অসম লাইভ২৪ঃ আৰ্জেণ্টিনা-নেদাৰলেণ্ডৰ মেচ চলি আছিল তেতিয়া। কাটাৰত অনুষ্ঠিত সেই শ্বাসৰূদ্ধকৰ মেচখন চলি থকাৰ মাজতেই হঠাতেই মৃত্যুক সাবটি ল’লে এজন সাংবাদিকে। মাৰ্কিন সাংবাদিকজনৰ কাটাৰৰ প্ৰেছ গেলাৰীতেই হঠাতে মৃত্যু হোৱাত সকলো আচম্বিত হৈ পৰে। কিন্তু কেনেকৈ মৃত্যু হ’ল মাৰ্কিন সাংবাদিকজনৰ? মৃত সাংবাদিকগৰাকীৰ ভাতৃয়ে অনা অভিযোগ অনুসৰি তেওঁৰ ভাতৃক হত্যা কৰা হৈছে।
উল্লেখ্য যে ফিফা বিশ্বকাপৰ আৰম্ভণিতে LGBTQ সম্প্ৰদায়ক প্ৰতিনিধিত্ব কৰি ৰামধেনু ৰঙৰ চাৰ্ট পৰিধান কৰি কাটাৰৰ ফিফা ষ্টেডিয়ামলৈ আহিছিল মাৰ্কিন সাংবাদিকগৰাকী৷ সূত্ৰৰ খবৰ অনুসৰি এনেদৰে ৰামধেনুৰঙী চাৰ্ট পৰিধান কৰি অহাৰ বাবে ভাবুকিৰ সন্মুখীন হৈছিল মাৰ্কিন সাংবাদিকগৰাকী৷ হঠতেই শুকুৰবাৰে আৰ্জেণ্টিনা-নেদাৰলেণ্ডৰ খেল চলি থকা ষ্টেডিয়ামৰ গেলাৰীতেই মৃত্যু হৈছে মাৰ্কিন খেল সাংবাদিক গ্ৰেণ্ট ওৱেলৰ৷ লুইছেল আইকনিক ষ্টেডিয়ামতেই মৃত্যুক সাবটি লোৱা গ্ৰেণ্টৰ হৃদৰোগত মৃত্যু হোৱা বুলি জনাইছে চিকিৎসকে৷
গ্ৰেণ্টৰ মৃ্ত্যুৰ খবৰ ভাইৰেল হৈ পৰাৰ মাত্ৰকেই তেওঁৰ ভাতৃয়ে সামাজিক মাধ্যমত দিছে বিশেষ পষ্ট৷ ভাতৃৰ দাবী, মাৰ্কিন সাংবাদিকজনৰ মৃত্যুৰ বাবে কাটাৰ প্ৰশাসনেই দায়ী৷ ভাতৃ এৰিকে টুইটযোগে লিখিছে, ‘মই এৰিক ওয়েল৷ মই ৱাছিংটনৰ চিয়াটেলৰ বাসিন্দা৷ মই এজন সমকামী৷ আমাক প্ৰতিনিধিত্ব কৰিয়েই দাদা গ্ৰেণ্টে ৰামধেনু ৰঙী চাৰ্ট পৰিধান কৰিছিল৷ তেওঁ মৃত্যুৰ পূৰ্বে কৈছিল এই চাৰ্ট পৰিধান কৰাৰ বাবেই তেওঁ ভাবুকিৰ সন্মুখীন হৈছে৷ সেয়ে এই মৃ্ত্যুক মই স্বাভাৱিক বুলি ভাবিব নোৱাৰো৷ মোৰ মনে কৈছে তেওঁক হত্যা কৰা হৈছে৷ আমাক এই মৃত্যুৰ উচিত তদন্ত লাগে৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
