প্ৰস্ৰাৱ কৰাৰ সময়ত কেতিয়াবা অধিক ফেন দেখা পোৱাটো স্বাভাৱিক ঘটনা হ’ব পাৰে। যদি প্ৰতিবাৰেই প্ৰস্ৰাৱত অত্যাধিক ফেন দেখা যায়, তেন্তে ইয়াৰ আঁৰত কোনো শাৰীৰিক কাৰণ থাকিব পাৰে।
শৰীৰত পানীৰ অভাৱ
পৰ্যাপ্ত পানী নাখালে প্ৰস্ৰাৱ অধিক ঘন আৰু গাঢ় হ’ব পাৰে। এনে প্ৰস্ৰাৱত ফেন বা বুদবুদ তুলনামূলকভাৱে বেছি দেখা যাব পাৰে। গৰমত অত্যাধিক ঘাম ওলোৱা, বমি বা ডায়েৰিয়াৰ ফলতো শৰীৰত পানীৰ পৰিমাণ কমিব পাৰে।
প্ৰস্ৰাৱৰ বেগ
বহু সময়ত কোনো ৰোগৰ বাবে নহয়, কেৱল প্ৰস্ৰাৱৰ ধাৰে ফেন সৃষ্টি কৰে। সাধাৰণতে এনে ফেন কিছু সময়ৰ পিছত নিজে নিজে নোহোৱা হৈ যায়।
প্ৰস্ৰাৱত প্ৰ’টিন থকা
প্ৰস্ৰাৱত অস্বাভাৱিকভাৱে প্ৰটিন ওলোৱাক proteinuria বুলি কোৱা হয়। ইয়াৰ এটা লক্ষণ হিচাপে বাৰে বাৰে অত্যাধিক ফেনযুক্ত প্ৰস্ৰাৱ দেখা যাব পাৰে। কিডনীয়ে তেজৰ পৰা প্ৰয়োজনীয় পদাৰ্থ ছেকনি কৰাৰ সময়ত সমস্যাৰ সৃষ্টি হ’লে প্ৰস্ৰাৱত প্ৰটিন যাব পাৰে।
কিডনিৰ সমস্যাৰ সম্ভাৱনা
কিছুমান কিডনিৰ ৰোগৰ ক্ষেত্ৰত প্ৰস্ৰাৱত প্ৰটিন বৃদ্ধি পাব পাৰে। সেইবাবে নিয়মিতভাৱে ফেনযুক্ত প্ৰস্ৰাৱ হোৱাৰ লগতে চকু বা ভৰিৰ তলত ফুলা, অস্বাভাৱিক ভাগৰ বা প্ৰস্ৰাৱৰ পৰিমাণৰ পৰিৱৰ্তন আদি দেখা দিলে চিকিৎসকৰ পৰামৰ্শ লোৱা উচিত।
প্ৰস্ৰাৱৰ সংক্ৰমণ
Urinary Tract Infection বা UTI হ’লেও প্ৰস্ৰাৱৰ স্বাভাৱিক ৰূপ সলনি হ’ব পাৰে। এনে ক্ষেত্ৰত ফেনৰ লগতে প্ৰস্ৰাৱ কৰাৰ সময়ত জ্বলা-পোৰা, বাৰে বাৰে প্ৰস্ৰাৱৰ অনুভূতি, তলপেটত বিষ বা প্ৰস্ৰাৱৰ পৰা অস্বাভাৱিক গোন্ধ ওলোৱা আদি লক্ষণ থাকিব পাৰে।
ডায়েবেটিছৰ সৈতে সম্পৰ্ক
দীৰ্ঘদিন ধৰি নিয়ন্ত্ৰণত নথকা ডায়েবেটিছে কিডনীৰ ওপৰত প্ৰভাৱ পেলাব পাৰে আৰু কেতিয়াবা প্ৰস্ৰাৱত প্ৰটিন ওলোৱাৰ সম্ভাৱনা বৃদ্ধি কৰিব পাৰে। সেয়ে ডায়েবেটিছ থকা ব্যক্তিৰ ক্ষেত্ৰত নিয়মিত স্বাস্থ্য পৰীক্ষা কৰাটো গুৰুত্বপূৰ্ণ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
