অসম লাইভ২৪ঃ ৰোহিত শৰ্মাৰ পিছতেই এইবাৰ অনুশীলনৰ সময়ত আঘাত পালে বিৰাট কোহলীয়ে। বৃহস্পতিবাৰে ইংলেণ্ডৰ বিৰুদ্ধে টি-২০ বিশ্বকাপৰ ছেমিফাইনেল খেলিব ভাৰতীয় দলটোৱে। ছেমিফাইনেলৰ পূৰ্বে এডিলেডত চলি থকা অনুশীলনত আঘাত পাইছে কোহলিয়ে। অৱশ্যে এই আঘাত গুৰুতৰ নহয় বুলি জনাইছে বিচিচিআইয়ে।
কি হৈছিল এডিলেডত?
অনুশীলনত নেট প্ৰেক্টিছ কৰি থাকোতেই হৰ্ষল পেটেলৰ বিৰুদ্ধে বেট ধৰিছিল কোহলিয়ে। হঠাতেই এটি বাউন্সাৰ বল আহি কোহলিৰ পিঠিত আঘাত কৰে। ক্ষন্তেক সময়ৰ বাবে কোহলি যন্ত্ৰনাত চটফটাই থাকে। কিছুসময়লৈ বেটখনতে ভৰ দি কোহলি ৰৈ যায়। অকণমান পিছতেই এই আঘাত গুৰুতৰ নহয় বুলি ইংগিত দি হৰ্ষ পেটেলক পুনৰ বলিং কৰিবলৈ নিৰ্দেশ দিয়ে।
কাইলৈ ভাৰতীয় দলটোৱে ইংলেণ্ডৰ বিৰুদ্ধে ছেমিফাইনেল খেলিব। ছেমিফাইনেল খেলাৰ পূৰ্বে অধিনায়ক ৰোহিত শৰ্মা আৰু দুৰ্দান্ত বেটছমেন বিৰাটে আঘাত পোৱাত চিন্তিত হৈ পৰিছে ক্ৰিকেট অনুৰাগীসকল। অৱশ্যে এই আঘাত গুৰুতৰ নহয়। চিন্তাৰ কোনো কাৰণ নাই, দুয়োগৰাকী খেলুৱৈয়ে সম্পূৰ্ণ সুস্থ বুলি জনাইছে বিচিচিআইয়ে। আঘাত পোৱাৰ পিছতো ইংলেণ্ডৰ বিৰুদ্ধে তেওঁলোকৰ প্ৰদৰ্শন ভাল হ’ব বুলি আশাবাদী দেশৰ ১৪০ কোটি জনতা।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
