অসম লাইভ ২৪ঃ ৭ – ১৬ জানুৱাৰীলৈ ১০ দিনীয়া বৰ্ণাঢ্য কাৰ্যসূচীৰে ধুবুৰীৰ তাৰাংগাঝাৰত নামনি অসম গ্ৰাম্য মহোৎসৱ অনুষ্ঠিত হোৱাৰ কথা আছিল৷ কিন্তু ৰাজ্য চৰকাৰে নতুনকৈ জাৰি কৰা SOPক লৈ মহা বিপাঙত পৰিছে আয়োজক সমিতিৰ লগতে একাংশ ব্যৱসায়ী৷
অসম চৰকাৰৰ সংখ্যালঘু উন্নয়ন ব’ৰ্ডৰ অধ্যক্ষ হাবিব মহম্মদ চৌধুৰীয়ে দ্বাৰ উন্মোচনেৰে ৭ জানুৱাৰীত শুভাৰম্ভণি কৰিছিল৷ পিছে স্বাস্থ্য মন্ত্ৰী কেশৱ মহন্তই নতুনকৈ জাৰি কৰা SOPৰ বাবে জিলা প্ৰশাসনে ইতিমধ্যে বন্ধ কৰি দিছে মহোৎসৱৰ সকলো দোকান-পোহাৰ৷ অকল দোকান-পোহাৰেই নহয় অনুষ্ঠানটো স্থগিতৰো নিৰ্দেশ দিছে৷
যাৰ বাবে চৰম হতাশাত ভুগিছে মহোৎসৱত অংশগ্ৰহণ কৰা ব্যৱসায়িক প্ৰতিষ্ঠানসমূহে৷ ব্যৱসায়ীসকলৰ স্পষ্ট অভিযোগ, বিভিন্ন উৎসৰ পৰা ঋণ লৈ মহোৎসৱত দোকান-পোহাৰ দিছিল৷
পুৰাদমে চলি থকা মহোৎসৱখন এনেদৰে হঠাতে বন্ধ হৈ পৰাৰ ফলত মূৰে-কপালে হাত দিবলগীয়া হৈছে ব্যৱসায়ীসকলে৷ সেয়ে ভুক্তভোগীসকলে মুখ্যমন্ত্ৰী ড০ হিমন্ত বিশ্ব শৰ্মালৈ কাতৰ অনুৰোধ জনাইছে চৰকাৰী কোভিড নীতি-নিৰ্দেশনা অনুযায়ী মহোৎসৱখন নিৰ্ধাৰিত সময়লৈ সুকলমে চলাই নিয়াৰ বাবে৷
লক্ষীপুৰৰ পৰা ফাৰুক আখতাৰৰ ৰিপ’ৰ্ট
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
