১৩ বছৰৰ মূৰকত চুবুৰীয়া ৰাজ্য মেঘালত ধৰা পৰিছে বিৰল ৰোগ, অসমত চিকিৎসাধীন
১৩ বছৰৰ মূৰকত দেশত ধৰা পৰিছে পলিঅ’ ৰোগ। পলিঅ’মুক্ত ভাৰত ঘোষণাৰ ১০ বছৰৰ মূৰত অসমৰ চুবুৰীয়া ৰাজ্য মেঘালয়ত এটি দুবছৰীয়া শিশুৰ দেহত ধৰা পৰিছে পলিঅ’। লগে লগে ৰাজ্যখনৰ স্বাস্থ্য বিভাগৰ হাই এলাৰ্টত। বৰ্তমানে শিশুটি অসমত চিকিৎসাধীন হৈ আছে।
এই ৰোগ সন্দৰ্ভত কেন্দ্ৰীয় চৰকাৰৰ এগৰাকী জ্যেষ্ঠ বিষয়াই কয় যে এয়া পূৰ্বৰ দৰে বন্য পলিঅ’ৰ ঘটনা নহয়। এইটো এটা ভেকচিন প্ৰৰোচিত পলিঅ’ কেছ। উল্লেখ্য যে, ২০১১ চনৰ পিছৰে পৰা দেশত পলিঅ’ৰ কোনো ৰোগী পোৱা হোৱা নাছিল। যাৰ বাবে ২০১৪ চনত বিশ্ব স্বাস্থ্য সন্থাইয়ো ভাৰতক পলিঅ’মুক্ত দেশ হিচাপে ঘোষণা কৰিছিল।
এতিয়া পশ্চিম গাৰো পাহাৰ জিলাৰ টিকৰিকিলাৰ বাসিন্দা এটি শিশুৰ দেহত নতুনকৈ পলিঅ’ পজিটিভ ধৰা পৰিছে। কেন্দ্ৰৰ বিষয়াগৰাকীৰ মতে, ৰোগ প্ৰতিৰোধ ক্ষমতা কম থকা লোকৰ ক্ষেত্ৰত এই সংক্ৰমণ হয়। মেঘালয়ৰ মুখ্যমন্ত্ৰী কনৰাড কে চাংমাই কয় যে এসপ্তাহতকৈও অধিক পূৰ্বে শিশুটিৰ পলিঅ’মাইলাইটিছৰ লক্ষণ দেখা গৈছিল।
বৰ্তমানে অসমৰ গোৱালপাৰাৰ এখন চিকিৎসালয়ত Acute flaccid paralysis ৰোগত আক্ৰান্ত শিশুটিৰ চিকিৎসা চলি আছে। এতিয়া মেঘালয়ৰ স্বাস্থ্য বিষয়াই শিশুটিৰ মল আৰু অন্যান্য নমুনা সংগ্ৰহ কৰি পৰীক্ষাৰ বাবে প্ৰেৰণ কৰিছে।
ইণ্ডিয়ান কাউন্সিল অৱ মেডিকেল ৰিচাৰ্চ (আই চি এম আৰ)ৰ নেশ্যনেল ইনষ্টিটিউট অৱ ভাইৰ’লজী (এন আই ভি)ৰ কেন্দ্ৰসমূহলৈ শিশুটিৰ নমুনা প্ৰেৰণ কৰা হৈছে।
যদি ৰোগ প্ৰতিৰোধ ক্ষমতা দুৰ্বল হয় তেন্তে ইয়াৰ প্ৰভাৱ বহুদিনলৈকে থাকিব পাৰে। শৰীৰত যিমানেই বেছি দিন থাকে সিমানেই ক্ষতিকাৰক হয়। কেতিয়াবা ইয়াৰ ফলত পক্ষাঘাতৰো সৃষ্টি হ’ব পাৰে। WHO ৰ মতে, এইটো হৈছে ভেকচিনৰ পৰা অহা পলিঅ’ ভাইৰাছ।
নতুনকৈ সমগ্ৰ বিশ্বৰে ২১খন দেশত এনেধৰণৰ ২৪টা ৰোগী ধৰা পৰিছে। যাৰ বিৰুদ্ধে ২-৩টা উচ্চমানৰ টিকাকৰণ অভিযান চলোৱা হৈছিল। পলিঅ’ৰ প্ৰাদুৰ্ভাৱ ৰোধ কৰিবলৈ প্ৰতিটো শিশুক টিকা দিয়া প্ৰয়োজন। যদি শিশুটিৰ জ্বৰ, ভাগৰ, ডায়েৰিয়া, কোষ্ঠকাঠিন্য বা মূৰৰ বিষৰ লগতে বমি হয় তেন্তে তৎক্ষণাত চিকিৎসকৰ ওচৰলৈ যাব লাগে। নতুনকৈ আক্ৰান্ত হোৱা সকলো শিশু পলিঅ’ৰ ভেকচিন বাবে দায়ী।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
