জুবিন দাৰ মহাপ্ৰয়াণৰ পিছতো তেওঁৰ কণ্ঠ, গীত আৰু সৃষ্টিৰ মাজেৰেই যেন তেওঁক বিচাৰি ফুৰিছে অগণন অনুৰাগীয়ে। সময় পাৰ হৈ যোৱাৰ লগে লগে জুবিন দাৰ নতুন নতুন গীত, পূৰ্বতে মুক্তি নোপোৱা সৃষ্টি আৰু তেওঁৰ সৈতে জড়িত স্মৃতিসমূহে অনুৰাগীৰ মনত পুনৰ জগাই তুলিছে শিল্পীগৰাকীৰ উপস্থিতি। এই সময়তে জুবিন গাৰ্গৰ কণ্ঠত আজি মুক্তি দিয়া বিশেষ গীতটোক অসমৰ প্ৰতিগৰাকী জুবিন অনুৰাগীৰ বাবে এক ‘ভাবিব নোৱাৰা উপহাৰ’ বুলি অভিহিত কৰিছে জনপ্ৰিয় কণ্ঠশিল্পী অংগৰাগ পাপন মহন্তই। পাপনৰ মতে, জুবিন দাৰ অনুপস্থিতিত তেওঁৰ কণ্ঠত নতুন গীত শুনিবলৈ পোৱাটো অনুৰাগীসকলৰ বাবে অত্যন্ত আবেগিক মুহূৰ্ত।
জুবিন গাৰ্গৰ অনুপস্থিতিয়ে অসমীয়া সংগীত জগতত সৃষ্টি কৰা শূন্যতা পূৰণ কৰাটো সহজ নহয়। কিন্তু তেওঁৰ কণ্ঠত ৰেকৰ্ড হৈ থকা কিন্তু মুক্তি নোপোৱা নতুন গীতসমূহে সেই শূন্যতাৰ মাজত অনুৰাগীসকলক কিছু সান্ত্বনা দিব পাৰে বুলি মত প্ৰকাশ কৰিছে পাপনে। পাপনৰ ভাষ্য অনুসৰি, জুবিন দাৰ কণ্ঠত নতুন গান শুনিবলৈ পোৱাটো কেৱল এটা নতুন গীত শুনা নহয়, বৰং অনুৰাগীৰ বাবে অতীতৰ স্মৃতি, ভালপোৱা আৰু আবেগক পুনৰ অনুভৱ কৰাৰ এক সুযোগ।
ইয়াৰ সমান্তৰালভাৱে পাপন মহন্তই জুবিন অনুৰাগীসকললৈ এক বিশেষ আহ্বানো জনাইছে। জুবিন গাৰ্গৰ বহু গীত আছে যিবোৰ হয়তো তেওঁৰ জনপ্ৰিয় গীতসমূহৰ তুলনাত অনুৰাগীয়ে কমকলৈ শুনে বা চৰ্চা লাভ কৰে। সেয়ে এনে তুলনামূলকভাৱে কম প্ৰচাৰ হোৱা গীতসমূহো অনুৰাগীসকলক শুনিবলৈ আৰু প্ৰচাৰ কৰিবলৈ পাপনে আহ্বান জনাইছে। তেওঁৰ মতে, জুবিন দাৰ সংগীতৰ বিশাল ভঁৰালৰ বহু মূল্যৱান সৃষ্টি এতিয়াও বহু লোকৰ বাবে অচিনাকি হৈ আছে।
জুবিন গাৰ্গৰ সৈতে নিজৰ সম্পৰ্ক আৰু স্মৃতিৰ কথাও ৰোমন্থন কৰে পাপন মহন্তই। জুবিন দাৰ মাতৃৰ মৃত্যুৰ খবৰ ল’বলৈ যোৱা সময়ৰ এটা বিশেষ ঘটনা মনত পেলাই পাপনে কয় যে সেই সময়ত জুবিন দাই তেওঁক ৭টা অক্টেভযুক্ত এখন বিশেষ কীব’ৰ্ড ক্ৰয় কৰাৰ পৰামৰ্শ দিছিল। জুবিন দাৰ সংগীতৰ প্ৰতি থকা গভীৰ আগ্ৰহ আৰু বাদ্যযন্ত্ৰৰ বিষয়ে তেওঁৰ জ্ঞানৰ এই স্মৃতিয়ে পাপনৰ মনত এতিয়াও বিশেষ স্থান দখল কৰি আছে। জুবিন দাৰ দৰে শিল্পীৰ সৈতে জড়িত এনে সৰু সৰু ঘটনাই সময় পাৰ হোৱাৰ পিছতো তেওঁৰ ব্যক্তিত্ব আৰু সৃষ্টিশীল মনটোক অনুৰাগীৰ সন্মুখত জীৱন্ত কৰি ৰাখে।
জুবিন গাৰ্গৰ প্ৰতি অনুৰাগীৰ অকৃত্ৰিম ভালপোৱা আৰু আকুলতাৰ কথাও উল্লেখ কৰে পাপনে। তেওঁৰ মতে, সময় পাৰ হৈ যোৱাৰ পিছতো যি ধৰণে অনুৰাগীসকলে জুবিন দাক মনত ৰাখিছে, তেওঁৰ গান শুনিছে আৰু তেওঁৰ সৃষ্টিৰ সৈতে জড়িত হৈ আছে, সেই কথাই প্ৰমাণ কৰে যে জুবিন কেৱল এজন শিল্পী হৈ থকা নাই—তেওঁ অসমীয়া মানুহৰ আবেগৰ সৈতে একাত্ম হৈ পৰিছে। সেইবাবেই জুবিন গাৰ্গক জীয়াই ৰখাটো অসমবাসীৰ বাবে কঠিন নহ’ব বুলিও মন্তব্য কৰে পাপনে। জুবিনৰ গীত, কণ্ঠ আৰু সৃষ্টিসমূহ অনুৰাগীৰ মাজত জীয়াই থাকিলেই তেওঁৰ স্মৃতিও সদায় জীয়াই থাকিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
