ৰুছ ৰাষ্ট্ৰপতি ভ্লাদিমিৰ পুটিনৰ আহ্বান ক্ৰমে ইউক্ৰেইনে সোমবাৰে বিয়লি ৰাছিয়াৰে আলোচনাত বহিবলৈ সন্মত হ’লেও প্ৰতিটো ক্ষণতে উৎকণ্ঠা বৃদ্ধি পোৱা পৰিলক্ষিত হৈছে৷
ৰাছিয়াৰ সৈতে আলোচনা হোৱাৰ পূৰ্বে ইউক্ৰেইনৰ ৰাষ্ট্ৰপতি ভ’ল’ডিমিৰ জেলেনস্কিয়ে মন্তব্য কৰিছে যে আলোচনা হোৱাৰ পূৰ্বে ৰাছিয়াই যুদ্ধ বিৰতি কৰিব লাগিব৷
ইফালে ৰাষ্ট্ৰপতি জেলেনস্কিয়ে ৰাছিয়ান সৈন্য বাহিনীৰ প্ৰতিও এক বিশেষ আহ্বান জনাইছে৷ ইউক্ৰেইনৰ ৰাষ্ট্ৰপতিগৰাকীয়ে ৰাছিয়ান সেনাক ইউক্ৰেইন ত্যাগ কৰি ৰাছিয়ালৈ ওভতি যাবলৈ আহ্বান জনাইছে৷
‘‘ইউক্ৰেইন ত্যাগ কৰি নিজৰ প্ৰাণ ৰক্ষা কৰক৷’’ ৰাছিয়ানক সেনাক এইদৰে আহ্বান জনোৱাৰ সমান্তৰালভাৱে ৰাষ্ট্ৰপতি জেলেনস্কিয়ে একপ্ৰকাৰৰ সকীয়নিও প্ৰদান কৰিছে৷
ইফালে সমগ্ৰ ইউক্ৰেইনৰ জনতাই ইউক্ৰেইনৰ ৰাষ্ট্ৰপতি বুলি মন্তব্য কৰি জেলেনস্কিয়ে কয় যে তেওঁৰ দেশৰ জনতাই তেওঁৰ দেশক ৰক্ষা কৰিব৷
‘‘যেতিয়া মই ৰাষ্ট্ৰপতি নিৰ্বাচনত প্ৰতিদ্বন্দ্বিতা কৰিছিলো তেতিয়া মই কৈছিলো, সকলোৱেই ৰাষ্ট্ৰপতি৷ কাৰণ আমি সকলোৱেই ৰাষ্ট্ৰৰ পতি দায়ৱদ্ধ৷ আমাৰ সৌন্দৰ্যশালী ইউক্ৰেইনৰ প্ৰতি দায়ৱদ্ধ৷ আৰু এতিয়া সকলোৱে এখন যুদ্ধক্ষেত্ৰৰ যুদ্ধা৷ নিজৰ দেশৰ একো একোগৰাকী যুদ্ধা৷’’ ইউক্ৰেইনৰ ৰাষ্ট্ৰপতি জেলেনস্কিয়ে দৃঢ়তাৰে আৰু কয়৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
