অসম লাইভ২৪ঃ বেছিভাগ সময়তে আমাৰ প্ৰধান সমস্যা হৈ থিয় দিয়ে উচ্চৰক্তচাপে। উচ্চৰক্তচাপৰ পৰা কি কি সমস্যা হ’ব পাৰে সেই বিষয়সমূহ লৈ আলোচনাও হয়। কিন্তু ৰক্তচাপ অত্যাধিক কমি গ’লেও সমস্যাই দেখা দিয়ে। এনে বহুলোক আছে যিসকলে নিয়মিতভাৱে নিম্ন ৰক্তচাপৰ সমস্যাত ভূগে। ক্ৰমাগতভাৱে নিম্ন ৰক্তচাপ থাকিলে চিকিৎসকৰ পৰামৰ্শ গ্ৰহণ কৰাটো অতি জৰুৰী।
নিম্ন ৰক্তচাপত সাধাৰণতে কি কি লক্ষণে দেখা দিয়ে?
নিম্ন ৰক্তচাপত শৰীৰত বহুকেইটা পৰিবৰ্তন আহে। সকলো সময়তে ক্লান্তি ভাৱ, মূৰ ঘূৰণি, বমি বমি ভাৱ, খাবলৈ ইচ্ছা নোহোৱা আদি লক্ষণে দেখা দিয়ে। ইয়াৰোপৰি ৰক্তচাপ কমি থাকিলে কামত অনীহা, চকু টানি ধৰা আদি সমস্যাই দেখা দিয়ে। নিম্ন ৰক্তচাপত শৰীৰত ছডিয়াম, পটাছিয়ামৰ ভাৰসাম্য নোহোৱা হয়।
নিম্ন ৰক্তচাপত ভূগিলে খাদ্যৰ তালিকাত কি ৰাখিব?
নিম্ন ৰক্তচাপত ভূগা একোজন ব্যক্তিয়ে দৈনিক ডাবৰ পানী খাব লাগে। তেতিয়া শৰীৰত পটাছিয়ামৰ ভাৰসাম্য বৰ্তি থাকে। ডাবৰ পানীয়ে শৰীৰৰ ইলেক্ট্ৰলাইটৰ ভাৰসাম্য ৰক্ষা কৰাতো সহায় কৰে। সেয়ে সপ্তাহত অন্তত ৩ টাকৈ ডাবৰ পানী খাব লাগে। নিম্ন ৰক্তচাপত ভূগা একোজন ব্যক্তিয়ে বেগত সদায়ে গ্লুকজ মিহলোৱা পানী ৰাখিব লাগে। এই পানীয়ে শৰীৰক শক্তি দিয়ে। নিম্ন ৰক্তচাপত ভূগা ব্যক্তিয়ে দৈনিক দালি, সিজোৱা কণী, ফল, মাছ, মাংস আদি খাব পাৰে। ফল খোৱাৰ ইচ্ছা নাথাকিলে জুছ বনাই খাব পাৰে। পুৱাই উঠি খেজুৰ আৰু আলমণ্ড আদিও খাব পাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
