নিজকে আধ্যাত্মিক গুৰু বুলি পৰিচয় দিছিল৷ ধৰ্মকথাও শুনাইছিল৷ সকলোবোৰক লৈয়েই এটা ইউটিউব চেনেলো চলাইছিল তেওঁ৷ কিন্তু এই সকলোবোৰ আছিল ভুৱা৷ প্ৰকৃততে গুৰুৰ ৰূপ লৈ দৈনিক এই ভণ্ডবাবাই চলাইছিল যুৱতীক যৌন নিৰ্যাতন৷ ব্লেকমেইলৰো গুৰুতৰ অভিযোগ উঠিছে এই বাবাৰ বিৰুদ্ধে৷ আই আইটি ৰুৰকিৰ প্ৰাক্তন ছাত্ৰ অভিষেক মিশ্ৰক গ্ৰেপ্তাৰ কৰিছে আৰক্ষীয়ে৷ মঙলবাৰে উত্তৰপ্ৰদেশৰ মথুৰাত থাকি এই কাণ্ড চলাই গৈছিল ভণ্ড বাবাই৷
অভিষেক মূলত ওড়িশাৰ বাসিন্দা৷ আই আইটি ৰুৰকিত মেকানিকেল ইঞ্জিনিয়াৰিঙত স্নাতক হয়৷ তাৰপিছতেই তেওঁ মথুৰালৈ যায়৷ তাতেই আদিকৰ্তা নাৰায়ণ দাস নাম লয়৷ আৰম্ভ হয় আধ্যাত্মিক জীৱন৷ মথুৰাৰ ৰাধাকুঞ্জ এলেকাত আশ্ৰম খুলি বহে আদিকৰ্তা নাৰায়ণ দাসে৷ ইয়াৰোপৰি আৰম্ভ কৰে ৰাধা কৃপা অমৃত নামৰ এটা ইউটিউব চেনেল৷ তাতেই আধ্যাত্মিক জ্ঞান বিতৰণ কৰে৷ সেয়া শুনি বহু তৰুণ তৰুণীয়েই অভিষেক ওৰফে আদিকৰ্তা নাৰায়ণ দাসৰ কাষলৈ আহে৷ ইয়াৰ সুবিধা লৈয়েই ভণ্ড বাবাই আৰম্ভ কৰিলে প্ৰকৃত খেলা৷
তৰুণ-তৰুণীসকলক পৰিয়ালৰ পৰা বিচ্ছিন্ন কৰি তেওঁৰ আশ্ৰমত থকাৰ বাবে উৎসাহিত কৰিছে বুলি অভিযোগ উঠিছে অভিষেকৰ বিৰুদ্ধে৷ তেওঁৰ ফান্দত পৰিছিত প্ৰায় ২৪গৰাকী তৰুণ-তৰুণী৷ তেওঁলোকে অভিষেকৰ আশ্ৰমতেই থাকিবলৈ লৈছিল৷ সকলো তৰুণীক নিজৰ লালসাৰ ফান্দত পেলাইছিল এই ভণ্ড বাবাই৷ প্ৰাথমিক তদন্তত জনা গৈছে তৰুণীসকলৰ সৈতে গন্ধৰ্ব বিবাহো কৰিছিল অভিষেকে৷ অভিযোগ অনুসৰি প্ৰসাদৰ নামত মাদক মিহলোৱা গাখীৰ খোৱাবলৈ আৰম্ভ কৰিছিল৷ অচেতন কৰাই যৌন নিৰ্যাতন চলাইছিল এই ভণ্ড বাবাই৷
কেৱল সেয়াই নহয় সকলোবোৰ কাণ্ডৰ ছবি, ভিডিঅ’ও ৰাখিছিল এই ভণ্ড বাবাই৷ ইয়াৰ পাছতেই সেইসমূহ দেখুৱাই ব্লেকমেইল আৰম্ভ কৰে৷ অভিষেকৰ বিৰুদ্ধে প্ৰথম মুখ খোলে ছত্তিশগড়ৰ এগৰাকী তৰুণীয়ে৷ ইয়াৰপাছতেই অভিষেকৰ গ্ৰেপ্তাৰ কৰিছে আৰক্ষীয়ে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
