অসম লাইভ২৪ঃ ৰেচনৰ দোকানতেই এতিয়াৰে পৰা উপলব্ধ হ’ব সুৰা! ৰেচনৰ দোকানত সুৰা বিক্ৰিৰ অনুমতি বিচাৰি কেন্দ্ৰলৈ চিঠি লিখিছে ৰেচন ব্যৱসায়ী সংস্থাই। ২০ ছেপ্টেম্বৰত কেন্দ্ৰীয় খাদ্য আৰু অসামৰিক যোগান মন্ত্ৰালয়ৰ প্ৰধান সচিব সুধাংশু পাণ্ডেলৈ এই পত্ৰ প্ৰেৰণ কৰিছে সংস্থাটোৱে। পত্ৰখন অল ইণ্ডিয়া ফেয়াৰ প্ৰাইচ শ্বপ ডিলাৰ ফেডাৰেছনৰ পৰা প্ৰেৰণ কৰা হৈছে। সংগঠনটোৰ সাধাৰণ সম্পাদক বিশ্বম্ভৰ বসুৱে কেন্দ্ৰীয় খাদ্য মন্ত্ৰী পীয়ুষ গোৱেল, কেন্দ্ৰীয় বিত্ত সচিব, কেন্দ্ৰীয় ৰাজহ সচিব, কেন্দ্ৰীয় উপভোক্তা সুৰক্ষা আৰু খাদ্য ৰাজ্যমন্ত্ৰী, খাদ্য আয়ুক্ত আৰু সকলো ৰাজ্যৰ খাদ্য সচিবলৈ পত্ৰখনৰ প্ৰতিলিপি প্ৰেৰণ কৰিছে। ৰেচন ব্যৱসায়ীসকলে দাবী কৰা অনুসৰি কেন্দ্ৰীয় চৰকাৰে দেশৰ ৰেচন দোকানবোৰ বচাবলৈকে এই প্ৰয়োজনীয় পদক্ষেপ আৰু সিদ্ধান্ত ল’ব লাগে।
অল ইণ্ডিয়া ফেয়াৰ প্ৰাইচ অফ ডিলাৰ ফেডাৰেচনৰ দ্বাৰা প্ৰদান কৰা তথ্য অনুসৰি, বৰ্তমান দেশত ৫,৩৭,৮৬৮ খন চৰকাৰৰ অনুমোদিত ৰেচন দোকান আছে। এই দোকানবোৰেই প্ৰায় ২.৫ কোটি লোকৰ জীৱিকাৰ সম্বল। অৰ্থাৎ পৰোক্ষভাৱে, ৫.৫ নিযুতৰো অধিক লোক এই দোকানৰ ওপৰত নিৰ্ভৰশীল। ডিলাৰসমূহে দাবী কৰিছে যে বৰ্তমানৰ আন্তঃগাঁথনিত ৰেচন ব্যৱসায়ীসকলে লাভৰ মুখ দেখিবলৈ সক্ষম হোৱা নাই। তেওঁলোকে ৰেচনৰ দোকানবোৰ জীয়াই ৰাখিবলৈ বিকল্প উপায়ৰ কথা ভাবিব লাগিব। সেয়েহে, তেওঁলোকে কেন্দ্ৰীয় চৰকাৰক প্ৰস্তাৱৰ ৰূপত সুৰা বিক্ৰী কৰাৰ বিষয়ে অৱগত কৰিছে।
তেওঁলোকে কেৱল সুৰা বিক্ৰী কৰাই নহয় কেন্দ্ৰীয় চৰকাৰক অনাগত দিনত ৰেচন দোকানৰ পৰা পাঁচ কিলোগ্ৰাম এলপিজি চিলিণ্ডাৰ আৱণ্টন কৰাৰ প্ৰস্তাৱো দিছে। ৰেচন ব্যৱসায়ীসকলৰ আশা যে কেন্দ্ৰীয় আৰু ৰাজ্য চৰকাৰে বাস্তৱ পৰিস্থিতিৰ কথা বিবেচনা কৰি সময়মতে সিদ্ধান্ত ল’ব।
‘
ৰেচন ব্যৱসায়ীসকলৰ হৈ অল ইণ্ডিয়া ফেয়াৰ প্ৰাইচ শ্বপ ডিলাৰ ফেডাৰেচনৰ অন্যতম কাৰ্য্যালয়ৰ বিষয়া জয়ন্ত দেৱনাথে কয়, ‘প্ৰতিখন ৰেচন দোকানত দুইৰ পৰা চাৰিজন কৰ্মচাৰী আছে। মালিক আৰু কৰ্মচাৰীৰ পৰিয়ালৰ সৈতে এই ৩-৪ জন সদস্যৰ কৰ্মসংস্থাপন দিয়ে এই দোকানসমূহে। সমীক্ষা অনুসৰি, পাঁচ কোটিৰো অধিক লোকৰ ৰেচন দোকানেই মূল জীৱিকা। সেয়েহে, কেন্দ্ৰীয় আৰু ৰাজ্য চৰকাৰে ৰেচনৰ দোকানবোৰ জীয়াই ৰাখিব লাগে। আমি কেন্দ্ৰীয় চৰকাৰক এনে ধৰণৰ প্ৰস্তাৱ দিছো যাতে ৰেচনৰ দোকানবোৰ জীয়াই ৰাখি মালিক আৰু শ্ৰমিকসকলক জীয়াই ৰাখিব পৰা যায়।’ তেওঁ লগতে যুক্তি দিয়ে যে যদি ৰেচন ব্যৱসায়ীসকলৰ প্ৰস্তাৱ গ্ৰহণ কৰা হয়, তেন্তে কেন্দ্ৰীয় আৰু ৰাজ্য চৰকাৰৰ ৰাজহ বৃদ্ধিৰ পথো মসৃণ হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
