অসম লাইভ ২৪ঃ বিজেপিয়ে হাইটেক টেকনলজিৰে নিৰ্মাণ কৰা ৰাজ্যিক কাৰ্যালয়ক লৈ প্ৰতিক্ৰিয়া ব্যক্ত কৰিছে অসম জাতীয় পৰিষদে। অসম জাতীয় পৰিষদৰ সাধাৰণ সম্পাদক জগদীশ ভূঞাই সংবাদ মাধ্যমৰ আগত প্ৰতিক্ৰিয়া ব্যক্ত কৰি কয়,’ৰাইজৰ ধনেৰে দলীয় ৰাজকাৰেং নিৰ্মাণ কৰিছে বিজেপি দলে। অসমৰ সুৰক্ষা আৰু বিকাশতকৈ অসমক নিজৰ ব্যৱসায়ীক বিকাশৰ ক্ষেত্ৰ হিচাপে ব্যৱহাৰ কৰিছে।’
ভাৰতৰ গৃহমন্ত্ৰী অমিত শ্বাহ আৰু বিজেপিৰ ৰাষ্ট্ৰীয় সভাপতি জে পি নাড্ডাক বিজেপি দল আৰু চৰকাৰী পাৰিষদবৰ্গই ব্যাপকভাৱে আদৰিছে যদিও অসমৰ সচেতন ৰাইজে মনৰ পৰা আদৰণি জনাব পৰা নাই বুলি উল্লেখ কৰিছে অজাপৰ সম্পাদকগৰাকীয়ে।
বিজেপি দলে ২০১৪, ২০১৬, ২০১৯ আৰু ২০২১ চনৰ নিৰ্বাচনত অসমবাসীক বহু প্ৰতিশ্ৰুতি দিছিল। স্বয়ং ভাৰতৰ প্ৰধানমন্ত্ৰী নৰেন্দ্ৰ মোদীয়েই ১৬ মে’ (২০১৪) ৰ পিছত সকলো বাংলাদেশীয়ে টালি টোপোলা বান্ধি ভাৰত ত্যাগ কৰিব লাগিব বুলি ভাষণত কৈছিল। কিন্তু পৰৱৰ্তী সময়ত বিজেপিৰ চৰকাৰে তাৰ বিপৰীত স্থিতি গ্ৰহণ কৰা বুলিও অভিযোগ উত্থাপন কৰিছে অজাপে।
আনহাতে অসম চুক্তিৰ ৬ নং দফা কাৰ্যকৰী কৰি অসমীয়া মানুহৰ সাংবিধানিক ৰক্ষাকৱচ সুনিশ্চিত কৰাৰ প্ৰতিশ্ৰুতি কিয় আজিও অপূৰণ হৈ ৰৈছে? আঢ়ৈ বছৰে উক্ত প্ৰতিবেদন দিল্লী গৈ কিয় পোৱা নাই সেই প্ৰশ্নও উত্থাপন কৰি সম্পাদক জগদীশ ভূঞাই কয়, ‘৬ জনগোষ্ঠীৰ জনজাতিকৰণ বিজেপিৰ অন্যতম প্ৰধান নিৰ্বাচনী প্ৰতিশ্ৰুতি আছিল। কিন্তু আন ৰাজ্যৰ নিৰ্বাচিত জনগোষ্ঠীক কেন্দ্ৰীয় চৰকাৰে জনজাতিৰ মৰ্য্যদা প্ৰদান কৰিলে। অথচ অসমৰ ৬ জনগোষ্ঠীৰ জনজাতিকৰণৰ দাবীৰ প্ৰতি কেন্দ্ৰীয় চৰকাৰক সম্পূৰ্ণ উদাসীন দেখা গ’ল।’
২০২১ চনৰ নিৰ্বাচনৰ পূৰ্বে অমিত শ্বাহে ঘোষণা কৰিছিল, বিজেপি চৰকাৰ পুনৰবাৰ হলে অসমক বানমুক্ত কৰি তুলিব। চৰকাৰ গঠনৰ ডেৰ বছৰ পিছতো অসম কিয় বানমুক্ত নহ’ল? উত্তৰ পূৰ্বাঞ্চলৰ বিভিন্ন ব্যৱসায়ীক গোষ্ঠী আৰু বিজেপি দলৰ কৰ্মকৰ্তাৰ পৰা সংগ্রহ কৰা চান্দাৰ ধনেৰে এই ৰাজ অট্টালিকা নিৰ্মাণ কৰা বুলিও অভিযোগ আনে অজাপৰ সম্পাদকগৰাকীয়ে।
বিজেপি দলে অসমত প্ৰায় ৩০ কোটি টকা ব্যয় সাপেক্ষে নিৰ্মাণ কৰা ৬ মহলীয়া অট্টালিকা উদ্বোধনেৰেই অসমৰ পৰা উভতি যোৱাৰ পূৰ্বে অসমবাসীক নাগৰিকত্ব সংশোধনী আইন (CAA) কেতিয়া বাতিল কৰিব? ৰাষ্ট্ৰীয় নাগৰিক পঞ্জী (NRC) কেতিয়া সম্পূর্ণ হ’ব? বিদেশী বহিষ্কৰণৰ কাম কেতিয়া সম্পাদিত হ’ব? এই বিষয়সমূহো স্পষ্ট কৰি যোৱাৰ আহ্বান জনাইছে অজাপৰ সম্পাদকগৰাকীয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
