অসম লাইভ২৪ঃ নিজৰ লক্ষ্য যদি অটুত থাকে তেন্তে এদিন আপুনি সাফল্যৰ চূড়াত থাকিবই৷ আপোনাক সেই স্থানত উপনীত হোৱাত কোনোৱে বাধা দিব নোৱাৰে৷ অৱশ্যে সফলতাৰ বাবে আপুনি পৰিশ্ৰম কৰিব লাগিবই৷ পৰিশ্ৰমৰ বিকল্প আপোনাৰ হাতত একো নাই৷ আৰু মানুহ যিমানেই ডাঙৰ নহওক কিয় নিজৰ অতীত পাহৰিলেই সেই মানুহৰ শিঁপা হেৰাই৷ অৰ্থাৎ সাফল্যৰ চূড়াৰ পৰা পৰি যোৱাৰো সম্ভাৱনা থাকে৷ সফলতাৰ শীৰ্ষত থাকিও মাটিৰ সৈতে মিলি এইসমূহ নীতিক অনুসৰণ কৰিয়েই আগবাঢ়িছে ক্ৰিকেটাৰ ৰিংকু সিং৷
https://x.com/KKRSince2011/status/1750940210832286194?s=20
বহু পৰিশ্ৰম কৰি বৰ্তমান তেওঁ কেকেআৰৰ সৈতে আইপিএল খেলি শেহতীয়াকৈ ভাৰতীয় ক্ৰিকেট দলতো নিজা পৰিচয় দিছে৷ এসময়ত পেট চলোৱাৰ বাবে হাতত ঝাড়ু তুলি লোৱা লৰাজনৰ হাতত এতিয়া দেশৰ হৈ বেট তুলি লোৱাৰ সুযোগে অপেক্ষা কৰিছে৷ ছাফাইকৰ্মীৰ পৰা ভাৰতৰ নতুন ফিনিছাৰ হৈছে ৰিংকু সিং৷ কিন্তু তেওঁৰ পৰিয়াল এতিয়াও মাটিতেই ভৰি থৈ চলি আছে৷ পুত্ৰ দেশৰ জনপ্ৰিয় ক্ৰিকেটাৰ হৈ উঠিলেও পিতৃয়ে এৰি দিয়া নাই পূৰ্বৰ কাম৷
কেকেআৰৰ হৈ খেলত নমাৰ পৰা পৰিচিত ৰিংকু সিঙৰ পিতৃ খানচন্দ্ৰ সিঙে ঘৰে ঘৰে গেছ চিলিণ্ডাৰ বিলাই দুবেলা দুঁসাজ পৰিয়ালৰ বাবে গোটাই আনিছিল৷ আজিও একে কামেই কৰি আছে ৰিংকুৰ পিতৃয়ে৷ শেহতীয়াকৈ চিলিণ্ডাৰ লৈ ঘৰে ঘৰে ঘূৰি ফুৰা ৰিংকুৰ পিতৃৰ এক ভিডিঅ’ ভাইৰেল হৈ পৰিছে৷ সেই ভিডিঅ’ত দেখা গৈছে চিলিণ্ডাৰ নিজৰ হাতেৰেই তুলি গ্ৰাহকক দি গৈছে ৰিংকুৰ পিতৃয়ে৷
ৰিংকু সিং বৰ্তমান ভাৰতীয় দলৰ সৈতে ইংলেণ্ড লায়েন্সৰ বিৰুদ্ধে খেলাত ব্যস্ত হৈ আছে৷ সামাজিক মাধ্যমত এজন ব্যক্তিয়ে ৰিংকুৰ পিতৃক উদ্দেশ্যি লিখিছে, ‘ৰিংকুৱে পিতৃক ৰিকুৱেষ্টো কৰিছে এইবোৰ কাম এৰক, আপুনি এতিয়া অলপমান অৱসৰ লওক৷ কিন্তু পিতৃয়ে এই কথা মানিবলৈ প্ৰস্তুত নহয়৷ তেওঁ আজীৱন কৰি অহা এই কাম পুত্ৰই ক’লে বুলিয়েইতো সহজে এৰি দিব নোৱাৰে বুলিও বিভিন্নজনৰ সন্মুখত মন্তব্য কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
