ৰাছিয়াৰ ইউক্ৰেইন আক্ৰমণে তৃতীয়টো সপ্তাহত প্ৰৱেশ কৰিছে৷ যুদ্ধ আৰু দীঘলীয়া হোৱাৰ সম্ভাৱনাই দেখা দিছে৷ যুদ্ধই তিনিটা সপ্তাহ স্পৰ্শ কৰাৰ পিছত আৰু দীঘলীয়া হ’লে বিশ্ব অৰ্থনীতিত বিৰূপ প্ৰভাৱ পৰাই নহয় অধিক বিপৰ্যয় সন্মুখীন হ’ব বুলি ধাৰণা কৰা হৈছে৷
বিশেষকৈ যুদ্ধ বিধ্বস্ত ইউক্ৰেইনে বিভিন্ন ৰাষ্ট্ৰলৈ প্ৰেৰণ কৰা কেঁচা সামগ্ৰী ৰপ্তানি বন্ধ কৰাৰ ফলতে এই আশংকাই দেখা দিছে৷ ইয়াৰ ফলত বিশ্বৰ লগতে ভাৰতত কি কি সামগ্ৰীৰ আৰু মূল্যবৃদ্ধি ঘটাৰ সম্ভাৱনা আছে?
ভোজ্য তেলঃ
ৰাছিয়া আৰু ইউক্ৰেইন হৈছে বিশ্বৰ সৰ্বাধিক ভোজ্য তেল(edible oil) ৰপ্তানিকাৰী দেশ৷ দুয়ো দেশৰ মাজৰ যুদ্ধই বিশ্বৰ ভোজ্য তেলৰ বজাৰত নাটনিৰ সৃষ্টি কৰিব৷ যাৰ ফলত আন্তঃৰাষ্ট্ৰীয় বজাৰত ইয়াৰ মূল্য বৃদ্ধি ঘটিব৷ ভাৰতে ইউক্ৰেইনৰ পৰা ৭০ শতাংশ সূৰজমুখী ফুলৰ পৰা উৎপাদিত ভোজ্য তেল আমদানি কৰে৷
লগতে পঢ়ক ৰাছিয়াৰ সৈতে বন্ধুত্বৰ সুফল; ভাৰতে ৰাছিয়াৰ পৰা ৰেহাই মূল্যত লাভ কৰিছে খাৰুৱা তেল!
শস্যৰ বীজঃ
যুদ্ধৰ ফলত বিশ্বৰ অন্যান্য দেশৰ লগতে ভাৰততো শস্যৰ বীজৰ মূল্যবৃদ্ধি হোৱাৰ সম্ভাৱনা আছে৷ ৰাছিয়া আৰু ইউক্ৰেইনে বিশ্বৰ বিভিন্ন দেশলৈ ২৯ শতাংশ শস্যৰ বীজ আমদানি কৰে৷ এই দুয়োখন দেশকে ইউৰোপৰ ‘শস্য বীজৰ ভঁৰাল’ বুলি জনা যায়৷ ইউক্ৰেইনৰ প্ৰায়বোৰ কৃষি ক্ষেত্ৰকে ৰাছিয়াৰ বোমা বৰ্ষণে প্ৰায় ধ্বংসস্তূপত পৰিণত কৰিছে৷ যুদ্ধৰ বাবে দুয়োখন দেশে শস্যৰ বীজ ৰপ্তানি কৰা বন্ধ কৰাৰ ফলত বিশ্বত শস্যৰ বীজৰ মূল্য অভাৱনীয় হাৰত বৃদ্ধি হ’ব বুলি আশংকা কৰা হৈছে৷
খাদ্য শস্যঃ
ইউক্ৰেইন হৈছে বিশ্বৰ অন্যতম বৃহৎ খাদ্য শস্য ৰপ্তানি কৰা দেশ৷ ইউক্ৰেইনে পথ, জল পথ আৰু আকাশী পথেৰে বিশ্বজুৰি খাদ্য শস্যৰ ৰপ্তানি কৰে৷ যুদ্ধৰ ফলত ইউক্ৰেইনে খাদ্য শস্যৰ ৰপ্তানি কৰিব নোৱাৰিলে বিশ্ব জুৰি খাদ্য শস্যৰ অভাৱনীয় মূল্যবৃদ্ধি ঘটিব৷
ধাতু জাতীয় সামগ্ৰীঃ
ৰাছিয়া হৈছে বিশ্বৰ সৰ্বাধিক ধাতু জাতীয় সামগ্ৰী ৰপ্তানি কৰা দেশ৷ বিশেষকৈ সোণ, নিকেল, প্লেটিনিয়াম আৰু পাল্লাডিয়াম আদি ধাতু জাতীয় সম্পদ ৰাছিয়াই বিশ্বৰ বিভিন্ন দেশলৈ ৰপ্তানি কৰে৷ ৰাছিয়াৰ ওপৰত বিভিন্ন দেশে বাণিজ্যিক আৰু অৰ্থনৈতিক প্ৰতিবন্ধকতা আৰোপ কৰাৰ ফলত বিশ্বৰ বজাৰত ইয়াৰ নাটনি হোৱাটো নিশ্চিত৷ ইয়াৰ ফলত এই ধাতু জাতীয় সামগ্ৰীসমূহৰ মূল্য বৃদ্ধি ঘটাৰ আশংকা কৰা হৈছে৷
ইফালে লণ্ডন মেটেল এক্সচেঞ্জত এক টন নিকেলৰ মূল্য ১ লাখ মাৰ্কিন ড’লাৰলৈ বৃদ্ধি হৈছে৷ যুদ্ধৰ পৰিপ্ৰেক্ষিততে এই মূল্য বৃদ্ধি ঘটিছে৷ ইয়াৰ মূল্য আৰু বৃদ্ধি ঘটাৰ সম্ভাৱনা আছে৷
লগতে পঢ়ক ৰাছিয়াৰ আক্ৰমণত নিহত ইউক্ৰেইনৰ যুৱ সাংসদৰ সাংবাদিক প্ৰেমিকা
খাৰুৱা তেল আৰু পেট্ৰ’লজাত সামগ্ৰীঃ
আনহাতে যুদ্ধ ব্যস্ত থকা দুয়োখন দেশেই বিশ্বৰ বিভিন্ন দেশলৈ খাৰুৱা তেল আৰু পেট্ৰ’লজাত সামগ্ৰীৰ ৰপ্তানি কৰে৷ ইফালে ভাৰত হৈছে চীনৰ পিছতে ইয়াৰ বিশ্বৰ তৃতীয় বৃহৎ গ্ৰাহক৷ ভাৰতে ৪০ শতাংশৰো অধিক খাৰুৱা তেল আৰু পেট্ৰ’লজাত সামগ্ৰী আমদানি কৰে৷ ইয়াৰ ফলত ভাৰতত পেট্ৰ’ল আৰু ডিজেলৰ মূল্য বৃদ্ধি হোৱাৰ আশংকা কৰা হৈছে৷
অৱশ্যে শেহতীয়াকৈ প্ৰকাশ পাইছে যে ভাৰতে ৰাছিয়াৰ প্ৰতি নৰম স্থিতি গ্ৰহণ কৰি ৰাছিয়াৰ পৰা ৰেহাই মূল্যত খাৰুৱা তেল ক্ৰয় কৰিছে৷ বৃহস্পতিবাৰে বৈদেশিক মন্ত্ৰালয়ৰ মুখপাত্ৰ অৰিন্দম বাগছিয়ে এই কথা প্ৰকাশ কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
