বুধবাৰে অসমৰ মুখ্যমন্ত্ৰী ডঃ হিমন্ত বিশ্ব শৰ্মাই শোণিতপুৰ জিলাৰ বিভিন্ন চাহ বাগিচাত ৬ খনকৈ আদৰ্শ বিদ্যালয় (মডেল স্কুল) উদ্বোধন কৰে৷ জিলাখনৰ নাহৰণী, ফুলবাৰী আৰু ঠাকুৰবাৰী চাহ বাগিচাত আদৰ্শ বিদ্যালয় উদ্বোধন কৰি মুখ্যন্ত্ৰী ডঃ শৰ্মাই কয় যে অসমৰ ৯৬ খন চাহ বাগিচা এলেকাত নতুনকৈ আৰম্ভ কৰা আদৰ্শ বিদ্যালয়সমূহত এতিয়ালৈকে ১৪,৫৯৪ গৰাকী ছাত্ৰ-ছাত্ৰীয়ে নামভৰ্তি কৰিছে৷
উল্লেখ্য যে মুখ্যমন্ত্ৰী ডঃ হিমন্ত বিশ্ব শৰ্মাই ৬ খন আৰ্দশ বিদ্যালয় উদ্বোধন কৰাৰ লগে লগে অসমৰ চাহ বাগিচাসমূহে স্বাধীনতাৰ পিছত প্ৰথম উচ্চ মাধ্যমিক বিদ্যালয় (হাই স্কুল) লাভ কৰিছে৷ ইয়াৰ পূৰ্বে চাহ বাগিচাসমূহত প্ৰাথমিক আৰু মধ্য ইংৰাজী বিদ্যালয় (এম ই স্কুল) প্ৰতিষ্ঠা হ’লেও স্বাধীনতা ৭৫ টা বছৰৰ অতিক্ৰম হোৱাৰ পিছতো এখনো হাই স্কুল প্ৰতিষ্ঠা হোৱা নাছিল৷
লগতে পঢ়ক অভিলাষা বৰাক ভাৰতীয় বায়ুসেনাৰ প্ৰথম মহিলা যুদ্ধ বিমান চালক
ৰাজ্য চৰকাৰে ৰাজ্যৰ চাহ বাগিচা এলেকাত ১১৯ খন আদৰ্শ বিদ্যালয় স্থাপনৰ ঐতিহাসিক সিদ্ধান্তৰ অংশ হিচাপে শোণিতপুৰৰ নাহাৰানী চাহ বাগিচা, ফুলবাৰী আৰু ঠাকুৰবাৰী চাহ বাগিচাত আদৰ্শ বিদ্যালয় উদ্বোধন কৰি মুখ্যমন্ত্ৰী ডঃ শৰ্মাই লগতে কয় যে ইতিমধ্যে চাহ বাগিচাসমূহত এনে ৯৬ খন মডেল স্কুল স্থাপন কৰা হৈছে।
বিভিন্ন সামাজিক-সাংস্কৃতিক পটভূমিৰ প্ৰখ্যাত ব্যক্তি, যেনে স্বাহিদ মাংগ্ৰী ওৰাং, লোকনায়ক অমিয় কুমাৰ দাস, ছহিদ হেমলাল কালিন্দীৰ আদিৰ নামেৰে এই বিদ্যালয়সমূহৰ নামকৰণ কৰা হ’ব বুলিও ডঃ শৰ্মাই উল্লেখ কৰে৷ “এই বিদ্যালয়সমূহে শিক্ষাক এক বৃহৎ গতি প্ৰদান কৰিব আৰু এক সামগ্ৰিক বিকাশ নিশ্চিত কৰিব।” মুখ্যমন্ত্ৰী ডঃ শৰ্মাই লগতে কয়৷
লগতে পঢ়ক সন্ত্ৰাসবাদীক ধনৰ যোগান! কাশ্মীৰী বিচ্ছিন্নতাবাদী ইয়াছিন মালিকক যাৱজ্জীৱন কাৰাদণ্ড
‘‘হাইস্কুল হিচাপে আৰম্ভ কৰি অহা বছৰ আদৰ্শ বিদ্যালয়সমূহে উচ্চতৰ মাধ্যমিক পাঠ্যক্ৰম আগবঢ়োৱা হ’ব। প্ৰতিখন বিদ্যালয়ত ৮ গৰাকী শিক্ষক নিযুক্তি দিয়াৰ বিপৰীতে প্ৰায় ১৫ হাজাৰ ছাত্ৰ-ছাত্ৰীক নামভৰ্তি কৰা হৈছে। অহা বছৰৰ পৰা এই আদৰ্শ বিদ্যালয়সমূহে ইংৰাজীত গণিত আৰু বিজ্ঞানৰ পাঠদান প্ৰদান কৰিব৷ আনহাতে অসমীয়া ভাষাত বিজ্ঞান আৰু অসমীয়া পাঠদান কৰা হ’ব। ইয়াৰ ফলত ছাত্ৰ-ছাত্ৰীসকলে নিজৰ মাতৃভাষাত শিকিব পাৰিব আৰু লগতে পৃথিৱীখন অন্বেষণ কৰাত সহায়ক হ’ব।’’ বুলি মুখ্যমন্ত্ৰী ডঃ শৰ্মাই কয়৷
শিশুসকলক বিনামূলীয়াকৈ পাঠ্যপুথি, ইউনিফৰ্ম, মধ্যাহ্ন ভোজন আদি যোগান ধৰাৰ বাবে এই বিদ্যালয়সমূহক ১ লাখ টকাৰ সাহায্যৰ প্ৰতিশ্ৰুতিও দিয়ে মুখ্যমন্ত্ৰী ডঃ শৰ্মাই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
