অসম লাইভ ২৪ঃ প্ৰধানমন্ত্ৰী নৰেন্দ্ৰ মোদীৰ দ্বিতীয়টো কাৰ্যকাল চলি আছে৷ শাসনলৈ অহাৰ পূৰ্বে দেশবাসীক মূল্যবৃদ্ধি নিয়ন্ত্ৰণকে ধৰি বহু প্ৰতিশ্ৰুতি দিছিল৷ কিন্তু সেই প্ৰতিশ্ৰুতি যেন প্ৰতিশ্ৰুতি হৈয়ে ৰ’ল৷ দেশত অত্যাৱশ্যকীয় সামগ্ৰীৰ মূল্যবৃদ্ধিয়ে জনসাধাৰণক জুৰুলা কৰিছে৷ শেহতীয়াভাৱে হাস্পতালৰ ৰোগীৰ বিছনাকে ধৰি চাউল, দৈ-চিৰা, গুৰতো GST আৰোপ কৰি দেশবাসীৰ মূৰত ৰামটাঙোন শোধাইছে৷ আনকি শিক্ষাৰ্থীৰ স্কুলীয়া সামগ্ৰীতো GST আৰোপ কৰিছে প্ৰধানমন্ত্ৰী মোদী নেতৃত্বাধীন কেন্দ্ৰীয় চৰকাৰে৷
তেনে সময়তে এগৰাকী প্ৰথম শ্ৰেণীৰ কণমানি ছাত্ৰীয়ে প্ৰধানমন্ত্ৰী মোদীলৈ লিখা এখন পত্ৰই দেশজুৰি চৰ্চা লাভ কৰিছে৷ উত্তৰ প্ৰদেশৰ কান্নুজৰ বাসিন্দা কৃতী ডুবেই নামৰ ৬ বছৰীয়া ছাত্ৰীগৰাকীয়ে প্ৰধানমন্ত্ৰী নৰেন্দ্ৰ মোদীলৈ পত্ৰযোগে কৈছে যে ‘মোৰ পেঞ্চিল, ৰবৰ আৰু মেগী ব্যয়বহুল হৈ পৰিছে।’
মূল্যবৃদ্ধিৰ বাবে অসুবিধাৰ সন্মুখীন হোৱা ছাত্ৰীগৰাকীয়ে পত্ৰখনত লিখিছে— ‘প্ৰধানমন্ত্ৰী, মোৰ নাম কৃতী ডুবে। প্ৰথম শ্ৰেণীত পঢ়ো। মোদী জী আপুনি বহুত মূল্যবৃদ্ধি কৰিছে। আনকি পেঞ্চিল, ৰবৰো দাম বঢ়াই দিছে৷ মেগীৰ দামো বৃদ্ধি পাইছে। এতিয়া পেঞ্চিল বিচাৰিলে মায়ে মোক মাৰধৰ কৰে৷। মই কি কৰিম? ল’ৰা-ছোৱালীয়ে মোৰ পেঞ্চিল চুৰি কৰে।’
হিন্দীত লিখা চিঠিখন এতিয়া ছ’চিয়েল মিডিয়াত ভাইৰেল হৈ পৰিছে৷ ছাত্ৰীগৰাকীৰ পিতৃ বিশাল ডুবে পেছাত এগৰাকী উকীল৷ পিতৃ ডুবেয়ে কন্যাৰ পত্ৰ সন্দৰ্ভত কয় যে এইখন মোৰ ছোৱালীৰ ‘মন কী বাত’। শেহতীয়াকৈ স্কুলত পেঞ্চিল হেৰোৱাৰ বাবে মাকে তাইক খং কৰিছিল৷ যাৰ বাবে তাই প্ৰধানমন্ত্ৰীলৈ পত্ৰ লিখিছে৷
ছ’চিয়েল মিডিয়াৰ জৰিয়তে এই কণমানি ছোৱালীজনীৰ চিঠিৰ বিষয়ে জানিবলৈ পাৰি ছিব্ৰামাউৰ এছডিএম অশোক কুমাৰে সাংবাদিকৰ আগত প্ৰকাশ কৰে যে মই কণমানিজনীক যিকোনো প্ৰকাৰে সহায় কৰিবলৈ সাজু আৰু তেওঁৰ চিঠিখন যাতে সংশ্লিষ্ট কৰ্তৃপক্ষৰ ওচৰলৈ যায়, তাৰ বাবে মই যৎপৰোনাস্তি চেষ্টা কৰিম।
যি হওক কণমানিগৰাকীয়ে প্ৰধানমন্ত্ৰীলৈ লিখা পত্ৰখ ছ’চিয়েল মিডিয়াত ভাইৰেল হৈ পৰাত দেশজুৰি চৰ্চা লাভ কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
