শৰীৰৰ বাবে ভিটামিন যেনেকৈ দৰকাৰ তেনেকৈ বেছি মাত্ৰাত ভিটামিন খালে মাৰাত্মক ক্ষতি হ’ব পাৰে শৰীৰৰ৷ অৰ্থাৎ আপোনাৰ শৰীৰত যি ভিটামিনৰ অভাৱ সেই ভিটামিনহে গ্ৰহণ কৰিব অন্যথা শৰীৰৰ ক্ষতিহে হ’ব পাৰে৷ শৰীৰত কোনো এবিধ ভিটামিন বাঢ়ি গলে একাধিক অসুখে দেখা দিব পাৰে৷ জানক শৰীৰত কি ভিটামিন বাঢ়ি গলে কিডনি বেয়া হয়? কিডনি ফেইলাৰ পৰ্যন্তও হ’ব পাৰে৷
একাধিক গৱেষণাত দেখা গৈছে শৰীৰত ভিটামিন ডিৰ মাত্ৰা বাঢ়ি গ’লে কিডনিৰ অসুখে দেখা দিয়ে৷ কিডনি ফেইলাৰ পৰ্যন্ত হ’ব পাৰে৷ বহুতেই ভিটামিন ডিৰ ছাপ্লিমেণ্ট সেৱন কৰে৷ কিছু মন গলেই এইধৰণৰ ছাপ্লিমেণ্ট খালে ওলোটাই শৰীৰৰ ক্ষতিহে হয়৷ বিশেষজ্ঞই কয় যে শৰীৰত ভিটামিন ডিৰ মাত্ৰা প্ৰয়োজনতকৈ বেছি হৈ গলে নানান ধৰণৰ সমস্যাই দেখা দিব পাৰে৷ ভিটামিন ডিৰ এবিধ স্নেহপদাৰ্থত দ্ৰৱণীয় ভিটামিন৷ বহুসময়ত ইয়াক কোৱা হয় ছাইচাইন ভিটামিন৷ তৈলাক্ত মাছত প্ৰচুৰ পৰিমাণে ভিটামিন ডি থাকে৷ ইয়াৰোপৰি মানুহৰ ছাল ৰ’দৰ সংস্পৰ্শলৈ আহিলেই শৰীৰত ভিটামিন ডি উৎপন্ন হয়৷ সামুদ্ৰিক মাছ, দুগ্ধজাত খাদ্য আৰু কণীত ভিটামিন ডি থাকে৷
অৱশ্যে অতিৰিক্ত ভিটামিন ডি খালে ৰক্তনলীত কেলছিয়াম জমা হোৱাৰ সমস্যাই দেখা দিব পাৰে৷ এই পৰিস্থিতিক চিকিৎসাৰ পৰিভাষাত কোৱা হয় কেলছিফিকেছন৷ যাৰ পৰা হাইপাৰকেলছিয়ামৰ দৰে ৰোগে দেখা দিয়ে৷ ইয়াৰ ফলত কিডনিৰ অসুখ, হাৰ্টৰ অসুখ, ষ্ট্ৰোকৰ আশংকা বাঢ়ে৷ হাড় শক্তিশালী কৰিবলৈ আৰু পেশীৰ যত্নৰ বাবে ভিটামিন ডি অপৰিহাৰ্য৷ গৱেষণাই জনাইছে যে ভাৰতৰ মুঠ জনসংখ্যাৰ প্ৰায় ৭৬ শতাংশই ভিটামিন ডিৰ অভাৱক ভোগে৷ কেৱল হাড় মজবুত কৰাই নহয়, অস্থিসংক্ৰান্তিয় নানান ৰোগ, অষ্টিয়োপোৰেছিচৰ দৰে ৰোগৰ আশংকা কমাই৷ ইয়াৰোপৰি ৰোগ প্ৰতিৰোধতো ভিটামিন ডি অত্যন্ত গুৰুত্বপূৰ্ণ৷
কিন্তু মাত্ৰা বেছি হৈ গলেই বিপদ৷ ইউ এছ নেশ্ব্যনেল ইনষ্টিটিউট অফ হেলথৰ তথ্য অনুসৰি ০-১ বছৰ বয়সীয়া শিশুসকলৰ বাবে দৈনিক ভিটামিন ডিৰ প্ৰয়োজন ০.০১ মিলিগ্ৰাম৷ ১-১৩ বছৰ বয়সীয়াসকলৰ বাবে দৈনিক ভিটামিন ডিৰ প্ৰয়োজন ০.০১৫ মিলিগ্ৰাম৷ ১৪-১৮বছৰ বয়সীয়াসকলৰ দৈনিক ০.০১৫মিলিগ্ৰাম ভিটামিন ডিৰ প্ৰয়োজন৷ ১৯-৭০ বছৰ বয়সীয়াসকলে নিয়মিত ০.০১৫ মিলিগ্ৰাম ভিটামিন ডি খোৱাটো প্ৰয়োজন৷ ৭১ বছৰ আৰু তাতোকৈ বেছি বয়সীয়াসকলে দৈনিক ০.০২ মিলিগ্ৰামতকৈ বেছি ভিটামিন ডি নোখোৱাই ভাল৷
মহিলাৰ ক্ষেত্ৰত ঋতুবন্ধৰ পাছত ভিটামিন ডিৰ ঘাটি বেছি হয়৷ সেয়ে এই সময়ত খোৱাবোৱাত বিশেষ নজৰ দিব লাগে৷ পুৰুষৰ ক্ষেত্ৰতো নিৰ্দিষ্ট এক বয়সৰ পাছত তেজত ভিটামিন ডিৰ অভাৱে দেখা দিয়ে৷ অতিৰিক্ত ভিটামিন ডিয়ে যাতে শৰীৰৰ ক্ষতি নকৰে তাৰবাবে বিশেষজ্ঞসকলে বহু সময়ত এই ভিটামিনৰ সৈতে ভিটামিন কে খোৱাৰ পৰামৰ্শ দিয়ে৷ ভিটামিন ডিয়ে তেজত কেলছিয়ামৰ মাত্ৰা বৃদ্ধি কৰে আৰু ভিটামিন কেই হাড়ত কেলছিয়াম সঞ্চয়ৰ হাৰ বৃদ্ধি কৰে৷ ফলত তেজত কেলছিয়ামৰ মাত্ৰা কমি যায়৷ কমি যায় হৃদৰোগৰ আশংকাও৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
