ৰাছিয়াৰ আৰু ইউক্ৰেইনৰ মাজত বাজিছে যুদ্ধৰ দামামা৷ দুই প্ৰতিবেশী ৰাষ্ট্ৰৰ মাজত অব্যাহত থকা উচ্চ পৰ্যায়ৰ আলোচনা বাৰে বাৰে ব্যৰ্থ হোৱাৰ পিছতে বিশ্বৰ যুদ্ধ বিশেষজ্ঞসকলে যুদ্ধ প্ৰায় অৱশ্যম্ভাৱী হৈ পৰা বুলি আশংকা কৰিছে৷
ইয়াৰ পিছতে যিকোনো সময়তে ৰাছিয়াই ইউক্ৰেনৰ ওপৰত আক্ৰমণ সংঘটিত কৰাৰ আশংকা ঘণীভূত হৈছে।
ইফালে মাৰ্কিন যুক্তৰাষ্ট্ৰই যুদ্ধৰ আশংকা কৰি ইউক্ৰেনৰ ৰাজধানী কিয়েভস্থিত মাৰ্কিন দূতাবাসৰপৰা নিজ দেশৰ কৰ্মকৰ্তা তথা কৰ্মচাৰীৰ পৰিয়ালক ইতিমধ্যে স্থানান্তৰ কৰিবলৈ নিৰ্দেশ দিছে। ৱাশ্বিংটনৰ তৎপৰতাই যুদ্ধৰ আশংকা আৰু অধিক প্ৰবল কৰি তুলিছে বুলিও যুদ্ধ বিশেষজ্ঞসকলে মত প্ৰকাশ কৰিছে।
আমেৰিকাই অভিযোগ কৰি আহিছে যে ৰাছিয়াই ইউক্ৰেনৰ ওপৰত আগ্ৰাসনৰ প্ৰস্তুতি চলাইছে৷ কিন্তু আমেৰিকাৰ অভিযোগক মস্কোৱে একেষাৰে নাকচ কৰিছে।
উল্লেখ্য যে, বিগত কেইমাহমান ধৰি ৰাছিয়াই পূব ইউৰোপত নাট’ৰ প্ৰভাৱ সম্প্ৰসাৰণৰ প্ৰসংগলৈ আপত্তি দৰ্শাই আহিছে। সম্প্ৰতি আমেৰিকা যুক্তৰাষ্ট্ৰ নেতৃত্বাধীন সামৰিক বাহিনীত কিয়েভৰ যোগদানৰ জল্পনা-কল্পনাৰ পিছতেই মস্কোৱে দ্ৰুতগতিত ইউক্ৰেন সীমান্তত সেনা মোতায়েন কৰিছে।
উপগ্ৰহৰ পৰা সংগ্ৰহ কৰা ছবিবোৰেও আসন্ন যুদ্ধৰ ইংগিত দিছে। এনে পৰিস্থিতিত ইউক্ৰেনক সংগ দিছে ব্ৰিটেইন আৰু কানাডাই।
ৰুছ বাহিনীক প্ৰতিহত কৰিবলৈ ইতিমধ্যে ব্ৰিটেইনে ইউক্ৰেনক এন্টি টেংক মিছাইল হস্তান্তৰ কৰা বুলিও বাতৰি উলাইছে। মাত্ৰ এয়াই নহয়, ইউক্ৰেন সেনাক সহায় কৰিবলৈ কানাডাই ইতিমধ্যে প্ৰেৰণ কৰিছে বিশেষ কামাণ্ডো বাহিনী।
ইফালে ৰাছিয়াই ইউক্ৰেনলৈ নাট’ সম্প্ৰসাৰণ বাৰে বাৰে বিৰোধ কৰি আহিছে। এই সম্প্ৰসাৰণ বন্ধ কৰিলেই ইয়াৰ পৰিণাম অতি ভয়াৱহ হ’ব বুলি হুংকাৰ প্ৰদান কৰি মস্কোৱে সামৰিক পদক্ষেপ লোৱাৰো ভাবুকি দিছে।
মস্কো টাইমছে প্ৰকাশ কৰা মতে মস্কোৱে ইউক্ৰেইন সীমান্ত আৰু সংযুক্ত ক্ৰিমিয়াত প্ৰায় ১ লাখ ৰুছ সৈন্য মজুত কৰিছে৷ আৰু চুবুৰীয়া বেলাৰুছৰ সৈতে সামৰিক অনুশীলনৰ ঘোষণাই অঞ্চলটোলৈ উত্তেজনা কঢ়িয়াই আনিছে।
ৰাছিয়া এই ভাবুকিৰ পিছতে ইউক্ৰেনত ব্ৰিটিছ কামাণ্ডো বাহিনীৰ ৩০ জনীয়া এটা দল উপস্থিত হৈছে। ৰাছিয়াই আক্ৰমণ কৰিলে প্ৰত্যাক্ৰমণ কৰিবলৈ লণ্ডনে ইউক্ৰেনলৈ প্ৰায় ২ হাজাৰ বিধ্বংসী টেংক প্ৰেৰণ কৰিছে। ব্ৰিটিছ প্ৰতিৰক্ষা সচিবে ভবিষ্যতে আৰু অধিক অস্ত্ৰ প্ৰেৰণ কৰা হ’ব বুলিও প্ৰকাশ কৰিছে।
উল্লেখ্য যে ২০১৪ চনৰ পৰাই ৰাছিয়া আৰু ইউক্ৰেনৰ মাজত এক উত্তেজনাময় পৰিবেশে বিৰাজ কৰি আহিছে। ৰাছিয়াই সকলো সময়তে ইউক্ৰেনৰ ওপৰত এক আগ্ৰাসী নীতি অৱলম্বন কৰি আহিছে। এনে পৰিস্থিতিত ইউক্ৰেনে কি পদক্ষেপ ল’ব সেয়া এই সময়ত লক্ষণীয় হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
