে এক চৰকাৰক লোকসভা আসনৰ সংখ্যা ডাঙৰ আকাৰে পৰিবৰ্তন কৰাৰ অনুমতি দিব পাৰে৷ যাৰ প্ৰতিষ্ঠানসমূহৰ প্ৰতি সন্মানেই নাই, তেনে এক শাসক জোটৰ বাবে ডাঙৰ ধাক্কা বুলি উল্লেখ কৰি তেওঁ কয়, ‘এয়া তেওঁলোকৰ বাবে এক কলা দিন, কাৰণ তেওঁলোকে ধাক্কা খাইছে৷’
অতীতৰ ঘটনাসমূহৰ কথা উল্লেখ কৰি তেওঁ কৈছে, ‘আমি খুবেই সুখী৷ আপোনালোকে দেখিছে, বিৰোধী এক হ’লে কি হয়৷’ প্ৰিয়ংকাই চৰকাৰক পূৰ্বৰ সংস্কৰণৰ বিলখন উভতাই অনাৰ আহ্বান জনায়৷ কংগ্ৰেছ সাংসদ প্ৰিয়ংকাৰ মত, ‘আপুনি যদি সঁচাকৈয়ে মহিলাৰ বাবে কিছু কাম কৰিব খুজিছে তেন্তে ২০২৩ চনৰ বিলখন উভতাই আনক৷ আমি সেয়া সমৰ্থন কৰিম৷’ প্ৰিয়ংকাৰ মতে ২০২৩ চনৰ বিলখনত স্পষ্টভাৱে কোৱা হৈছিল, বৰ্তমান আসনৰ মাজত মহিলাসকলৰ বাবে সংৰক্ষণ কাৰ্যকৰ কৰা হ’ব৷ তেওঁলোকৰ সংযোজন, এই সংৰক্ষণ কাৰ্যকৰ কৰিবলৈ বিৰোধী প্ৰস্তুত৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
