কৰ্কটৰ টিকা তৈয়াৰ কৰিছে ৰাছিয়াই৷ এই দাবী কৰিছে দেশৰ স্বাস্থ্য মন্ত্ৰণালয়ে৷ ২০২৫ চনৰ পৰা এই মাৰণৰোগত আক্ৰান্ত ৰোগীসকলক বিনামূলীয়াকৈ দিয়া হ’ব কৰ্কটৰ টিকা৷ মন্ত্ৰণালয়ৰ অধীনস্থ ৰেডিঅ’লজি মেডিকেল ৰিচাৰ্ছ চেণ্টাৰৰ জেনেৰেল ডাইৰেক্টৰ আন্দ্ৰে কাপ্ৰিনে জনাইছে যে, ৰাছিয়াৰ বিজ্ঞানীয়ে এম আৰ এন এ বা মেছেঞ্জাৰ আৰ এন এ প্ৰযুক্তিৰ সহায়ত কৰ্কটৰ প্ৰতিষেধক তৈয়াৰ কৰিছে৷ আগন্তুক বছৰৰ আৰম্ভণিতেই বজাৰলৈ আহিব পাৰে এই টিকা৷
গামালেয়া নেশ্ব্যনেল ৰিচাৰ্ছ চেণ্টাৰ ফৰ এপিডেমোলজি এণ্ড মাইক্ৰবায়লজিৰ ডাইৰেক্টৰ আলেকজেণ্ডাৰ গিণ্টছবাৰ্গে জনাইছে যে ট্ৰায়েলত দেখা গৈছে যে টিকাৰ ড’জত কৰ্কটৰ ৰোগীসকলৰ শৰীৰত টিউমাৰ কোষৰ বিভাজন বন্ধ হৈছে৷ বিগত ফেব্ৰুৱাৰী মাহৰ আৰম্ভণিতেই প্ৰেছিডেণ্ট ভ্লা়ডিমিৰ পুটিনে দাবী কৰিছিল যে তেওঁৰ দেশৰ বিজ্ঞানীয়ে কৰ্কটৰ টিকা প্ৰায় তৈয়াৰ কৰি পেলাইছে৷ এক ভিডিঅ’বাৰ্তাৰে পুটিনে কয়, ‘আমি নতুন প্ৰজন্মৰ বাবে কৰ্কটৰ টিকা তৈয়াৰৰ খুব কাষলৈ আহিছো৷’
বৰ্তমান ৰাছিয়াক বাদ দিও অন্য কেইবাখনো দেশে কৰ্কটৰ টিকা তৈয়াৰৰ বাবে কাম কৰিছে৷ হিউমেন পেপিলোমাভাইৰাছৰ বিৰুদ্ধে বৰ্তমান বেছ কেইবাটাও লাইচেঞ্চপ্ৰাপ্ত টিকা আছে৷ এই ভাইৰাছ জৰায়ুমুখৰ কৰ্কটৰ অন্যতম কাৰণ৷ আৰু এটা প্ৰতিষেধক হৈছে হেপাটাইটিছ বিৰ টিকা৷ এই প্ৰতিষেধকে লিভাৰৰ কৰ্কটো প্ৰতিৰোধ কৰিব পাৰে বুলি দাবী কৰিছে বিশ্ব স্বাস্থ্য সংস্থাই৷
তেওঁলোকে তৈয়াৰ কৰা এই প্ৰতিষেধকে কি ধৰণৰ কৰ্কট প্ৰতিৰোধ কৰিব পাৰিব কি পৰিমাণে দিয়া হ’ব সেয়া স্পষ্টকৈ জনোৱা হোৱা নাই৷ প্ৰতিষেধকৰ নামো প্ৰকাশ কৰা নাই ৰাছিয়াৰ স্বাস্থ্য মন্ত্ৰণালয়ে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
