চলচ্চিত্ৰ নিৰ্মাতা মহৰ্ষি তুহিন কাশ্যপৰ শেহতীয়া চুটি ছবি ‘মোৰ ঘোঁৰাৰ দুৰন্ত গতি’ (দ্য হৰ্চ ফ্ৰম হেভেন)এ একাডেমী অফ মোচন পিকচাৰ আৰ্টছ এণ্ড চাইন্সেছ, অস্কাৰৰ শ্ৰেষ্ঠ লাইভ একচন চুটি চলচ্চিত্ৰ প্ৰতিযোগিতালৈ যোগ্যতা অৰ্জন কৰিছে।
ভাৰতীয় প্ৰতিযোগিতা শাখাত শেহতীয়াকৈ সমাপ্ত হোৱা বেংগালুৰু আন্তঃৰাষ্ট্ৰীয় চুটি চলচ্চিত্ৰ মহোৎসৱ ২০২২-ত এই চুটি ছবিখনে শীৰ্ষ পুৰস্কাৰ লাভ কৰাৰ পিছত এই যোগ্যতা অৰ্জন কৰিছে। উল্লেখ্য যে বেংগালুৰু আন্তঃৰাষ্ট্ৰীয় চুটি চলচ্চিত্ৰ মহোৎসৱ হৈছে ভাৰতত অনুষ্ঠিত হোৱা একাডেমী বঁটা যোগ্যতা অৰ্জনকাৰী চুটি চলচ্চিত্ৰ এটা মহোৎসৱ।
মহৰ্ষি তুহিন কাশ্যপৰ নিজা কাহিনীৰে পৰিচালিত ১৫ মিনিটৰ চুটি চলচ্চিত্ৰখনৰ কাহিনী হৈছে ওজাপালিৰ সৈতে জড়িত এজন ব্যক্তিৰ জীৱনৰ ওপৰত আধাৰিত যিয়ে ভাবে যে তেওঁৰ ওচৰতহে পৃথিৱীৰ দ্ৰুততম ঘোঁৰাটো আছে, যিটোৱে চহৰখনৰ ঘোঁৰা দৌৰ প্ৰতিযোগিতাত জয় হ’ব৷ কিন্তু পৰিহাসৰ কথাটো হৈছে যে তেওঁ যিটোক পৃথিৱীৰে দ্ৰুততম ঘোঁৰা বুলি ভাবিছে সেইটো আচলতে ঘোঁৰাৰ পৰিৱৰ্তে এটা গাধহে। অতিবাস্তৱবাদ আৰু ডাঠ হাস্যৰসৰ ছাঁ লৈ, চলচ্চিত্ৰখনত ওজাপালিৰ ৰূপটো চলচ্চিত্ৰগতভাৱে অনুবাদ কৰাৰ এক আনুষ্ঠানিক প্ৰয়াস কৰা হৈছে।
লগতে পঢ়ক কুমাৰীত্ব প্ৰমাণ কৰাত ব্যৰ্থ হ’ল নৱবিবাহিতা, পঞ্চায়তে বিহিলে ১০ লক্ষ টকাৰ জৰিমনা
অসমৰ প্ৰবীণ অভিনেতা অতুল পাচানীয়ে মুখ্য চৰিত্ৰত অভিনয় কৰা ছবিখনৰ দৃশ্য গ্ৰহণ অৰ্ণব লাহাৰ আৰু পুলকিত ফিলিপ তথা অৰ্ণব বৰা আৰু সোমনাথ গোঁহাইৰ ।
‘দ্য হৰ্চ ফ্ৰম হেভেন’ ইয়াৰ পূৰ্বে সন্মানীয় কলকাতা আন্তঃৰাষ্ট্ৰীয় চলচ্চিত্ৰ মহোৎসৱ ২০২২ আৰু হিমালয় চলচ্চিত্ৰ মহোৎসৱ ২০২১ ৰ বাবেও নিৰ্বাচিত হৈছিল।
নীলাঞ্জনা ৰুদ্ৰেৰ প্ৰযোজনাৰ চুটি ছবিখনৰ কলা পৰিচালনা বিপিন ৰোহিল্লাৰ আৰু ধ্বনি মিশ্ৰণ অৰ্চিছমান মুখাৰ্জীৰ। আনহাতে মহাক গুপ্তাই ছবিখনৰ ৰংবিদ হিচাপে কাম কৰিছিল। ছবিখনত অতুল পাচনিৰ লগতে স্নেহাংকৰ চক্ৰৱৰ্তী, অভিজিত নাগ, গৌৰৱ হালৈ, আশীষ চেটাৰ্জী আৰু সনাতন কৰ্মকাৰে অভিনয় কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
