অসম লাইভ২৪ঃ নাম নোলোৱাকৈ আকৌ এবাৰ প্রধানমন্ত্ৰীক সমালোচনা ৰাহুল গান্ধীৰ। কংগ্ৰেছ নেতা ৰাহুলে ভাষণত কয়, ‘এই ‘পনৌতি’ৰ বাবেই ভাৰতে বিশ্বকাপ ফাইনেল মেচত পৰাস্ত হয়।’ সন্মুখত ৰাজস্থানৰ বিধানসভা নিৰ্বাচন। তাৰ পূৰ্বে প্ৰচাৰত ব্যস্ত কংগ্ৰেছ, বিজেপি দুই পক্ষই। ৰাজস্থানত কেইবা স্থানতো বিজেপি দলৰ হৈ মোদীয়ে আৰু কংগ্ৰেছ দলৰ হৈ ৰাহুল গান্ধীয়ে প্ৰচাৰ সভাত অংশ লৈছে।
মঙলবাৰে ৰাজস্থানৰ জালোৰৰ এখন জনসভাৰ মাজত ৰাহুল গান্ধীয়ে টানি আনিছে ভাৰতে বিশ্বকাপ ক্ৰিকেট হৰাৰ প্ৰসংগ। কংগ্ৰেছ নেতা ৰাহুলে এই সন্দৰ্ভত ভাষণত কয়, ‘লৰাহঁতে ভালেই খেলিছিল। বিশ্বকাপো তেওঁলোকে জয় কৰিব পাৰিলহেতেন। কিন্তু সেই পনৌতি’ আহি হৰোৱাই দিলে। ৰাহুল গান্ধীয়ে এই মন্তব্য কৰাৰ পাছতেই জাঙুৰ খাই উঠিছে কেইবাগৰাকী বিজেপি নেতা। কেন্দ্ৰীয় মন্ত্ৰী ৰবিশংকৰ প্ৰসাদে এই সন্দৰ্ভত কয়, ‘ৰাহুল গান্ধীয়ে ভুল কথা কৈছে। এয়া কেনেধৰণৰ আচৰণ?’ ৰাহুলক অনতিপলমে ক্ষমা খুজিবলৈকো দাবী জনালে কেন্দ্ৰীয় মন্ত্ৰীগৰাকীয়ে।
ছোনীয়া গান্ধীয়ে প্রধানমন্ত্ৰী নৰেন্দ্ৰ মোদীক ‘মৃত্যুৰ সদাগৰ’ বুলিও উল্লেখ কৰিছিল। কেন্দ্ৰীয় মন্ত্ৰী ৰবিশংকৰ প্ৰসাদে ছোনীয়া গান্ধীৰ প্ৰসংগ টানি কয়, ‘আপোনাৰ মাতৃয়ে গুজৰাটৰ প্ৰচাৰসভাত প্রধানমন্ত্ৰীক কটু কথা কোৱাৰ পাছত কংগ্ৰেছে আৰু কেতিয়াও তাত বিজয় সাব্যস্ত কৰিব নোৱাৰিলে। আপুনিও এই বিষয়সমূহৰ পৰা অলপ শিক্ষা লওক।’ ৰাহুল গান্ধীৰ মন্তব্যৰ তীব্ৰ বিৰোধীতা কৰিছে কেন্দ্ৰীয় বিত্তমন্ত্ৰী নিৰ্মলা সীতাৰমণে। বিত্তমন্ত্ৰী নিৰ্মলা সীতাৰমণে এই সন্দৰ্ভত কয়,’ৰাহুলে অত্যন্ত নিম্নমানৰ মন্তব্য কৰিছে।’ ইয়াৰোপৰি নিৰ্মলা সীতাৰমণে কয়, ‘খেলাত হৰাজিকা থাকেই। ৰাহুল গান্ধীয়ে প্রধানমন্ত্ৰী সম্পৰ্কে এনে মন্তব্য ৰখা উচিত নহয়। এনেকৈ কথা ক’লে দেশৰ খেলুৱৈসকলক কেনেকৈ অনুপ্ৰেৰণা যোগাব। কংগ্ৰেছে এনেকৈ কেনেকৈ দেশৰ খেলাধূলাৰ কাম আগুৱাই নিব? আমাৰ চৰকাৰৰ দিনতেই আমাৰ দেশৰ খেলুৱৈয়ে অলিম্পিক খেলিছে, এছিয়ান গেমছৰ পৰা আৰম্ভ কৰি পেৰা অলিম্পিকলৈকে সৰ্বত্ৰতে মোদী চৰকাৰৰ ভূমিকা লেখত ল’বলগীয়া।’
উল্লেখ্য যে, ৰাহুল গান্ধীৰ এই মন্তব্যৰ ভিডিঅ’ সামাজিক মাধ্যমত ভাইৰেল হৈ পৰিছে? একাংশ নেটিজেনে তেওঁৰ এই মন্তব্য শ্বেয়াৰো কৰিছে। ভাইৰেল এই অংশ লৈ ক্ষোভ প্ৰকাশ কৰিছে বিজেপি নেতা কৰ্মীয়েও? নিজৰ নামাঙ্কিত ষ্টেডিয়ামত ক্ৰিকেট বিশ্বকাপৰ ফাইনেলত প্ৰধানমন্ত্ৰীৰ উপস্থিতিক লৈ বহুতেই বহুধৰণে সমালোচনা কৰিছে। আপোনাৰ প্ৰসংগত শিৱসেনাৰ সাংসদ সঞ্জয় ৰাউতে কয়, ‘BJPয়ে পৰ্দাৰ আঁৰত গেম প্লেন চলাইছিল।’ ৬ উইকেটত অষ্ট্ৰেলিয়াৰ হাতত ভাৰত পৰাস্ত হৈছে। ভাৰতৰ এই পৰাজয়ত ১৪০ কোটি মানুহৰ সপোন ভাঙিছে বুলিও সামাজিক মাধ্যমত চৰ্চা চলিছে। ইয়াৰপাছতেই প্রধানমন্ত্ৰী নৰেন্দ্ৰ মোদীক দেখা গৈছে টীম ইণ্ডিয়াৰ ড্ৰেছিং ৰুমত। ৰোহিত ব্ৰিগেডক বুকুত সোমোৱাই সান্তনাও দিছে মোদীয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
