আহি গ’ল নিৰ্দেশনা, ১৬ বছৰৰ তলৰ শিশুৱে খুলিব নোৱাৰিব ইউটিউব একাউণ্ট
আজিৰ দিনত সামাজিক মাধ্যমত ব্যৱহাৰ কৰা লোকৰ সীমা-সংখ্যা নাই। কণ কণ শিশুৰ পৰা বুঢ়া লৈকে প্ৰায় সকলো আসক্ত সামাজিক মাধ্যমৰ প্ৰতি। ইনষ্টাগ্ৰাম, ফেচবুক, ইউটিউবৰ দৰে প্লেটফৰ্ম যুৱক-যুৱতী আৰু শিশুৰ মাজত যথেষ্ট জনপ্ৰিয়।
পাছে এই সামাজিক মাধ্যমে এতিয়া কিছু কিছু ক্ষেত্ৰত বেয়াৰ ফালে ঢাল খাইছে। যাৰ বাবে অষ্ট্ৰেলিয়া চৰকাৰে আনিছে বিশেষ নিৰ্দেশনা, ১৬ বছৰৰ তলৰ শিশুৰ বাবে ইউটিউব একাউণ্ট খোলাৰ ক্ষেত্ৰত নিষেধাজ্ঞা আৰোপ কৰাৰ এক বৃহৎ সিদ্ধান্ত গ্ৰহণ কৰিছে। লগতে ইয়াকো সদৰি কৰিছে যে, চলিত বৰ্ষৰে ডিচেম্বৰ মাহৰ পৰা কাৰ্যকৰী কৰা হ’ব এই নিৰ্দেশনা।
উল্লেখ্য যে, অষ্ট্ৰেলিয়াত ইতিমধ্যে টিকটক, স্নেপচ্যাট, ইনষ্টাগ্ৰাম, ফেচবুক আৰু এক্স (টুইটাৰ)ৰ দৰে সামাজিক মাধ্যম নিষিদ্ধ হৈ আছে। এতিয়া ই-সুৰক্ষা আয়ুক্তৰ পৰামৰ্শ অনুসৰি ইউটিউবৰ ক্ষেত্ৰতো অনা হৈছে বহু নিয়ম।
বিষয়াসকলে যুক্তি আগবঢ়ায় যে ইউটিউব মূলতঃ ভিডিঅ’ প্লেটফৰ্ম হোৱাৰ পিছতো পৰম্পৰাগত ছ’চিয়েল মিডিয়া প্লেটফৰ্মৰ দৰে একে ক্ষতিকাৰক বিষয়বস্তু প্ৰচাৰৰ লগতে কেতিয়াবা বিপদৰো সন্মুখীন হ’বলগীয়া হয়। যাৰ বাবে প্ৰকাশিত প্ৰতিবেদন অনুসৰি অষ্ট্ৰেলিয়াৰ প্ৰধানমন্ত্ৰী এণ্টনি আলবানিজে ডিজিটেল যুগত শিশুৰ সুৰক্ষা আৰু মানসিক স্বাস্থ্যক চৰকাৰে অগ্ৰাধিকাৰ দিয়া বুলি জোৰ দিয়ে।
নিৰ্দেশনা অনুসৰি, ১৬ বছৰৰ তলৰ শিশুৱে ইউটিউবত একাউণ্ট খুলিব নোৱাৰিলেও একাউণ্ট অবিহনেও ভিডিঅ’ চাব পাৰিব, কিন্তু ভিডিঅ’বোৰত কোনোধৰণৰ মন্তব্য দিব নোৱাৰিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
