অসম লাইভ ২৪ঃ মাত্ৰ ৩ দিনত ১০০ কোটি টকা অনুদান সংগ্ৰহ কৰি ৰেকৰ্ড গঢ়িলে ৰাম মন্দিৰ ট্ৰাষ্টে। অনুদান কাৰ্যসূচী সন্দৰ্ভত দেওবাৰে শ্ৰীৰাম জন্মভূমি তীৰ্থক্ষেত্ৰ ট্ৰাষ্টৰ সাধাৰণ সম্পাদক চম্পট ৰায়ে জনায় ৩ দিনৰ ভিতৰত ১০০ কোটি টকাৰ অনুদান সংগ্ৰহ হোৱাৰ কথা। বিগত ১৫ জানুৱাৰীৰ পৰা অনুদান সংগ্ৰহৰ এই কাৰ্যসূচী আৰম্ভ হৈছে। এই অনুদান সংগ্ৰহ কাৰ্যসূচী চলিব ২৭ ফেব্ৰুৱাৰীলৈকে। বিগত বছৰৰ উচ্চতম ন্যায়ালয়ৰ ৰায়ৰ পিছতেই অযোধ্যাৰ বিতৰ্কিত ভূমিত ৰাম মন্দিৰ নিৰ্মাণৰ পৰিকল্পনা আৰম্ভ হয়। নৱেম্বৰ মাহত গঠন হয় ৰাম মন্দিৰ তীৰ্থক্ষেত্ৰ ট্ৰাষ্ট। উল্লেখযোগ্য যে অযোধ্যাৰ ৰাম মন্দিৰ নিৰ্মাণৰ বাবে ৫ লাখ টকাৰ অনুদান আগবঢ়াইছে ৰাষ্ট্ৰপতি ৰামনাথ কোবিন্দে। ৰাম মন্দিৰ নিৰ্মাণৰ বাবে এতিয়া ভীষণ ব্যস্ততা অযোধ্যাত। ২০২৪ চনৰ পূৰ্বেই মন্দিৰ সম্পূৰ্ণভাৱে নিৰ্মাণ হ’ব বুলি আশা কৰিছে ট্ৰাষ্ট কৰ্তৃপক্ষই। তুলনামূলকভাৱে ভাৰতত প্ৰাচীন নিৰ্মাণ পদ্ধতিৰ ব্যৱহাৰেই অধিক কৰা হৈছে এই মন্দিৰ নিৰ্মাণৰ ক্ষেত্ৰত। ৰামৰ এই মন্দিৰক ভূমিকম্পকে ধৰি অন্যান্য প্ৰাকৃতিক বিপৰ্যয়ৰ পৰা সুৰক্ষিত ৰাখিবলৈ ব্যৱহাৰ কৰা হৈছে আধুনিক পদ্ধতি।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
