অসম লাইভ ২৪ঃ ৰাজ্যজুৰি এতিয়া ক’ৰোনাৰ সন্ত্ৰাস। প্ৰতিদিনে বৃদ্ধি পাইছে ক’ৰোনা ৰোগীৰ সংখ্যা। অভাৱনীয়ভাৱে বাঢ়িছে মৃতকৰ সংখ্যাও। ক’ভিড-১৯ৰ বিৰুদ্ধে সকলোৱে যুঁজ দিছে। এই যুঁজত ভগৱান আখ্যা পাইছে চিকিৎসকসকলে। অনুৰূপধৰণে নাৰ্ছসকলক দেৱীৰূপে আখ্যায়িত কৰা হৈছে। পিছে, এইবাৰ ‘দেৱী’ আখ্যা পোৱা নাৰ্ছসকলে ভয়ংকৰ অভিযোগ উত্থাপন কৰিছে সোণোৱাল চৰকাৰ স্বাস্থ্য আৰু পৰিয়াল কল্যাণ বিভাগৰ মন্ত্ৰী হিমন্ত বিশ্ব শৰ্মা আৰু পীয়ুষ হাজৰিকাৰ বিৰুদ্ধে। একে অভিযোগ আনিছে স্বাস্থ্য বিভাগৰ আয়ুক্ত সচিবসহ একাংশ বৰমূৰীয়াৰ বিপক্ষে। সদৌ অসম নাৰ্ছ সন্থাই প্ৰেৰণ কৰা এক প্ৰেছ বিজ্ঞপ্তিত বিগত দুবছৰৰ পৰা ষ্টাফ নাৰ্ছসকলক নিঃশেষ কৰাৰ পৰিকল্পনা কৰা বুলি অভিযোগ কৰে সন্থাৰ সভানেত্ৰী আমিৰুল নেচা আৰু সাধাৰণ সম্পাদিকা জুনু চেতিয়া দিহিঙীয়াই। শেহতীয়াভাৱে ষ্টাফ নাৰ্ছসকলক ভাগ ভাগ কৰি বিভিন্ন ধৰণৰ পদ সৃষ্টি কৰা কাৰ্যত তীব্ৰ অসন্তুষ্টি ব্যক্তি কৰে সন্থাই।
সন্থাৰ অধীনস্থ ষ্টাফ নাৰ্ছ (GNM)সকলে যিকোনো মূল্যৰ বিনিময়ত চৰকাৰৰ এই ষড়যন্ত্ৰ সফল হ’ব নিদিয়ে বুলি হুংকাৰ দিয়ে। উল্লেখ্য যে ষ্টাফ নাৰ্ছসকলৰ দীৰ্ঘদিনীয়া সমস্যাসমূহ সমাধানৰ বাবে চৰকাৰ তথা বিভাগীয় বিষয়াবৰ্গৰে বহুবাৰ আলোচনাত মিলিত হৈছিল। এনে আলোচনাত কেইবাবাৰো স্বাস্থ্যমন্ত্ৰীও উপস্থিত আছিল। কিন্তু সমস্যা সমাধানৰ আশ্বাস দিয়া হৈছিল যদিও এই আশ্বাস বাৰে বাৰে ভংগ কৰা হৈছে বুলি প্ৰেছ বিজ্ঞপ্তিটোত উল্লেখ কৰে সভানেত্ৰী নেচা আৰু সম্পাদিকা দিহিঙীয়াই। চৰকাৰৰ এনে প্ৰতিশ্ৰুতি ভংগৰ বিৰুদ্ধে কাইলৈ অৰ্থাৎ ১৫ জুলাইৰ পৰা ১৭ জুলাইলৈ ক’লা বেজ পৰিধান কৰি ৰাজ্যৰ ভিন্নপ্ৰান্তত প্ৰতিবাদ সাব্যস্ত কৰিব সদৌ অসম নাৰ্ছ সন্থাৰ অন্তৰ্ভুক্ত ষ্টাফ নাৰ্ছসকলে। অৱশ্যে প্ৰতিবাদ চলিব যদিও নিজ নিজ কৰ্তব্য পালন কৰা হ’ব বুলি জানিবলৈ দিয়ে নেত্ৰী দুগৰাকীয়ে। স্বাস্থ্যসেৱা সঞ্চালকলৈ ইতিমধ্যে সন্থাই ৫ দফীয়া দাবী পত্ৰ প্ৰেৰণ কৰিছে। এই ৫ দফীয়া দাবীত আছে-
১) একেটা পদত একে দৰমহাৰ ব্যৱস্থা কৰা।
২) ক’ভিড-১৯ ৰোগীৰ শ্ৰুশ্ৰূষাত GNM ষ্টাফ নাৰ্ছ (NHM)সকলে আজিলৈকে নিষ্ঠাৰে কৰ্তব্য সম্পাদন কৰাৰ পাছতো নতুনকৈ সৃষ্টি কৰা পদসমূহত GNMসকলক উক্ত পদত আৱেদন কৰাৰ সুবিধা দিয়া।
৩) লখিমপুৰ মেডিকেল কলেজৰ কাৰণে নতুন পদত যি নিযুক্তিৰ ব্যৱস্থা কৰা হৈছে তাত জ্যেষ্ঠতাৰ ভিত্তিত অনলাইনযোগে নিযুক্তি প্ৰদানৰ সুবন্দৱস্ত কৰা।
৪) বন্ধ হৈ থকা ছুটীসমূহৰ নিৰ্দেশনা প্ৰত্যাহাৰ কৰা। আৰু
৫) আলোচনাৰ মাধ্যমেৰে নাৰ্ছিং খণ্ডটি অধিক শক্তিশালী কৰাৰ বাবে দ্বি-পাক্ষিক আলোচনাৰ সিদ্ধান্তসমূহ শীঘ্ৰেই কাৰ্যকৰী কৰা।
যিকোনো মূল্যৰ বিনিময়ত প্ৰতিবাদী কাৰ্যসূচী পালন কৰিবই বুলি বিজ্ঞপ্তিটোত বাৰে বাৰে দোহাৰিছে সদৌ অসম নাৰ্ছ সন্থাই। আনকি চৰকাৰে কঠোৰ হাতেৰে প্ৰতিবাদক নিয়ন্ত্ৰণ কৰিব বিচাৰিলেও কোনো ক্ষেত্ৰতে আপোচ নকৰাৰো ঘোষণা কৰে। ইমানৰ পাছতো যদি চৰকাৰে সন্থাৰ দাবীসমূহ মানি নলয়, তেন্তে পৰৱৰ্তী সময়ত জংগী আন্দোলন গঢ়ি তোলাৰো ভাবুকি প্ৰদান কৰে সদৌ অসম নাৰ্ছ সন্থাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
