অসম লাইভ২৪ঃ ওড়িশাৰ বালাছ’ৰৰ ৰে’ল দুৰ্ঘটনাৰ পাছতেই এখন বিদ্যালয়ক অস্থায়ী মৰ্গ হিচাপে ব্যৱহাৰ কৰা হৈছিল। মৃতদেহৰ সংখ্যা ইমানেই বৃদ্ধি হৈছিল যে হাস্পতালৰ মৰ্গত ঠাইৰ অভাৱ হয়। উপায়হীন হৈ প্রশাসনে বাহানগা বজাৰ হাইস্কুলক অস্থায়ী মৰ্গ হিচাপে ব্যৱহাৰ কৰে। বগা কাপোৰেৰে মেৰিয়াই শাৰী শাৰী মৃতদেহ বিদ্যালয়ৰ কোঠাসমূহত ৰখা হৈছিল। কিন্তু শীততাপ নিয়ন্ত্ৰণৰ ব্যৱস্থা নথকাত বিদ্যালয়তেই দেহসমূহ পচিবলৈ ধৰে। দেহসমূহৰ পৰা পচন ধৰি পানী নিৰ্গত হোৱাত দুৰ্গন্ধ বিয়পি পৰাত স্থানীয় লোকে আপত্তি দৰ্শাই। পাছত সেই মৃতদেহসমূহ ভুৱনেশ্বৰৰ চাৰিখন হাস্পতালত ৰখাৰ ব্যৱস্থা কৰি তাৰ পৰা লৈ যোৱা হয়।
মৃতদেহ সমূহ লৈ যোৱাৰ পাছতেই বিদ্যালয়খন প্রশাসনে ভাঙি পেলোৱাৰ সিদ্ধান্ত লৈছে। শুকুৰবাৰে পুৱাৰ পৰা বিদ্যালয় ভঙাৰ কাম আৰম্ভ হৈছে। অভিভাৱকসকলেও বিদ্যালয়খনত ছাত্ৰ ছাত্ৰীক পঠিয়াবলৈ আপত্তি দৰ্শোৱাৰ বাবেই এই সিদ্ধান্ত গ্ৰহণ কৰিছে বিদ্যালয় কৰ্তৃপক্ষৰ লগত ওড়িশা প্ৰশাসনে। সেই স্থানতেই আকৌ নতুনকৈ এখন বিদ্যালয় নিৰ্মাণ কৰা হ’ব বুলিও জনাইছে প্রশাসনে। পুৱাৰে পৰাই আৰম্ভ হৈছে বিদ্যালয় ভঙাৰ যাৱতীয় কাম।
উল্লেখ্য যে শুকুৰবাৰে নিশা দুৰ্ঘটনাটো সংঘটিত হোৱাৰ পাছতেই সেই স্থানৰ পৰা মৃতদেহসমূহ আনি বাহানগা হাইস্কুলৰ ভিতৰত ৰখা হৈছিল। শনিবাৰৰ নিশালৈকে মৃতদেহসমূহ তাত থোৱা হয়। চিনাক্ত হোৱা মৃতদেহসমূহ তাৰপৰাই একাংশই লৈ গৈছিল যদিও চিনাক্ত নোহোৱা মৃতদেহসমূহ তাতেই শনিবাৰৰ নিশা পৰ্যন্ত ৰখা হয়। শনিবাৰে নিশা সেই মৃতদেহসমূহ আকৌ নৰ্থ ওড়িশা চেম্বাৰ অৱ কমাৰ্ছ এণ্ড ইণ্ডাষ্ট্ৰি বিজনেছ পাৰ্কলৈ লৈ যোৱা হয়। মৃতদেহসমূহ লৈ যোৱাৰ পাছতেই বিদ্যালয় চৌহদ পৰিস্কাৰ কৰি চেনিটাইজো কৰা হৈছিল। কিন্তু তাৰ পাছতেই অভিভাৱকসকলে সেইখন বিদ্যালয়লৈ সন্তানক পঠিয়াবলৈ মান্তি নোহোৱাত প্ৰশাসনে উপায়হীন হৈ বিদ্যালয় ভঙাৰ সিদ্ধান্ত গ্ৰহণ কৰিছে। বিদ্যালয়খনত প্রথম শ্ৰেণীৰ পৰা দশমমানলৈকে প্ৰায় ৫৬৫ জন ছাত্ৰই শিক্ষাগ্ৰহণ কৰি আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
