কেৱল ইউক্ৰেইন নহয়, কৰ্কটৰ সৈতেও যুদ্ধ কৰিছে ৰাছিয়াই৷ স্পুটনিক পাঁচ ভিৰ পাছত আকৌ এবাৰ বিশ্বক চমক দিবলৈ প্ৰস্তুত ৰাছিয়া৷ এইবাৰৰ যুদ্ধত নামিছে কৰ্কটৰ বিৰুদ্ধে৷ ক্ৰেমলিন সূত্ৰৰ খবৰ অনুসৰি প্ৰায় একেই সময়তে তেওঁলোকে তৈয়াৰ কৰিছে দুটা ভিন্নধৰ্মী কিন্তু যুগান্তকাৰী কৰ্কটৰ ভেকছিন৷ দুটাৰেই মানৱশৰীৰত পৰীক্ষামূলক প্ৰয়োগৰ বাবে বিশেষ লাইচেন্সো তেওঁলোকে লাভ কৰিছে৷ চলিত বছৰৰ শেষত এই ট্ৰায়েল আৰম্ভ হোৱাৰ কথা৷
এই খবৰ আশাৰ কিৰণ আনিছে সমগ্ৰ বিশ্বত৷ সকলোতকৈ বেছি আলোচনা চলিছে মস্কোৰ বিখ্যাত গেমেলিয়া ৰিচাৰ্ছ চেণ্টাৰক লৈ৷ ক’ভিডৰ সময়ত তেওঁলোকে দ্ৰুত ভেকছিন তৈয়াৰ কৰি খ্যাতি অৰ্জন কৰিছিল এইবাৰ তেওঁলোকে কৃত্ৰিম বুদ্ধিমত্তা ব্যৱহাৰ কৰি এক পাৰ্ছনেলাইজড মেছেঞ্জাৰ আৰ এন এ ভেকছিন তৈয়াৰ কৰিছে৷ বিজ্ঞানীসকলৰ দাবী, এই ভেকছিন প্ৰত্যেক ৰোগীৰ বাবেই পৃথককৈ তৈয়াৰ কৰা হৈছে৷ ৰোগীৰ টিউমাৰৰ জেনেটিক গঠন বিশ্লেষণ কৰি এ আইৰ সহায়ত এনে এক নক্সা তৈয়াৰ হব যিয়ে ৰোগীৰ নিজস্ব ৰোগ প্ৰতিৰোধ ক্ষমতাক কৰ্কটৰ কোষ বিচাৰি ওলিয়াই ধ্বংস কৰাৰ বাবে প্ৰশিক্ষিত কৰিব৷
প্ৰাথমিকভাৱে মেলানোমা বা ছালৰ কৰ্কটত আক্ৰান্তসকলৰ ওপৰত এই ট্ৰায়েল আৰম্ভ হলেও অগ্নাশয়, হাওঁফাওঁ আৰু মস্তিষ্কৰ কৰ্কটৰ ক্ষেত্ৰতো ইয়াৰ কাৰ্যকাৰিতা পৰীক্ষা কৰা হব৷ প্ৰায় নিঃশব্দেই আৰু এঢাপ আগুৱাইছে ৰাছিয়াৰ ফেডাৰেল মেডিকেল এণ্ড বায়োলজিকেল এজেন্সি নামৰ এটা সংস্থাও৷ তেওঁলোকে তৈয়াৰ কৰা ভেকছিনৰ নাম এণ্টেৰোমিক্স৷ ইও এক এম আৰ এন এ ভেকছিন৷ এই ভেকছিন ৰোগীৰ শৰীৰ অনুসৰি বিশেষভাৱে তৈয়াৰ হব৷ ইয়াৰ প্ৰাথমিক লক্ষ্য কলৰেক্টাল বা মলদ্বাৰৰ কৰ্কট ৰোধ কৰা৷ ফেডাৰেল মেডিকেল এণ্ড বায়োলজিকেল এজেন্সি প্ৰধান ভেৰোনিকা স্কভোৰৎচভাই জনাইছে যে প্ৰি ক্লিনিকেল বা প্ৰাণীদেহত পৰীক্ষাৰ পৰ্যায়ত এণ্টেৰোমিক্সে অভাৱনীয় সাফল্য পাইছে৷
ই কেৱল টিউমাৰৰ বৃদ্ধিয়েই ৰোধ কৰা নাই, ই ৬০ৰ পৰা ৮০ শতাংশ পৰ্যন্ত সংকুচিত কৰিবলৈ সক্ষম হৈছে৷ তেওঁৰ কথাত ‘ভেকছিনটো সম্পূৰ্ণ নিৰাপদ আৰু অত্যন্ত কাৰ্যকৰ প্ৰমাণিত হৈছে৷ আমি মানৱ ট্ৰায়েলৰ বাবেও প্ৰস্তুত৷’ বিশেষজ্ঞসকলৰ মতে এই দুটা ভেকছিনৰ মূল শক্তি হৈছে ইয়াৰ কাৰ্যকাৰিতাৰ ধৰণ৷ কেমোথেৰাপি বা ৰেজিয়েছনৰ দৰে নিৰ্বিচাৰে ভাল আৰু বেয়া কোষক আক্ৰমণ নকৰে এই ভেকছিনে৷ এই ভেকছিনে কেৱল কৰ্কটৰ কোষকেই টাৰ্গেট কৰে৷ ফলত পাৰ্শ্বপ্ৰতিক্ৰিয়া বহু কম হব বুলি আশা কৰা হৈছে৷
ৰাছিয়াৰ স্বাস্থ্য মন্ত্ৰণালয় সূত্ৰৰ পৰা জনা গৈছে ট্ৰায়েল সফল হলে দেশৰ নাগৰিকৰ বাবে এই ভেকছিন সম্পূৰ্ণ বিনামূলীয়া হব৷ যদিও ইয়াৰ আনুমানিক উৎপাদন খৰচ কম নহয়৷ কেৱল নাগৰিকক সেৱা কৰাৰ মানসিকতাৰে এই ভেকছিন ৰাছিয়াত বিনামূলীয়া কৰা হব৷ ৰাছিয়াৰ বাহিৰত এই ভেকছিনৰ দাম কিমান হব সেয়া কোৱা সম্ভৱ নহয়৷ বৰ্তমান সমগ্ৰ বিশ্বই অধীৰ আগ্ৰহেৰে বাট চাইছে ৰাছিয়াৰ কৰ্কট প্ৰতিৰোধী ভেকছিনৰ বাবে যদি সঁচাকৈয়ে সাফল্য আহে তেন্তে কৰ্কটৰ চিকিৎসাত অভূতপূৰ্ব সাফল্য আহিব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
