দীৰ্ঘ ২৭ বছৰীয়া বৰ্ণময় কৰ্মজীৱন আৰু মহাকাশ বিজ্ঞানত এটাৰ পাছত আনটো মাইলফলক স্পৰ্শ কৰাৰ পাছত অৱশেষত অৱসৰ ল’লে ভাৰতীয় বংশোদ্ভূত মাৰ্কিন মহাকাশচাৰী সুনীতা উইলিয়ামছ৷ বিগত ২৭ ডিচেম্বৰত সুনীতা উইলিয়ামছে অৱসৰ লৈছে৷ এক বিবৃত্তি দি বুধবাৰে আনুষ্ঠানিক ঘোষণা কৰিছে নাছাই৷
নাছাৰ প্ৰশাসক জেৰেড আইজাকমেনে ভাৰতীয় বংশোদ্ভূত মাৰ্কিন মহাকাশচাৰীক মহাকাশ অভিযানৰ অগ্ৰদূত হিচাপে অভিহিত কৰি কৈছে, ‘সুনীতা উইলিয়ামছে মানৱ মহাকাশযানৰ ক্ষেত্ৰত এজন পথিকৃৎ, মহাকাশ ষ্টেচনত তেওঁৰ নেতৃত্বত অনুসন্ধানৰ ভৱিষ্যৎ গঠন হৈছে আৰু পৃথিৱীৰ কক্ষপথত বাণিজ্যিক মিছনৰ পথো প্ৰশস্ত হৈছে৷’ তেওঁ লগতে কয়, বিজ্ঞান আৰু প্ৰযুক্তিৰ অগ্ৰগতিৰ বাবে তেওঁৰ কাম চন্দ্ৰত আৰ্টেমিছ মিছন আৰু মঙ্গল গ্ৰহত অগ্ৰসৰ হোৱাৰ ভিত্থি স্থাপন কৰিছে৷ আৰু তেওঁৰ অসাধাৰণ সাফল্যই প্ৰজন্মক বহু সপোন দেখুৱাবলৈ আৰু যিমান পাৰি সিমান সীমনা ঠেলি আগুৱাবলৈ অনুপ্ৰাণিত কৰিব৷ আপোনাৰ প্ৰাপ্য অৱসৰৰ বাবে অভিনন্দন৷ আৰু নাছাই আমাৰ জাতিৰ প্ৰতি আপোনাৰ সেৱাৰ বাবে আপোনাক ধন্যবাদ৷’ জেৰেড আইজাকমেনে লগতে কয়, ‘বিজ্ঞান আৰু প্ৰযুক্তিত আপোনাৰ অৱদান চন্দ্ৰত আৰ্টেমিছ মিছন আৰু ভৱিষ্যতৰ মঙ্গল গ্ৰহত যাত্ৰাৰ ভিত্তিক শক্তিশালী কৰিছে৷’
সুনীতা উইলিয়ামছৰ বৰ্ণময় কৰ্মজীৱন
১৯৯৮ চনত নাছা কৰ্তৃক নিৰ্বাচিত সুনীতা উইলিয়ামছৰ তিনিটা মিছনত তেওঁ মুঠ ৬০৮ দিন মহাকাশত কটাইছে৷ যি নাছাৰ মহাকাশচাৰীৰ বাবে দ্বিতীয় সৰ্বোচ্চ ৰেকৰ্ড৷ তেওঁ আমেৰিকানসকলৰ মাজত দীৰ্ঘতম একক মহাকাশযাত্ৰাৰ বাবে ষষ্ঠ স্থানতো আছে৷ নভোচাৰী বুচ উইলমোৰৰ সৈতেও ২৮৬ দিন আন্তৰ্জাতিক মহাকাশ গৱেষণা কেন্দ্ৰত একেৰাহে আছিল৷
তেওঁৰ কৰ্মজীৱন,সুনীতা উইলিয়ামছে মুঠ ৬২ঘণ্টা ৬ মিনিট ধৰি ৯টা স্পেছৱাক সম্পন্ন কৰিছে৷ যিকোনো মহিলা মহাকাশচাৰীৰ সৰ্বোচ্চ আৰু নাছাৰ ইতিহাসত ই চতুৰ্থ সৰ্বোচ্চ৷ তেওঁ মহাকাশত মাৰাথন দৌৰা প্ৰথমগৰাকী ব্যক্তি৷ উইলিয়ামছে প্ৰথম ২০০৬ চনৰ ডিচেম্বৰত এক্সপিডিছন ১৪/১৫ ৰ অংশ হিচাপে স্পেছ ছেটল ডিছকভাৰিত উৰাও মাৰিছিল৷
তেওঁৰ দ্বিতীয় মিছন আৰম্ভ হয় ২০১২ চনৰ জুলাই মাহত যেতিয়া তেওঁ কাজাখাস্তানৰ পৰা এক্সপিডিছন ৩২/৩৩-ৰ বাবে যাত্ৰা কৰে আৰু পাছত স্পেছ ষ্টেচন কমাণ্ডাৰ হিচাপে দায়িত্ব পালন কৰে৷ তেওঁৰ শেষ মিছন আছিল ২০২৪ চনৰ জুনৰ বোয়িঙৰ ষ্টাৰলাইনাৰ হিচাপে৷ ইয়াৰপাছতেই তেওঁ এক্সপিডিছন ৭১/৭২ত যোগ দিয়ে আৰু ২০২৫ চনৰ মাৰ্চ মাহত পৃথিৱীলৈ উভতি অহাৰ পূৰ্বে আকৌ আই এছএছৰ কমাণ্ডাৰ হয়৷
সুনীতা উইলিয়ামছ তৃতীয় আৰু শেষবাৰ মহাকাশ অভিযানত গৈছিল ২০২৪ চনত৷ বোয়িং ষ্টাৰলাইনাৰৰ ১০ দিন মিছনত গৈ যান্ত্ৰিক ত্ৰুটিৰ কাৰণে তেওঁ মহাকাশত আৱদ্ধ হৈ পৰে প্ৰায় চাৰে ৯ মাহৰ বাবে৷ বিগত বৰ্ষৰ মাৰ্চ মাহত তেওঁ পৃথিৱীলৈ উভতি আহিছে৷
সুনীতাৰ শিঁপা ভাৰততে
মেছচুছেটছত জন্ম হ’লেও সুনীতা উইলিয়ামছৰ শিঁপা কিন্তু ভাৰতৰ গুজৰাটতে৷ তেওঁৰ পিতৃ গুজৰাটৰ মেহছানা জিলাত জন্মগ্ৰহণ কৰিছিল৷ তাৰপিছতেই তেওঁ মাৰ্কিন যুক্তৰাষ্ট্ৰলৈ যায় আৰু শ্লোভেনিয়ান বনিকক বিয়া কৰাই৷ পদাৰ্থবিজ্ঞানত স্নাতক কৰাৰ পাছত সুনীতাই ফ্লোৰিডা ইনষ্টিটিউট অফ টেকনোলজিৰ পৰা ইঞ্জিনিয়াৰিং মেনেজমেণ্টত স্নাতকোত্তৰ হয়৷ মাৰ্কিন নৌসেনাত যোগ দি ৪০ ধৰণৰ বিমানত ৪ হাজাৰ ঘণ্টাৰো বেছি সময় উৰণৰ অভিজ্ঞতাও সঞ্চয় কৰে৷
১৯৯৮ চনত নাছাত যুক্ত হোৱাৰ পাছত তেওঁৰ সফলতাৰ পথ প্ৰশস্ত হয়৷ তেওঁৰ কৰ্মজীৱনৰ কথা স্মৰণ কৰি সুনীতাই মহাকাশক তেওঁ প্ৰিয় স্থান বুলিও অভিহিত কৰি কয় যে চন্দ্ৰ আৰু মঙ্গলগ্ৰহৰ দিশত মানৱতাৰ পৰবৰ্তী পদক্ষেপত অবদান ৰাখিবলৈ পায় তেওঁ গৰ্বিত৷ নিজৰ অৱসৰৰ প্ৰসংগত তেওঁ হাঁহি হাঁহি কয়, ‘মই অৱশ্যেই মহাকাশলৈ যাব খোজো৷ কিন্তু মোৰ স্বামীয়ে বোধহয় মোক আৰু মহাকাশলৈ যাবলৈ এৰি নিদিব৷ এতিয়া সময় আহিছে নতুন প্ৰজন্মৰ হাতত দায়িত্ব তুলি দিয়াৰ৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
