অসম লাইভ২৪ঃ ৰিংকু সিঙেই ভাৰতীয় ক্ৰিকেট দলৰ নতুন ফিনিছাৰ। আগন্তুক সময়ত তেওঁ মহেন্দ্ৰ সিং ধোনীৰ অভাৱ পূৰ কৰিব! অষ্ট্ৰেলিয়াৰ বিৰুদ্ধে প্রথম টি-২০ মেচৰ পাছত বহুতেই ভাৰতীয় ক্ৰিকেট সমৰ্থকক এই কথা ভাৱিবলৈ বাধ্য কৰাইছে। বৃহস্পতিবাৰে ৰিংকু সিঙে আকৌ এবাৰ প্ৰমাণ কৰি দিলে যে কিয় দেশবাসীয়ে তেওঁক ধোনীৰ স্থানত দেখিছে। পৰবৰ্তী ভাল ফিনিছাৰ কিয় হোৱাৰ সম্ভাৱনা আছে ৰিংকু সিঙৰ? সেই কথা ২২ গজত বৃহস্পতিবাৰে প্ৰমাণ কৰি দেখুওৱাইছে ৰিংকু সিঙে।
বিশাখাপত্তনমত আয়োজিত এই মেচত অষ্ট্ৰেলিয়াৰ বিৰুদ্ধে টীম ইণ্ডিয়াই ২ উইকেটত জয়লাভ কৰিছে। তাতোকৈ ডাঙৰ বিষয় হ’ল মেচৰ একেবাৰে শেষত ছিক্স কোবাই ৰিংকুৱে ভাৰতৰ জয় নিশ্চিত কৰিছে। ইতিমধ্যেই দেশৰ ক্ৰিকেট সমৰ্থকে ৰিংকুক আইপিএলৰ পৰাই আদৰি লৈছে। টি-২০ৰ প্রথম মেচ দেখাৰ পাছতেই ক্ৰিকেটপ্ৰেমী আত্মবিশ্বাসী হৈ পৰিছে ৰিংকুক লৈ। মহেন্দ্ৰ সিং ধোনীয়ে ২০১১ চনৰ বিশ্বকাপ ফাইনেলত যেনেকৈ ছিক্স কোৱাই ভাৰতীয় দলটোক বিজয়ৰ সোৱাদ দিছিল। ৰিংকুৱে বৃহস্পতিবাৰে খেলা ইনিংছৰ ২০১১ ধোনীয়ে খেলা ইনিংছৰ সৈতে সাদৃশ্য আছে। ভাৰতৰ প্ৰাক্তন ক্ৰিকেটাৰ অভিষেক নায়াৰেও ৰিংকুৰ খেল দেখি প্ৰশংসা কৰিছে ৰিংকুৰ খেলক। তেওঁ এই সন্দৰ্ভত কয়, ‘মেচ ফিনিছ কৰাত ৰিংকু দক্ষ খেলুৱৈ।’
টি-২০ৰ এই বিশেষ মেচত ৰিংকু সিঙে ১৪ বলত ২২ ৰান কৰিছে। চাৰিটাকৈ বাউণ্ডেৰীও কোবাইছে। জয়ৰ বাবে ২০৯ ৰানৰ টাৰ্গেট বান্ধি দিয়া হৈছিল টীম ইণ্ডিয়াক। বেটিঙত নামি টীম ইণ্ডিয়াই ১ টা বল বাকী থাকোতেই মেচ জয় কৰি পেলায়। এই খেলত ৰিংকুৰ পাৰ্ফৰমেন্সক লৈ দেশজুৰি আৰম্ভ হৈছে চৰ্চা। খুব কম সময়ৰ ভিতৰতেই ৰিংকুৱে ভাৰতীয় ক্ৰিকেট দলত প্ৰৱেশ কৰিব বুলিও আশা কৰিছে প্ৰায়সংখ্যক জ্যেষ্ঠ খেলুৱৈয়ে।
জিঅ’ চিনেমাত, মেচক লৈ চলি থকা আলোচনাৰ অভিষেক নায়াৰে বাৰে বাৰে কৈছে, ‘ৰিংকুৱে নিজৰ যোগ্যতাৰ প্ৰমাণ ইতিমধ্যেই দিছে। আমি এনে এজন প্লেয়াৰৰ কথা পাতি আছো যিয়ে আইপিএলৰ টুৰ্নামেণ্ট আৰু ঘৰুৱা ক্ৰিকেটতো যথেষ্ট পাৰদৰ্শিতা দেখুৱাই থৈছে। ৰিংকুৰ বেটত পৰাজয় শব্দতো নাই। নিজৰে দৃঢ়তাৰে আগুৱাই নিছে ৰিংকুৱে। ভাৰতীয় ক্ৰিকেট দলৰ হৈ এইবাৰ তৃতীয়বাৰৰ বাবে পাৰ্ফৰমেন্স দেখুওৱাইছে ৰিংকুৱে। তিনিবাৰেই ৰিংকুৱে টীম ইণ্ডিয়াত থাকি বুজাই দিছে তেওঁক এই দলৰ খুবেই প্ৰয়োজন। তেওঁ ৫-৭ বছৰ ধৰি আন্তৰ্জাতিক ক্ৰিকেট খেলিছে। খেলৰ দক্ষতা এনেকৈয়ে বাঢ়িছে।’
ইয়াৰোপৰি প্ৰাক্তন খেলুৱৈ অভিষেক নায়াৰে অলপমানো কুণ্ঠাবোধ নকৰাকৈ কৈছে, ‘টীম ইণ্ডিয়াই অৱশেষত ফিনিছাৰ লাভ কৰিলে। এটা ইনিংছ কেনেকৈ শেষ কৰিব পাৰি সেই দক্ষতা ৰিংকুৰ আছে। এইয়া সহজ কাম নহয়। ইমানদিন ধৰি হাৰ্দিক পাণ্ডিয়া আৰু ধোনীকেই এই কামত সফল বুলি ভাৱি আহিছিল ক্ৰিকেটপ্ৰেমীয়ে। এই দুজনৰ পাছত আন কাক এই দায়িত্ব দিব পাৰি সেই কথাত ভাৰতীয় দলৰ হাতত অপশ্ব্যন নাছিল। এইবাৰৰ পৰা চিন্তা দূৰ হ’ব। ধোনীৰ পাছতেই ভাৰতীয় ক্ৰিকেট দলে এজন ভাল ফিনিছাৰ লাভ কৰিছে। তেওঁ কিমান ৰান কৰিছে সেয়া গুৰুত্বপূৰ্ণ নহয়, কেনেকৈ দলটোক জয়ৰ সোৱাদ দিব পাৰি সেই কথাত ৰিংকু কম সময়তে পাকৈত হৈ পৰিছে। ৰিংকুৱে যেতিয়া বেট ধৰে তেওঁক তেতিয়া খুবেই শান্ত মগজুত দেখা যায়।’
উল্লেখ্য যে, পাঁচ মেচৰ টি-২০ চিৰিজত টীম ইণ্ডিয়াই ইতিমধ্যেই ১-০ ব্যৱধানত আগুৱাই গৈছে। আগন্তুক দেওবাৰে অৰ্থাৎ ২৬ নৱেম্বৰত তিৰুৱন্তপূৰমৰ গ্ৰীণফিল্ড আন্তৰ্জাতিক ষ্টেডিয়ামত এই দুই দলে দ্বিতীয়খন মেচ খেলিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
