আৰ্থিক সংকটৰ মাজত ডাঙৰ পদক্ষেপ হিমাচল চৰকাৰৰ৷ মুখ্যমন্ত্ৰী, মন্ত্ৰী, বিধায়ক আৰু আমোলাসকলৰ দৰমহাৰ একাংশ কাটি লোৱা হ’ব৷ মুখ্যমন্ত্ৰী সুখবিন্দৰ সিং সুখুৱে শনিবাৰে এই ঘোষণা কৰিছে৷ তেঁও জনাইছে যে তেওঁৰ দৰমহাৰ ৫০ শতাংশ কটা যাব৷ উপ মুখ্যমন্ত্ৰী আৰু অন্যান্য মন্ত্ৰীসকলৰ দৰমহাৰ ৩০ শতাংশ কাটি লোৱা হ’ব৷ অন্যহাতে বিধায়ক, চেয়াৰমেন, ভাইছ চেয়াৰমেন আৰু ৰাজনৈতিকভাৱে নিযুক্ত উপদেষ্টাসকলৰ দৰমহাৰ ২০ শতাংশ কটা হ’ব৷ এই পদক্ষেপ ঊৰ্ধ্বতন আমোলাতন্ত্ৰৰ ক্ষেত্ৰতো প্ৰযোজ্য হব৷ মুখ্যসচিব, ডিজিপি, অতিৰিক্ত মুখ্যসচিব, এডিজিপি, বিভিন্ন দপ্তৰৰ প্ৰধান সচিব আৰু ঊৰ্ধ্বতন বন কৰ্মকৰ্তাসকলৰ দৰে শীৰ্ষস্থানী. আমোলাসকলৰ দৰমহাৰ ক্ষেত্ৰত ৩০ শতাংশ স্থগিত কাৰ্যকৰ কৰা হ’ব৷
সচিব, বিভাগীয় প্ৰধান, আই জি পি, ডি আই জি, এছ এছ পি, এছ পি আৰু অন্যান্য বন কৰ্মকৰ্তাসকলৰ দৰমহাৰ ২০ শতাংশ কটা হব৷ গ্ৰুপ এ, আৰু গ্ৰুপ বি, কৰ্মীসকলৰ দৰমহাৰ ক্ষেত্ৰত ছমাহৰ বাবে ৩ শতাংশ কাটি লোৱা কাৰ্যকৰ হ’ব৷ গ্ৰুপ চি, আৰু গ্ৰুপ ডি, পৰ্যায়ৰ কৰ্মীসকলক এই সিদ্ধান্তৰ আওঁতামুক্ত ৰখা হৈছে৷
বিচাৰ বিভাগৰ সাংবিধানিক স্বাধীনতাৰ বিষয়টো বিবেচনাত ৰাখি, ৰাজ্য চৰকাৰে হাইকৰ্টক স্বেচ্ছাই ৬মাহৰ বাবে দৰমহাৰ একাংশ স্থগিত ৰখাৰ বিষয়টো বিবেচনা কৰিবলৈকো আহ্বান জনাইছে৷ এই প্ৰস্তাবত জিলা আৰু অতিৰিক্ত জিলা বিচাৰপতিসকলৰ দৰমহাৰ ২০শতাংশ, গ্ৰুপ এ আৰু গ্ৰুপ বি পৰ্যায়ৰ বিচাৰ বিভাগীয় কৰ্মকৰ্তাসকলৰ দৰমহাৰ ৩শতাংশ আৰু হাইকৰ্ট পৰ্যায়ৰ কৰ্মকৰ্তাসকলৰ দৰমহাৰ সৰ্বোচ্চ ৩০শতাংশ স্থগিত ৰখাৰো আলোচনা কৰা হৈছে৷
নিজৰ চতুৰ্থ বাজেটত মুখ্যমন্ত্ৰী সুখুয়ে ২০২৫-২০২৬ অৰ্থবৰ্ষৰ বাবে মুঠ ৫৪,৯২৮ কোটি টকা ব্যয়ৰ প্ৰস্তাৱ পেছ কৰিছে৷ এই অংক বিগত অৰ্থবছৰৰ তুলনাত ৩,৫৬৮ কোটি টকা কম৷ যাৰ প্ৰধান কাৰণ হৈছে ৰাজহ ঘাটিৰ অনুদানৰ প্ৰাপ্যতা বন্ধ কৰি দিয়া আৰু ৰাজ্যৰ ক্ৰমবৰ্ধমান ঋণৰ বোজা৷
ৰাজহ ঘাটিৰ অনুদান বন্ধ কৰি দিয়াৰ বাবে কেন্দ্ৰীয় চৰকাৰৰ সমালোচনা কৰি মুখ্যমন্ত্ৰী সুখুৱে কয়, ‘এই সিদ্ধান্তৰ ফলত ৰাজ্যৰ বছৰত গড়ে ৮১০৫ কোটি টকাৰ আৰ্থিক ক্ষতি হৈছে৷ ইয়াৰ ফলত আসন্ন অৰ্থবছৰত ৰাজ্যৰ ৰাজহ ঘাটিৰ পৰিমাণ ৬৫৭৭ কোটি টকা হ’বলৈ বুলি ধাৰণা কৰা হৈছে৷
চৰকাৰে গাখীৰ সংগ্ৰহৰ মূল্য বৃদ্ধি কৰাৰো সিদ্ধান্ত লৈছে৷ গৰুৰ গাখীৰত দাম প্ৰতি লিটাৰত ৫১ টকাৰ পৰা বঢ়াই ৬১ টকা হব৷ অন্যহাতে মহৰ গাখীৰৰ দাম প্ৰতি লিটাৰত ৬১ টকাৰ পৰা বঢ়াই ৭১ টকা কৰা হব৷ হালধি ন্যূনতম সহায়ক মূল্য প্ৰতি কিঃগ্রাঃত ৯০ টকাৰ পৰা বঢ়াই ১৫০ টকা কৰা হৈছে আৰু আদাক প্ৰথমবাৰ ন্যূনতম সহায়ক মূল্যৰ আওতাভুক্ত কৰি প্ৰতি কেজিৰ দাম ৩০ টকা নিৰ্ধাৰণ কৰা হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
