টি-২০ বিশ্বকাপ জয় কৰাৰ পাছতেই মহাবিপদত ভাৰতীয় দল৷ শনিবাৰে ১১ বছৰৰ পাছত আইচিচিৰ ট্ৰফী নিজ হাতত তুলি লৈছে ভাৰতীয় দলে৷ জয়ৰ স্বাদ, প্ৰাপ্তিৰ কথাবোৰৰ মাজতেই এইবাৰ বিপদত পৰিছে টিম ইণ্ডিয়াৰ খেলুৱৈ৷ ট্ৰফি লৈ দেশলৈ উভতি আহিব পৰা নাই ভাৰতীয় দল৷ ৱেষ্ট ইণ্ডিজৰ হোটেল ৰুমৰ পৰা এখোজো বাহিৰলৈ দিব পৰা নাই ৰোহিতবাহিনীয়ে৷
বাৰ্বাডোজত আৱদ্ধ টিম ইণ্ডিয়া
ভাইৰেল খবৰ অনুসৰি ৱেষ্ট ইণ্ডিজৰ প্ৰকৃতিয়ে ভয়ংকৰ ৰূপ ধাৰণ কৰিছে৷ ঘূৰ্ণিবতাহ বৰষুণৰ সম্ভাৱনা আছে সেই দেশত৷ দেওবাৰে নিশাৰৰ পৰা সোমবাৰলৈকে অৰ্থাৎ বৰ্তমানো তাত ভয়ংকৰ ঘূৰ্ণীবতাহে তাণ্ডৱ চলাইছে৷ ইয়াৰ প্ৰভাৱ বাৰ্বাডোজৰ ওপৰতো পৰিছে৷ ইতিমধ্যেই বিমানবন্দৰৰ পৰা কোনো আন্তৰ্জাতিক বিমান উৰিবলৈ দিয়া হোৱা নাই প্ৰশাসনৰ তৰফৰ পৰা৷
এই উৰণ বাতিল হোৱাৰ বাবেই বাৰ্বাডোজৰ হোটেলত আৱদ্ধ হৈ আছে ভাৰতীয় ক্ৰিকেট টিম আটাইকেইগৰাকী খেলুৱৈৰ লগতে টিম মেনেজমেণ্টৰ আটাইবোৰ ব্যক্তি৷ ৱেষ্ট ইণ্ডিজ ক্ৰিকেট এছোচিয়েছনৰ তৰফৰ পৰা জনোৱা অনুসৰি ঘূৰ্ণিবতাহৰ কাৰণে অৰ্নিদিষ্ট কাললৈ উৰণ বাতিল হৈছে আটাইবোৰ আন্তৰ্জাতিক বিমানৰে৷ সেয়ে টিম ইণ্ডিয়াৰ সকলো সদস্য ৱেষ্ট ইণ্ডিজতেই অনিৰ্দিষ্ট কাললৈ থাকিব লাগিব৷ পৰিস্থিতি স্বাভাৱিক নোহোৱা পৰ্যন্ত ভাৰতীয় দল তাতেই থাকিব লাগিব৷ বৰ্তমান বাৰ্বাডোজৰ সমুদ্ৰ তীৰবৰ্তী এথন বিলাসবহুল হোটেলত আছে টীম ইণ্ডিয়াৰ খেলুৱৈসকল৷
কেতিয়া ভাৰতলৈ উভতি অহাৰ কথা আছিল ৰোহিত বাহিনীৰ?
প্ৰাথমিকভাৱে সোমবাৰে স্থানীয় সময় পুৱা ৮.৩০ মিনিটত বাৰ্বাডোজৰ পৰা ভাৰতীয় দলটোৱে ভাৰত অভিমূখে ৰাওনা হোৱাৰ কথা আছিল৷ কিন্তু আসন্ন ঘূৰ্ণিবতাহৰ বাবে এই সময়ত পিছুৱাই দিয়া হৈছে৷ পূৰ্বে নিউৱৰ্ক, ডুবাই হৈ ভাৰতলৈ অহাৰ কথা আছিল ভাৰতীয় দলটোৰ৷ পিটিআইয়ে প্ৰকাশ কৰা অনুসৰি, চাৰ্টাৰ্ড বিমানৰ সহায়ত হয়তো ভাৰতীয় দলটোক দেশলৈ অনা হ’ব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
